Read new_tumbuka_bible Hoseya 10 Bible Online

Hoseya 10 - new_tumbuka_bible bible

Hoseya 10

¹ŴaIsraele ŵali nga ndi mpheska yakutikitira, iyo yikupambika vipambi vinandi. Apo vipambi vyakhe vikaŵanga vinandi, nawo ŵakandaniska majochero ghawo. Apo charu chawo chikakuliranga munthazi, nawo ŵakatoweska vikozgo vyawo.

²Ŵanthu aŵa mbapusikizgi, sono ŵakwenera kuŵa na mrandu. FUMU yiti yibwangandulire pasi majochero ghawo, ndiposo na mizati ya mawe gha visopo vyawo.

³Ntheura sono ŵayowoyenge kuti, “Tilije karonga sono chifukwa tilije kuyichindika FUMU. Nanga karonga tiŵenge nayo, iyo mphanyi wangutichitira vichi?”

⁴Ŵakaronga ŵakuyowoya waka mazgu ghambula chandulo. Iwo ŵakupangana na kuchita virapo vya utesi. Weruzgi ŵakunyoroka wazgoka wakubendera, uwo ukumera nga ndi utheka wakukoma mu minda.

⁵Awo ŵakukhara mu Samariya ŵakutenthema, chifukwa cha mwana wa ng'ombe wa ku Beti Aveni. Ŵanthu ŵakhe ŵamkumulirira, ŵasofi ŵakhe nawo ŵamkumutengerera, chifukwa uchindami wakhe wafumamo.

⁶Chikozgo chiti chitorekere ku charu cha Asiriya, kuŵa chawanangwa kwa karonga mukuru. Efurayimu wati wakhozgeke soni, Israele wati walengeskeke, chifukwa cha ŵangoza ŵakhe.

⁷Karonga wa msumba wa Samariya wati watorekere kutali, nga ndi chiŵanduka chakuyenjama pa maji.

⁸Malo gha pachanya ghakusoperako gha Aveni, uko ŵaIsraele ŵakuchitirako uheni, ghamkubwangandulika. Minga na nthura vyamkumera pa majochero ghawo. Ŵanthu ŵamkuti ku mapiri, “Tibenekererani” ku tumapiri “Wirani pa ise.”

⁹FUMU yikuti, “Imwe ŵaIsraele, mwarutilira kwananga, kufuma apo mukanangira ku Gibeya. Ntheura muti muthereskeke pa nkhondo kwenekura ku Gibeya.

¹⁰Mu khumbiro lane nditi ndizenge kwiza kalimbana na ŵanthu awo ŵagaruka na kuŵalanga. Mafuko ghanyakhe ghamkuwungana, kuti gharwe nawo nkhondo, chifukwa cha kwananga kwawo kukuru.

¹¹Efurayimu wakaŵa nga ndi ng'ombe wakusambizgika, iyo yikatemwanga kubula tirigu, nkhareka kukaka singo yakhe yiweme. Sono Efurayimu ndimukakenge goliwoli, Yuda wakwenera kulima, ndipo Yakhobe ndiyo wamkupopota minda.

¹²Mujiseŵere urunji, kuti muvune vipasi vya chisungusungu. Popotani minda yinu, pakuti iyi ndi nyengo ya kupenjera FUMU, mwakuti yize na kurokweska pa imwe chiponosko nga ndi vura.

¹³Kweni imwe mwapanda uheni, mwavuna ubendezi, mwarya vipambi vya mautesi. Imwe mukugomezga magareta ghinu, na unandi wa vinkhara vyinu.

¹⁴Chiwawa cha nkhondo chiti chipulikikwe, mukati mu ŵanthu ŵinu, ndipo malinga ghinu ghose ghamkupankhuka, nga ndi umo Shalimani wakapankhulira Beti Aribele, pa zuŵa la nkhondo. Wakambwefulira pasi ŵanyinawo pamoza na ŵana ŵawo.

¹⁵Ntheura ndimo kuchitikirenge na imwe ŵa mu msumba wa Betele, chifukwa cha uheni winu ukuru. Para zuŵa lira laneng'enera, karonga wa Israele wizamkukomeka.”