Read new_tumbuka_bible Hoseya 14 Bible Online

Hoseya 14 - new_tumbuka_bible bible

Hoseya 14

¹Wererani kwa FUMU, Chiuta winu imwe ŵaIsraele, zakwananga zinu ndizo zamukhuŵazgani kuti muwe.

²Wererani kwa FUMU, mukayirombe kuti, “Mutigowokere zakwananga zithu zose, mutipokere mu uchizi winu, mwakuti timuchindikani na mazgu gha viwongo.

³Charu cha Asiriya kuti chingatiponoska chara, nanga tingakwera pa mahachi kuti wangatithaska chara. Ŵachiuta ngoza awo tikapanga na mawoko ghithu, kuti tiŵachemengeso ŵachiuta ŵithu chara. Pakuti kwa imwe mulanda, ndiko wakusanga chiwuravi.”

⁴FUMU yikuti, “Nditi ndiŵachizge ku kuwura kugomezgeka kwawo. Nditi ndiŵatemwe na mtima wose, pakuti ndareka kuŵakwiyira.

⁵Nditi ndiŵe nga ndi jumi ku ŵaIsraele, iwo ŵati ŵaphukirenge nga ndi maluŵa. Ŵati ŵakhazikike mu umoyo wawo, nga ndi misisi ya khuni la milanje mu Lebanoni.

⁶Viphukira vyakhe vitandazgikenge kuwaro, uchindami wakhe wamkuŵa nga ndi khuni la maolive, ndipo ŵanukhirenge nga ndi milanje ya ku Lebanoni.

⁷Ŵamkuwerera na kukhara mu mufwiri wane, ŵati ŵandane nga ndi tirigu. Ŵamkuŵala maluŵa nga ndi mpheska, sungu lawo lamkuŵa nga ndi vinyo lakufumira ku charu cha Lebanoni.

⁸Iwe Efurayimu, kasi ŵachiuta ngoza wako, ndili nawo na chandulo uli? Ine ndine nkhuzgora malurombo ghako, na kukupwererera iwe. Ine ndili nga ndi khuni lakubiriŵira la mulombwa, kwa ine ndiko ukusanga vipambi vya vitumbiko.”

⁹Yose uyo ngwa mahara, wavimanyiske vinthu ivi. Yose uyo ngwa kuchenjera, wavipulikiske vinthu ivi. Nthowa za FUMU nzakunyoroka, ndipo awo mbarunji ŵakwenda mu nthowa izi, awo mbakwananga ŵakukhuŵaramo.