Read new_tumbuka_bible Hoseya 12 Bible Online

Hoseya 12 - new_tumbuka_bible bible

Hoseya 12

¹Efurayimu wakuchita cha waka, na chakupasura zuŵa lose, wakwenda kandaniska utesi, na viwawa uku na uku, nga ndi mphepo ya kumafumiro gha dazi. Ŵakuchita mapangano na charu cha Asiriya, ŵakutumizga mafuta ku charu cha Eguputo.”

²FUMU yili na mrandu na ŵaYuda, yiti yimulange Yakhobe kwakuyana na nthowa zakhe, yiti yimupe njombe kwakuyana na ivyo wakuchita.

³Wachali mu nthumbo, wakakora chitende cha mukuru wakhe, ndipo mu urara wakhe, wakalimbana na Chiuta.

⁴Iyo wakalimbana na mungelo na kumuruska, ndipo wakalira na kumuromba kuti wamutumbike. Wakakumana na Chiuta ku Betele, ndipo penepara Chiuta wakayowoya nayo.

⁵Iyo wakaŵa FUMU, Chiuta Mwenenkhongono zose. FUMU ndilo zina lakhe.

⁶Ntheura imwe, pakovwirika na Chiuta, wererani, koreskani kugomezgeka na weruzgi wakunyoroka, ndipo lindizgani kwa Chiuta winu nyengo zose.

⁷FUMU yikuti, “ŴaIsraele ŵali nga ndi wa malonda, uyo wali na vyakupimira vyakupusika, mweneuyo wakutemwa kutindiŵizga ŵanthu.

⁸Efurayimu wakujikuzga, wakuti, ‘Ine ndine musambazi, ndili na vyuma vinandi. Na usambazi wane wose uwu, kuti ŵasangengepo kwananga panji uheni chara.’ ”

⁹Kweni FUMU, Chiuta winu wakuti, “Ine ndine nkhamufumiskani mu charu cha Eguputo. Nditi ndichite kuti mukhareso mu mahema, nga ndi mazuŵa gha kale ghara mu mapopa.

¹⁰Ine ndine nkhayowoya mwa nchimi, ndine nkhaŵarongoranga mboniwoni zinandinandi, ndipo nkhayowoya mu zintharika mwa iwo.”

¹¹“Ŵanthu ŵa ku Gileyadi ŵakusopa vikozgo. Nadi, vikozgo ivi vyamkuŵa vyawakawaka. Iwo ŵakuperekera ku Giligala sembe za nkhambako. Ntheura majochero ghawo ghati ghazgoke mulu wa mawe mifwerenje ya mu minda.

¹²Yakhobe wakachimbilira ku charu cha Aramu. Kwenekura wakateŵeta kuti wasange mwanakazi, wakaliskanga mberere kuti walowore mwanakazi.

¹³FUMU yikafumiska ŵaIsraele mu Eguputo, kwizira mwa nchimi, ndipo yikaŵapwererera mwa nchimi yeneiyi.

¹⁴Kweni ŵa fuko la Efurayimu ŵakayikwiyiska FUMU chomene. Ntheura FUMU yiti yiŵalange, chifukwa cha mrandu wawo wakuthiska ndopa. Ndipo vyakusunjizga vyawo yamkuviwezgera pa iwoŵene.”