Read new_tumbuka_bible Hoseya 5 Bible Online

Hoseya 5 - new_tumbuka_bible bible

Hoseya 5

¹“Pulikani ichi, imwe ŵasofi! Tegherezgani, imwe ŵaIsraele. Pulikani, imwe ŵa mu nyumba ya ufumu! Weruzgi uwu uli pa imwe, pakuti mukaŵa chipingo ku Mizipa, mukaŵa ukonde pa Phiri la Taboro.

²Ŵachigaruka ŵananga na kukoma chomene, kweni nditi ndiŵalange wose.

³Nkhumanya vyose ivyo wakuchita Efurayimu, Israele kuti ngwa kubisika kwa ine chara. Efurayimu sono wazgoka muzaghali, nadi Israele wakazuzgika.”

⁴Milimo yawo yiheni yikuŵazomerezga chara, kuti ŵawerere kwa Chiuta wawo. Mzimu wakuchita uzaghali ndiwo uli mwa iwo, ndipo FUMU kuti ŵakuyimanya chara.

⁵Kujikuzga kwa ŵaIsraele, kukuŵapanikizgira iwo ŵekha, Efurayimu wakukhuŵara mu kwananga kwa iyomwene, Yuda nayo wakukhuŵara pamoza nayo.

⁶Iwo ŵakwiza na sembe za mberere na mbuzi ndiposo na za ng'ombe, kuti ŵayisope FUMU, kweni kuti ŵati ŵayisange chara, iyo yafumako kwa iwo.

⁷Ŵaŵa ŵambula kugomezgeka kwa FUMU, ndipo ŵakubaba ŵana ŵa mu uleŵe, Ntheura viphikiro vya kuthwasa kwa mwezi, viti viŵamarenge pamoza na mbewu za ku minda yawo.

⁸Lizgani lipenga mu msumba wa Gibeya, lizgani mbata mu msumba wa Rama. Bangurani kuti nkhondo yafika mu Beti Aveni, imwe ŵa fuko la Benjamini, rongozgani.

⁹Charu cha Efurayimu chizamkuŵa mayiyi, pa zuŵa la chilango, Nkhuphara ichi kuŵa unenesko, ku mafuko ghose gha Israele.

¹⁰FUMU yikuti, “Ŵarongozgi ŵa charu cha Yuda, ŵali nga ndi awo ŵakusezga mawe gha mphaka. Nditi ndipungulire ukari wane pa iwo, nga ndi maji gha chigumura.

¹¹Efurayimu wakutindiŵizgikira pasi, wakupwetekeka na weruzgi, chifukwa wakadumura kuchita vinthu vyawakawaka.

¹²Ntheura ndili nga ndi fufuzi kwa Efurayimu, ndili nga ndi chilonda chazoza pa ŵaYuda.”

¹³Efurayimu wakati wawona kuti ndi murwari, Yuda nayo vilonda vyakhe, Efurayimu wakazgokera ku charu cha Asiriya, wakatuma mazgu kwa karonga mukuru kupempha wovwiri. Kweni karonga kuti wangachizga urwari wako chara, nesi kupozga vilonda vyakhe.

¹⁴Ntheura nditi ndiŵe, nga ndi nkharamu yikari kwa Efurayimu, nga ndi nkharamu yiwukirano pakulanga ŵaYuda. Nditi ndiŵaparure tuchokotuchoko na kuŵareka, nditi ndiŵayeghere kutali, kwambula na yumoza wakuŵathaska.

¹⁵Pamanyuma nditi ndiwerere ku malo ghane, ŵasuke ŵazomere kwananga kwawo. Ŵati wandipenje ine, mu visuzgo vyawo ŵamkundipenja chomene.