Read new_tumbuka_bible Hoseya 4 Bible Online

Hoseya 4 - new_tumbuka_bible bible

Hoseya 4

¹Imwe ŵaIsraele, pulikani mazgu gha FUMU, pakuti yili na mazgu ghakususka ŵanthu ŵakukhara mu charu. Iyo yikuti, “Mu charu mulije kugomezgeka nanga ndi lusungu, ndipo ŵanthu kuti ŵakumumanya Chiuta chara.

²Mu charu muli kurapizga, utesi na kukoma, muli kwiba na kuchita uleŵe. Zakwananga zawo zinandi chomene, ndipo ŵakukomana pachanya pakukomana.

³Ntheura charu chiti chiŵenge chakomira, ndipo wose ŵakukharamo ŵati ŵasuzgike. Vikoko vya ku thengere navyo viti visuzgike, pamoza na viyuni vya mu mlengalenga, somba za mu nyanja nazo vizamkufwa.”

⁴FUMU yikuti, “Paŵavye munthu wakulimbana na munyakhe, panji nesi kutundura munyakhe, pakuti kususka uku, mphakati pa ine na imwe ŵasofi.

⁵Imwe mukukhuŵara muhanya na usiku, nchimi nazo zikukhuŵara pamoza namwe, ntheura nditi ndiparanye nyinamwe.”

⁶Ŵanthu ŵane ŵakuparanyika, chifukwa chakusoŵerwa mahara. Imwe ŵasofi, pakuti mwakana mahara, ine nane ndamukanani kuŵa ŵasofi ŵane. Chifukwa chakuti mwaruwa, marango gha Chiuta winu, ine nane nditi ndiruwe ŵana ŵinu.

⁷Apo ŵasofi ŵakwandana chomene, ndipo ŵakundinangira ine kwakuruska. Ntheura nditi ndizgore uchindami wawo, kuŵa wakukhozga soni.

⁸Ŵakujikhutiska pa vinthu viheni, ivyo ŵanthu ŵane ŵakuchita, mitima yawo yili pakuti ŵanthu ŵanangenge waka.

⁹Icho chichitikenge ku ŵanthu ŵane, ndicho chichitikenge kwa imwe ŵasofi. Wose nditi ndiŵalange chifukwa cha kwananga kwawo, ŵati ŵapokere njombe yakuyana na milimo yawo yiheni.

¹⁰Ŵati ŵaryenge, kweni ŵakhutenge chara, ŵati ŵachite chomene uzaghali, kweni ŵandanenge chara. Pakuti ŵali kuyireka FUMU, ŵajipereka kukuchita uzaghali.

¹¹FUMU yikuti, “Vinyo mukoroŵere panji muphya, yose wakuwuskapo mahara.

¹²Ŵanthu ŵane ŵakupenja mahara ku chikozgo cha khuni, ndipo ŵakuzgoreka na ndodo ya khuni. Mzimu wa uzaghali ndiwo ukuŵapuruska, ŵaŵa ŵambula kugomezgeka kwa Chiuta wawo.

¹³Ŵakupereka sembe pachanya pa mapiri, sembe zakocha pachanya pa tumapiri, musi mwa khuni la musoro, la mutaŵa na la mundola, chifukwa ghali na minthavi ya mufwiri uweme. Ntheura ŵana ŵinu ŵanakazi ŵakuchita uzaghali, ndipo ŵakamwana ŵinu ŵakuchita uleŵe.

¹⁴Kweni ŵana ŵinu ŵanakazi, kuti nditi ndiŵalange chifukwa chakuchita uzaghali chara. Ŵakamwana ŵinu nawo, kuti nditi ndiŵalange chifukwa chakuchita uleŵe chara, pakuti ŵanarume nawo ŵakuchita uzaghali, ndipo ŵakupereka sembe ku ŵachiuta ngoza ŵawo, pamoza na ŵanakazi ŵaleŵe. Ndi ŵanthu ŵambula mahara, awo ŵamarenge petu.

¹⁵Imwe ŵaIsraele, nangauli mukuchita uzaghali, mureke kunjizga ŵaYuda mu kwananga kwinu. Mureke kuya kasopa ku Giligala, panji ku Beti Aveni. Mureke kuyowoya kuti, ‘Nkhurapira mwa FUMU yamoyo.’ ”

¹⁶ŴaIsraele mbanonono mitima, nga ndi ngwata yanakazi. Kasi sono FUMU yingaŵaliska uli ŵaIsraele aŵa, nga ndi umo yingachitira na mwana-mberere, mu luhari lwa nyetee?

¹⁷Efurayimu waskepererana nawo ŵangoza ŵakhe, imwe murekani mu uheni wakhe.

¹⁸Para ŵamwa na kuloŵera, ŵakurutilira kuchita uzaghali. Ŵakutemwa kuchita vyakukhozga soni, kuruska kuchita ivyo vingaŵavikirira.

¹⁹Ŵati ŵayeghekere kutali na kavuruvuru, ŵati ŵakhozge soni, chifukwa cha majochero ghawo.