Read new_tumbuka_bible Hoseya 11 Bible Online

Hoseya 11 - new_tumbuka_bible bible

Hoseya 11

¹FUMU yikuti, “Para Israele wakaŵa mwana, nkhamutemwa. Mwana wane nkhamuchema kufuma ku Eguputo.

²Kweni apo nkharutilira kumuchema, iyo wakarutilira kupatukako kwa ine. Ŵanthu ŵane ŵakaperekanga sembe kwa Baala, na kocha vyakununkhira ku vikozgo.

³Ndipouli ine ndine nkhamusambizga kwenda Efurayimu, ndine nkhamukoreranga mu mawoko ghane. Kweni iwo kuti ŵakamanya chara, kuti ine ndine nkhaŵapwerereranga.

⁴Nkhaŵaguzira kwa ine mu chiwuravi, na machitiro gha kutemwa. Nkhawuskapo goliwoli pa iwo, nkhakotama na kuŵaryeska.

⁵“Ŵanthu aŵa ŵati ŵawerereso ku Eguputo. Asiriya ndiyo wati waŵawusenge, chifukwa ŵakakana kuti ŵawerere kwa ine.

⁶Nkhondo yiti yizenge mu misumba yawo. Yiti yiphyore mphingirizgo za vipata, na kumarizga ivyo ŵakanozgera kuchita.

⁷Ŵanthu ŵane ŵaŵikapo mtima kuti ŵagarukire ine. Ntheura ŵimikikira goliwoli la chilango, paŵavyenge na yumoza wakuliwuskako.

⁸“Kasi ndingakusida uli, iwe Efurayimu? Kasi ndingakupereka uli, iwe Israele? Kasi ndingakuzgora uli kuŵa nga ndi Adima? Kasi ndingamanya uli kukumara nga ndi Zeboyimu? Mtima wane wakana kuchita ichi chiwuravi chane chikukura chomene.

⁹Ine kuti nditi ndimulangani na ukari wane chara, panji nesi kupankhura Efurayimu. Pakuti ine ndine Chiuta, kuti ndine munthu chara. Ine ndine Mutuŵa Yura mukati mwinu, kuti ndizenge kwiza kamumarani chara.

¹⁰“Nditi ndibangure nga ndi nkharamu, ndipo ŵanthu ŵane ŵati ŵarondezge FUMU. Nditi ndibangure nadi. Ŵanthu ŵane ŵati ŵizenge uku ŵakutenthema kufuma ku manjiliro gha dazi.

¹¹Ŵati ŵizenge uku ŵakutenthema, nga ndi tuyuni kufuma ku Eguputo, nga ndi njiŵa kufuma ku Asiriya. Ntheura nditi ndiŵawezgereso ku vikaya vyawo.” Ntheura ndimo yikuyowoyera FUMU.

¹²FUMU yikuti, “Efurayimu wandizingirizga na mautesi, ndipo mbumba ya Israele upusikizgi. Yuda nayo wandigarukira ine Chiuta, Mutuŵa Yura na wakugomezgeka.