Read new_tumbuka_bible Hoseya 6 Bible Online

Hoseya 6 - new_tumbuka_bible bible

Hoseya 6

¹Ŵanthu ŵakuyowoya kuti, “Tiyeni tiwerere kwa FUMU. Yatiparura, kweni yitichizgenge, yatipweteka, kweni yikakenge vilonda vyithu.

²Pamanyuma pa mazuŵa ghaŵiri, FUMU yamkutipamphuska. Pa zuŵa la chitatu yamkutiwuska, mwakuti tiŵe ŵamoyo panthazi pakhe.

³Tiyeni tiyimanye FUMU, tiyeni tilimbelimbe nadi kuti tiyimanye. Yizenge kwa ise kwambula nkhayiko, nga ndi umo ghakwizira matandakucha. Yizenge kwa ise nga ndi vura yakuwazga nga ndi vura ya chifuku iyo yikuzumbwiska charu.”

⁴Kweni FUMU yikuti, “Kasi ndichitechi nawe, we Efurayimu? Kasi ndichitechi nawe, we Yuda? Kugomezgeka kwinu kuli nga ndi nyankhuŵinda, nga ndi jumi ilo likurakata mwa luŵiroluŵiro.

⁵Ndicho chifukwa ndamudumulani nga ndi nkhuni, na mazgu gha nchimi. Ndamukomani na mazgu ghane. Weruzgi wane ngwa pakweru nga ndi ungweru wa leza.

⁶Pakuti ine nkhukhumba chisungusungu, sembe chara. Nkhukhumba kuti ŵanthu ŵandimanye ine Chiuta, kuruska kupereka sembe zakocha mburuma.”

⁷“Iwo ŵali kuswa phangano lane, nga ndi umo wakachitira Adamu. Ntheura ŵali kuŵa ŵambula kugomezgeka kwa ine.

⁸Gileyadi ndi msumba wa awo ŵakuchita uheni, ngwa kunangika na ndopa za ŵanthu.

⁹Nga ndi umo ŵankhungu ŵakukhazgira munthu, ndimo ŵasofi nawo wakuwunganirana pamoza. Iwo ŵakukoma ŵanthu pa nthowa yakuya ku Shekemu. Nadidi, ŵakuchita viheni vinandi.

¹⁰Ine ndawona chinthu chakuseruska, mu nyumba ya ŵaIsraele. Efurayimu wajipereka kuti wachitenge uzaghali, Israele wajikazuzga pakusopa vikozgo.

¹¹Imwe namwe ŵa charu cha Yuda, nyengo ya kuvunira chilango chinu yikwiza, para ndamkuwezgeraso mauweme ku ŵanthu ŵane.”