Read new_tumbuka_bible Hoseya 13 Bible Online

Hoseya 13 - new_tumbuka_bible bible

Hoseya 13

¹Para Efurayimu wakayowoyanga, ŵanthu ŵakatenthemanga, wakachindikikanga chomene mu Israele. Kweni wakananga pakusopa chiuta Baala, ntheura wakafwa.

²Sono ŵakwanangiranangira, ŵakujipangira vikozgo vyakusongonora, ndiwo ŵangoza awo nkhwantha, ŵakapanga na siliva lawo, vyose mlimo wa ŵakuŵaja. Iwo ŵakuyowoya kuti, “Perekaninge sembe ku vikozgo ivi, muŵafyofyonthenge ŵana ŵa ng'ombe aŵa.”

³Ntheura ŵati ŵaŵe nga ndi nyathutwe wa ku mulenje, panji nga ndi jumi ilo likurakata mwaluŵiro, panji nga ndi mwerero uwo ukuputwa kufuma pa luwugha, panji nga ndi josi ilo likufuma pa chidangazi.

⁴FUMU yikuti, “Ine ndine FUMU, Chiuta winu, ndine nkhamufumiskani mu Eguputo. Mukwenera kumanya Chiuta munyakhe chara, kweni ine pera. Muponoski munyakhe kulije, kweni ine pera.

⁵Ine ndine nkhamupwererani mu mapopa, charu cha chinkhamwa.

⁶Nkhaŵapa chakurya ndipo ŵakakhuta, para ŵakakhuta, ŵakamba kujikuzga, pamanyuma ŵakandiruwa.

⁷Pa ichi, nditi ndiŵe nga ndi nkharamu, nga ndi nyalubwe, na kukhazga pa nthowa.

⁸Nditi ndiŵarotokere nga ndi nkharamira, iyo yapokeka ŵana ŵakhe, na kuparura mbambo zawo. Nditi ndiŵamilimitizge nga ndi nkharamu, nga ndi chikoko, nditi ndiŵaparure.”

⁹“Nditi ndimumarani, imwe ŵaIsraele, kasi ndi njani uyo wamovwiraninge?

¹⁰Kasi karonga winu sono wali nkhu, kuti wamuthaskani? Kasi ŵarongozgi ŵinu wali nkhu, kuti ŵamuvikirirani? Pa ŵeneaŵa mukayowoya kuti, ‘Mutipe karonga na nduna zakhe.’ ”

¹¹Ntheura nkhamupani ŵakaronga na mtima wakukwiya, ndipo mu ukari wane nkhaŵawuskapo.

¹²Ubendezi wa Efurayimu wasungika, kwananga kwawo kwalembeka mu buku.

¹³Efurayimu wanguŵa na mwaŵi wakuthaskika, kweni mahara walije kuti wachite ichi. Iyo wali nga mwana uyo wali pafupi kubabika, kweni wakukana kufuma mu nthumbo.

¹⁴Kasi ndiŵaponoske ku mazaza gha malo gha ŵakufwa? Kasi ndiŵawombole ku mazaza gha nyifwa? Iwe nyifwa, kasi vilengo vyako vili nkhu? Iwe dindi, kasi nkhongono yako yakukomera yili nkhu? “Ine kuti nditi ndiŵe na chiwuravi na ŵanthu aŵa chara.

¹⁵Nangauli Efurayimu wangandana, mukati mu ŵabali ŵakhe, mphepo ya ku mafumiro gha dazi, yeneiyo ndi mphepo ya FUMU, yamkwiza, yamkuputa kufuma ku mapopa. Mbwiwi za maji mu charu zamkukamuka, visimi vyamkupwa. Mphepo yamkupoka usambazi wakhe wose, uwo uli kusungika mu nyumba zawo.

¹⁶Ŵanthu ŵa mu Samariya ŵakwenera kuŵa na mrandu, chifukwa chakugarukira Chiuta wawo. Ŵanthu ŵakhe ŵamkukomeka na nkhondo, ŵabonda ŵawo ŵamkuŵatekenyulira pasi, ŵanakazi ŵawo awo ŵali na zinthumbo ŵamkuŵafulumura.”