Read new_tumbuka_bible Daniyele 8 Bible Online

Daniyele 8 - new_tumbuka_bible bible

Daniyele 8

¹Mu chirimika cha chitatu cha kuwusa kwa Belishazara, ine Daniyele nkhawona mboniwoni yinyakhe.

²Mu mboniwoni iyi nkhaŵa mu msumba ukuru wa Susa mu chigaŵa cha Elamu. Apo nkhadodoliskanga pa mboniwoni yira nkhasangika kuti ndili pa mronga wa Ulayi.

³Nkhinuska maso ghane ndipo nkhawona mberere yanarume ya masengwe ghaŵiri, yimilira mu mphepete mwa mronga. Masengwe ghose ghaŵiri ghakaŵa ghatali, kweni limoza likaŵa litali kuruska linyakhe, ndipo litali lira ndilo likamera pa umaliro.

⁴Nkhawona mberere yanarume yira yikubwankhulira masengwe ghakhe ku manjiliro gha dazi, ku mpoto, na ku mwera. Kukaŵavye na chikoko chinyakhe icho chikamanya kulimbana nayo, ndiposo kukaŵavye na yumoza wakuthaska kanthu ako yikaŵa nako. Yikachita chilichose icho yikakhumba ndipo yikajikuzga chomene.

⁵Apo nkhaŵa ndichali kulanguruka na cheneichi, mwamabuchibuchi nkhawona pepe uyo wakaŵa na lusengwe pakati pa maso ghakhe wakwiza kufuma ku manjiliro gha dazi kudumula charu chose cha pasi, kwambula kukanda pasi.

⁶Pepe yura wakiza ku mberere yanarume ya masengwe ghaŵiri yira, iyo nkhayiwona yimilira mu mphepete mwa mronga. Pepe yura wakayirotokera mwa ukari wa nkhongono zakhe.

⁷Nkhawona wakusenderera pafupi na mberere yanarume yira, ndipo wakayikaripira, wakayibwankhura na kuphyora masengwe ghakhe ghaŵiri. Mberere yanarume yira kuti yikaŵa na nkhongono za kulimbana nayo chara. Ntheura pepe wakaponya mberere yira pasi na kuyikandirizga. Pakaŵavye na yumoza wakuthaska mberere yanarume yira ku nkhongono za pepe yura.

⁸Penepapo pepe yura wakajikuzga chomene chifukwa cha nkhongono zakhe. Kweni para wakajitunthumura chomene na nkhongono zakhe, lusengwe lwakhe lukuru lura lukaphyoka. Mu malo mwa lweneulu, mukamera masengwe ghakuwonekera ghanayi agho ghakarazga ku mphepo zinayi za mtambo.

⁹Pa lumoza lwa masengwe ghanayi ghara, pakamera lusengwe luchoko ulo lukakura chomene kurazga ku mwera, ku mafumiro gha dazi ndiposo na ku charu cha uchindami.

¹⁰Lusengwe lura lukakura chomene mpaka lukafika ku wumba wa ŵasilikari ŵa kuchanya. Ndipo lukaponyera pasi nyenyezi na kuzikandirizgira pasi.

¹¹Lukajikuzga chomene mpaka kujiŵika kuŵa nga ndi Karonga wa wumba wa ŵasilikari ŵa kuchanya. Lukamarizga sembe yakocha iyo wakaperekekanga zuŵa na zuŵa, na kuwiskira pasi Nyumba ya Chiuta.

¹²Chifukwa cha kwananga, wumba wa ŵasilikari wa kuchanya ura ukathera kwa lusengwe lura, ndipo sembe zakocha zuŵa na zuŵa zikamarizgika. Ntheura chisopo chenecho chikatayika pasi. Nadi, mu chose icho lusengwe lura lukachita lukaruska.

¹³Penepapo nkhapulika wakupatulika yumoza wakuyowoya. Wakupatulika munyakhe wakamufumba uyo wakayowoyanga wakati, “Kasi mboniwoni yamkufiskika pauli, yeneiyo yikukhwaska kumarizgika kwa sembe zakocha zuŵa na zuŵa, kurutirizga kwa vya nthontho ivyo vikupereka pankhuro ndiposo na kukandirizgikira pasi kwa Nyumba ya Chiuta na wumba wa ŵasilikari wa kuchanya ura?”

¹⁴Wakamuzgora wakati, “Kufikira mazuŵa 2,300 na mise na mulenje. Penepapo Nyumba ya Chiuta ghamkuwezgekera nga ndi umo ghakawira kale.”

¹⁵Para ine Daniyele nkhati ndawona mboniwoni yira, nkhayezganga chomene kuti ndiyipulikiske. Mwa mabuchibuchi nkhawona yunji wakuŵa nga ndi munthu wakwima panthazi.

¹⁶Ndipo nkhapulika lizgu la munthu pakatikati pa vimbumira viŵiri vya mronga wa Ulayi. Likachemerezga likati, “Gabriyele muphalire munthu uyo ching'anamulo cha mboniwoni iyi.”

¹⁷Ntheura Gabriyele wakasenderera pafupi na malo apo nkhimilira. Wakati wafika, wofi ukandikora ndipo nkhawa pasi kavunama. Kweni wakandiphalira wakati, “Pulikiska iwe mwana wa munthu, mboniwoni iyi yikuphara nyengo za umaliro.”

¹⁸Wachali kuyowoya kwa ine, nkhawa pasi kavunama ndipo nkhaŵa mu tulo tuzitu, kweni wakandikhwaska na kundimika apo nkhaŵa.

¹⁹Iyo wakati kwa ine, “Nditi ndikuphalire ivyo viti viŵengeko para ukari wamara, pakuti pa nyengo iyo yimikika paŵenge umaliro.

²⁰“Mberere yanarume ya masengwe ghaŵiri iyo ukayiwona, ndi ŵakaronga ŵa charu cha Mediya na cha Peresiya.

²¹Pepe uyo ukamuwona ndi karonga wa charu cha Grisi, ndipo lusengwe lukuru pakati pa maso ghakhe ndi karonga wakudanga.

²²Masengwe ghanayi agho ghakamera pa ulo lukaphyoka, ndi maufumu ghanayi agho ghamkuŵako kufuma mu fuko la karonga wakudanga, kweni nkhongono zawo kuti zamkuyana na ufumu wa karonga wakudanga chara.

²³“Mu mazuŵa gha umaliro gha kuwusa kwa ŵakaronga ŵara, para uheni wawo wakura chomene, kwamkuwoneka karonga mukari na wambula kupwererako, nkhwantha yakumanya vya muchindindi.

²⁴Iyo wamkuŵa wankhongono chomene, ndipo wamkuchita uheni ukuru wakuruska. Mu vyose ivyo wakuchita wamkuruskanga. Wamkukoma vinkhara ndiposo na ŵanthu ŵakupatulika.

²⁵Chifukwa cha uryarya wakhe wamkwandaniska upusikizgi wakhe, ndipo mu mtima wakhe wamkwamba kujikuzga. Na nkhongono zakhe wamkukoma ŵanandi. Para iyo wamkuwuka kwimikana na karonga wa ŵakaronga, wamkukomeka, kweni na nkhongono za munthu chara.

²⁶Mboniwoni iyo ukayiwona ya nyengo za mise na za mulenje nja unenesko. Kweni ureke kuvumbula mboniwoni iyi, pakuti yikuphara vya mazuŵa gha kunthazi chomene.”

²⁷Kwakuyana na ine Daniyele, nkhathika lusoko, ndipo nkharwara kwa mazuŵa ghanandi. Penepapo nkhawuka na kwamba kuteŵetera karonga. Kweni nkhazukuma na mboniwoni yira, ndipo kukaŵavye na yumoza wakundiphalira ching'anamulo chakhe.