Read new_tumbuka_bible Hoseya 1 Bible Online

Hoseya 1 - new_tumbuka_bible bible

Hoseya 1

¹Agha ndi mazgu gha FUMU agho ghakiza kwa Hoseya, mwana wa Beyeri, pa nyengo izo Uziya, Yotamu, Ahazi, na Hezekiya ŵakawusiranga charu cha Yuda, na pa nyengo iyo Yerobowamu, mwana wa Yowashi, wakawusiranga charu cha Israele.

²Para FUMU yikamba kuyowoya ku ŵaIsraele mwa Hoseya, yikamuphalira yikati, “Ruta ukatore mwanakazi muzaghali na kubaba nayo ŵana ŵeneawo ŵati ŵaŵenge ŵazaghali. Pakuti ŵanthu ŵa charu ichi ŵaŵa ŵambula kugomezgeka pakundisida ine FUMU.”

³Ntheura Hoseya wakaruta na kuya katora Gomere mwana wa Dibulayimu. Iyo wakaŵa na nthumbo na kumubabira mwana mwanarume.

⁴Sono FUMU yikati kwa Hoseya, “Mwana uyu umuthye kuti Yezireyele[1] pakuti sonosono apa nditi ndilange mbumba ya Yehu chifukwa cha ŵanthu awo wakakoma mu msumba wa Yezireyele. Ine nditi ndimarizge ufumu wa Israele.

⁵Pa zuŵa leneilo ndamkumarizga nkhongono za ŵaIsraele mu dambo la Yezireyele.”

⁶Gomere wakaŵaso na nthumbo ndipo wakababa mwana mwanakazi. FUMU yikati kwa Hoseya, “Mwana uyu umuthye kuti, ‘Tinkhani’, chifukwa nditi ndiŵe na chiwuravi na ŵaIsraele chara nanga nkhuŵagowokera, na pachoko pose.

⁷Kweni ndamkuŵa na chiwuravi na ŵaYuda. Ndamkuŵathaska ndekha, ine FUMU, Chiuta wawo. Ine kuti ndamkuŵathaska pakurwa nkhondo na mauta, panji na malupanga, panji na mahachi, panji na ŵanthu ŵakukwera pa mahachi chara.”

⁸Gomere wakati wamurumura Tinkhani, wakaŵaso na nthumbo ndipo wakababa mwana mwanarume.

⁹Ndipo FUMU yikati kwa Hoseya, “Mwana uyu umuthye kuti ‘Mbanthu ŵane chara’, pakuti imwe ŵaIsraele ndimwe ŵanthu ŵane chara, ndipo ine kuti ndine Chiuta winu chara.”

¹⁰Ndipouli ŵaIsraele ŵati ŵaŵenge ŵanandi nga ndi muchenga wa mu nyanja uwo kuti ungapimika nanga nkhupendeka chara. Pa malo apo Chiuta wakayowoya na za iwo kuti, “Ndimwe ŵanthu ŵane chara,” penepaposo ŵizamkuyowoya kuti, “Ŵana ŵa Chiuta wamoyo.”

¹¹Sono ŵaYuda na ŵaIsraele ŵamkuŵa fuko limoza ndipo ŵizamkujisankhira murongozgi yumoza. Ŵizamkukhara mu charu chawo, pakuti zuŵa la Yezireyele ili lamkuŵa likuru chomene.