Read new_tumbuka_bible Daniyele 9 Bible Online

Daniyele 9 - new_tumbuka_bible bible

Daniyele 9

¹Mu chirimika chakudanga cha kuwusa kwa Dariyusi, mwana wa Ahasuweru, muMede, mweneuyo wakimikika kuŵa karonga mu ufumu wa charu cha Babuloni,

²ine Daniyele, nkhaŵazganga mabuku ghakupatulika. Nkhalangurukanga pa virimika 70 ivyo, kwakuyana na mazgu gha FUMU kwa nchimi Yeremiya, vikenera kufiskika kuti Yerusalemu wali mu mahami.

³Penepapo nkhazgokera kwa Fumu Chiuta ndipo nkharomba na kuŵeyerera chomene pamoza na kuziŵizga vyakurya, uku wavwara vigudulu na mu kukunkhura mu vyoto.

⁴Nkharomba kwa FUMU, Chiuta wane na kuzomera kwananga kwithu, nkhati, “Mwe FUMU, Chiuta mukuru na wakofya, mwaŵeneimwe mukufiska mapangano na chisungusungu chinu ku awo ŵakumutemwani na kusunga marango ghinu.

⁵Ise tananga, tachita icho nchiheni na cha ubendezi, ndipo tamugarukirani na kukana marango na malangulo ghinu.

⁶Ŵateŵeti ŵinu awo ndi nchimi kuti tikaŵapulikira chara. Ŵeneawo ndiwo ŵakayowoyanga mu zina linu ku ŵakaronga ŵithu, ku nduna zithu, ku ŵasekuru withu, ndiposo na ku ŵanthu wose ŵa mu charu.

⁷Kwa imwe, Mwe FUMU, urunji ndiwo ngwinu, kweni kwa ise ŵaYuda, awo ŵakukhara mu Yerusalemu, ŵaIsraele wose, ŵa pafupi na ŵa kutali mu vyaru vyose ivyo muli kuŵachimbizgiramo, ndi soni pera nga ndi umo kuliri na muhanya uno, chifukwa cha kureka kugomezgeka kwa imwe.

⁸Mwe Fumu, ise pamoza na ŵakaronga ŵithu, nduna zithu, na ŵasekuru withu, tili na soni chifukwa tamunangirani imwe.

⁹Kwa imwe Fumu Chiuta withu ndiko kuli lusungu na chigowokero, nangauli tamugarukirani imwe.

¹⁰Ise kuti tili kupulikira mazgu gha Fumu Chiuta withu chara, nesi kusunga marango ghakhe agho wakatipa kwizira mu ŵateŵeti ŵakhe awo ndi nchimi.

¹¹Ise tose ta ŵaIsraele tanangira marango ghinu, tapatukako kureka kumupulikirani imwe. Ndipo nthembo na chirapo ivyo vili kulembeka mu Dango la muteŵeti winu Mozesi, imwe Chiuta, vili pa ise, pakuti tili kumunangirani imwe.

¹²Imwe mwafiska mazgu ghinu agho mukayowoyera kwizira kwa iyo kususka ise na awo ŵakatiwusanga, pakutorera ise na ŵanthu ŵa mu Yerusalemu soka likuru ilo kuti likachitikapo mu charu chose cha pasi chara.

¹³Ndipo soka lose ilo latizira ise, likalembeka kale mu Dango la Mozesi. Ndipouli kuti taŵeyerera kwa Fumu Chiuta withu chara kuti waŵe nase na lusungu. Kuti tarapa uheni withu chara, nesi kupulikira unenesko wa mazgu ghinu.

¹⁴Mwe FUMU, mukatiwonanga ndipo sono mwatizira nalo soka ili. Imwe Fumu Chiuta withu ndimwe ŵarunji mu vyose ivyo mukutichitira, ndipo ise kuti tapulikira mazgu ghinu chara.”

¹⁵“Sono imwe, Mwe Fumu Chiuta withu, mwaŵeneimwe mukafumiska ŵanthu ŵinu mu charu cha Eguputo na nkhongono yinu, ndipo mukajitorera lumbiri nga ndi umo kuliri na muhanya uno, ise tamunangirani, tachita uheni.

¹⁶Mwe FUMU, kwakuyana na nchito zinu zose za urunji, tikumurombani kuti kutukutwa na ukari winu vifumeko ku msumba winu wa Yerusalemu, phiri linu lakupatulika. Chifukwa cha zakwananga zithu, na maubendezi gha ŵasekuru withu, Yerusalemu na ŵanthu ŵinu tazgoka kuŵa chinthu chakunyozeka na ŵanthu wose awo ŵali kutizingirizga.

¹⁷Ntheura sono, imwe Chiuta withu, tegherezgani ku lurombo lwa nda muteŵeti winu na ku maŵeyerero ghane. Chifukwa cha imwe, mwe Fumu, chisko chinu chiŵare pa malo ghinu ghakupatulika agho ghazgoka mapopa.

¹⁸Mwe Chiuta wane, tegherezgani khutu linu kwa ine ndipo mundipulike. Jurani maso ghinu kuti muwone kupankhuka kwithu, ndiposo na kwa msumba weneuwo ukuchemeka na zina linu. Ise tikuŵeyerera kwa imwe pa chifukwa cha urunji withu chara kweni pa chifukwa chakuti ndimwe ŵa chisungusungu chikuru.

¹⁹Mwe FUMU, ndipulikani! Mundigowokere Mwe FUMU! Mwe FUMU, tegherezgani ndipo muchitepo kanthu, chifukwa cha imwe, mureke kuchedwa mwe Chiuta wane, chifukwa msumba na ŵanthu ŵinu ŵakuchemeka na zina linu.”

²⁰Ine nkhayowoya na kuromba, kuzomera kwananga kwane na kwananga kwa ŵanthu ŵane ŵaIsraele, kupereka maŵeyerero ghane panthazi pa Fumu Chiuta wane, kurombera phiri lakupatulika la Chiuta wane.[2]

²¹Apo nkhaŵa ndichali kuromba, mungelo Gabriyele uyo nkhamuwona mu mboniwoni ya pakudanga, wakiza kwa ine uku wakuwuruka mwaluŵiro chomene pa nyengo ya kuperekera sembe ya mise.

²²Iyo wakati kwa ine, “Iwe Daniyele, ine sono ndiza kuti ndikupe vinjeru na umanyi.

²³Apo wambanga waka maŵeyerero ghako, zgoro likaperekeka ndipo ine ndiza kuti ndikuphalire zgoro ili. Iwe ndiwe wakutemweka chomene kwa Chiuta. Ntheura ughapulikiske mazgu agha apo nkhupereka ching'anamulo cha mboniwoni iyi.

²⁴“Nyengo ya kukwana virimika vinkhonde na viŵiri kwandaniska na 70 yili kupimikira ŵanthu ŵa ku kwinu na msumba winu wakupatulika, kumarizga majuvyo na zakwananga, na kuphepiskira maubendezi ghinu ndiposo na kunjizgamo urunji wa muyirayira, kukhozgera mboniwoni na uchimi na kughapatuliska malo ghakupatulika nkhanira.

²⁵Ntheura iwe umanye ichi na kupulikiska kuti, kufuma apo dango likaperekekera la kumuwezgeraso Yerusalemu na kumuzengaso mpaka apo karonga, wakupatulika yura, wawoneke pamkujumpha virimika vinkhonde na viŵiri kwandaniska na vinkhonde na viŵiri. Sono pa virimika 62 kwandaniska na vinkhonde na viŵiri msumba wamkuzengekaso na kuŵaso na misewu na mifwerenje ya maji, kweni muzamkuŵa mu nyengo ya visuzgo.

²⁶Pamanyuma pa virimika 62 kwandaniska na vinkhonde na viŵiri, wakuphakazgika yura wamkukomeka, kwambula kuŵapo na yumoza wakutora malo ghakhe. Sono ŵasilikari ŵa karonga wankhongono uyo wamkwiza wamkupankhura msumba na Nyumba ya Chiuta. Sono umaliro wakhe uti uŵenge nga chigumura ndipo wamkwiza na kupankhuka kwakofya. Pamkuŵa phasulo na nkhondo ivyo Chiuta wakalangula.

²⁷Karonga yura wamkukhozga phangano lankhongono na ŵanthu ŵanandi pa virimika vinkhonde na viŵiri. Para pajumpha hafu wa virimika vinkhonde na viŵiri ivi, iyo wamkurekeska sembe na vyakupereka. Chanthontho chakupankhura chira wizamkuchiŵika pachanya, ndipo chizamukharapo mpaka chilango icho Chiuta wali kunozgera chiwe pa uyo wakuchitiska pankhuro.”