Read new_tumbuka_bible Hoseya 2 Bible Online

Hoseya 2 - new_tumbuka_bible bible

Hoseya 2

¹“Uŵaphalire ŵabali ŵako kuti, ‘Ndimwe ŵanthu ŵa Chiuta,’ ndipo ŵadumbu ŵako kuti, ‘Ndimwe ŵakutemweka ŵa FUMU.’ ”

²“Mususkani nyinamwe! Mususkani pakuti ndi muwoli waneso chara, nane kuti ndineso mufumu wakhe chara. Mumususke kuti wareke uzaghali wakhe, ndiposo na uleŵe wakhe uwo wawufukatira.

³Usange wakukana ndimuvure wakhare nkhule, kuti waŵe nga ndi umo wakababikira. Ndimuzgorenge kuŵa nga mapopa, nga ndi charu cha chiparamba. Ndizamkumukoma na nyota.

⁴Ŵana ŵakhe nawo, kuti ndamkuŵa na chiwuravi na iwo chara, chifukwa mbana ŵa mu uzaghali.

⁵Asi nyinawo ndi muzaghali. Uyo wakaŵababa wakachitanga vyakukhozga soni. Iyo wakati, ‘Ndilondondezgenge ŵakutemweka ŵane, awo ŵakundipa chakurya na maji, salu za weya na za bafuta, mafuta na vinyo.’ ”

⁶“Ntheura nditi ndijarizge nthowa yakhe na minga. Nditi ndimuzingirizge na chiliŵa, kuti wareke kwendaso mu nthowa zakhe za kale.

⁷Wati wavichimbilire vibwezi vyakhe, kweni kuti wavisangenge chara. Iyo wati wavipenjerezge, kweni wavisangenge chara. Penepapo wati wayowoye kuti, ‘Nditi ndiwerere kwa mufumu wane wakudanga, pakuti nyengo yira nkhaŵa makorako kuruska sono.’ ”

⁸Iyo wakamanyanga chara kuti ndine nkhamupanga vyakurya, vinyo na mafuta. Ndine nkhamupanga siliva na golide, ivyo wakapangiranga chikozgo cha chiuta Baala.

⁹“Pa chifukwa ichi, nditi ndimupoke vyakurya pa nyengo ya kuvuna, na vinyo lane pa nyengo ya kukamira. Nditi ndimupoke salu za weya na za bafuta, izo wakavwaranga kuti wabise nkhule yakhe.

¹⁰Sono nditi ndimuvurenge, panthazi pa vibwezi vyakhe. Palije uyo wangamuthaska ku woko lane.

¹¹Nditi ndimarizge kukondwa kwakhe kose, viphikiro vyakhe vinyakhe, vya pa chiphikiro cha kuthwasa kwa mwezi, na vya maSabata, ndiposo na viphikiro vyakhe vyose vyakwimikika.

¹²Nditi ndinange mpheska zakhe na makuni gha vikuyu, agho iyo wakayowoyanga kuti, ‘Agha ndi malipiro ghane agho vibwezi vyane vili kundipa.’ Ivi ndivizgorenge kuŵa thengere, ndipo vikoko vya mu thengere vyamkuvirya.

¹³Nditi ndimulange chifukwa cha mazuŵa gha viphikiro vya ŵaBaala, apo wakocheranga vyakununkhira kwa iwo. Iyo wakajitozganga pakuvwara mphete na vitowelo, kuti warutenge ku vibwezi vyakhe, na kundiruwa ine.” Ntheura ndimo yikuyowoyera FUMU.

¹⁴“Sono mwanakazi uyu nditi ndimukopeke, ndimutorerenge ku mapopa, na kukayowoya nayo makora.

¹⁵Kwenekura ndamkumupa minda ya mpheska, na kuzgora Dambo la Akori[2] kuŵa muryango wa chigomezgo. Kwenekura ndiko wamkundizgora, nga ndi umo wakazgolera pa uwukirano wakhe, na apo wakiziranga kufuma ku charu cha Eguputo.”

¹⁶FUMU yikuti, “Mu zuŵa leneilo, wamkundichema kuti, ‘Mufumu wane’, kuti wamkundichemaso kuti, ‘Baala chiuta wane’ chara.

¹⁷Ndizamkumukanizga kuti wareke kuyowoya mazina gha ŵaBaala. Inya iwo ŵamkuzunurikaso nanga ndi zina chara.

¹⁸Pa zuŵa leneilo, ndamkuchita phangano na vikoko vya mu thengere, viyuni vya mudera na vyakukhwaŵa pasi, kuti viŵe pa wenenawene na ŵanthu ŵane. Mu charu ndamkuwuskamo mauta, malupanga, na mahomwa ghanyakhe ghose gha nkhondo. Ŵanthu ŵane ndamkuŵakharika mu kufwasa.

¹⁹Iwe Israele, ndamkukujalira kuti uŵenge muwoli wane kwa muyirayira. Inya ndamkukujalira kuti uŵe wane mu urunji na mu kunyoroka, mu chisungusungu na mu chiwuravi.

²⁰Ndamkukujalira kuti uŵenge wane mwamagomezgeko, ndipo iwe wizamkumanya kuti ine ndine FUMU.”

²¹FUMU yikuti, “Mu zuŵa leneilo ndizamkupulikira mlengalenga, ndipo mlengalenga uzamkurokweska vura pa charu.

²²Charu chamkuzgora pakupereka tirigu, vinyo na mafuta. Ivi vizamkupulikira Yezireyele.

²³Israele ndamkumupanda mu charu kuti waŵe wane, ndamkurongora kutemwa kwane kwa Tinkhani. Awo nkhaŵachemanga kuti ‘Mbanthu ŵane chara’ ndizamkuŵachema kuti, ‘Ŵanthu ŵane.’ Iwo nawo ŵizamkuyowoya kuti, ‘Ndimwe Chiuta withu.’ ”