Read new_tumbuka_bible Hoseya 7 Bible Online

Hoseya 7 - new_tumbuka_bible bible

Hoseya 7

¹“Para nkhukhumba kuchizga ŵaIsraele, kwananga kwa Efurayimu kukuŵa pakweru, milimo yiheni ya ŵaSamariya yikuvumbukwa. Iwo ŵakuchitira vinthu mu upusikizgi, ŵakuphyora nyumba na kwiba, ndi vigeŵenga, vikupoka vinthu mu misewu.

²Kweni iwo ŵakughanaghanapo chara, kuti nkhuyikumbukira milimo yawo yiheni yose. Zakwananga zawo zaŵazingirizga, ndipo zili panthazi pane.”

³FUMU yikuti, “Ŵanthu ŵakukondweska karonga na uheni wawo, ŵakukondweska nduna na uryarya wawo.

⁴Wose mbambula kugomezgeka. Ŵali nga ndi uvuni wa moto, uwo uyo wakuphika kuti wakusonkhezga chara, kufuma pa nyengo ya kukonkhera nthimphwa, mpaka yitukumuke.

⁵Pa zuŵa la chiphikiro cha karonga, nduna zakhe zikaloŵera na vinyo. Karonga nayo wakunjirapo pa machitiro gha ŵanthu ŵawakawaka.

⁶Mitima yawo yikocha nga ndi uvuni na uchigaruka wawo. Ukari wawo ukunyeka usiku wose, ukubuka nga ndi dimi la moto na mulenje.

⁷Wose ŵakuŵa ŵakocha nga ndi uvuni, ŵakukoma awo ŵakuŵawusa. Ŵakaronga ŵawo wose ŵali kukomeka, palije na yumoza uyo wakuromba wovwiri kwa ine.”

⁸FUMU yikuti, “ŴaEfurayimu ŵasazgikana na ŵamitundu, ŵali nga ndi chingwa chipapati icho chaphya ku lwande pera.

⁹Ŵalendo ŵakuŵamara nkhongono, iwo kuti ŵakumanyako chara. Ŵayamba kumera mbuha iwo kuti ŵakumanyako chara.

¹⁰ŴaIsraele kujikuzga kwawo kukuŵasuska ŵekha. Ndipouli, iwo ŵakuwerera kwa ine FUMU, Chiuta wawo chara, nanga nkhundipenja.”

¹¹“ŴaEfurayimu wali nga ndi nkhunda, iyo njakupusa na yambula mahara. Iwo ŵakuchemerezga ku ŵaEguputo, kweni ŵakuruta ku kapenja wovwiri ku ŵaAsiriya.

¹²Para ŵakuruta, nditi nditandazge ukonde wane na kuŵakora. Nditi ndiŵawiskire pasi nga ndi viyuni vya mudera, na kuŵalanga chifukwa cha zakwananga zawo.

¹³Soka kwa iwo, chifukwa ŵandireka ine. Pharaniko yiŵe pa iwo, pakuti ŵandigarukira ine. Nkhukhumba kuŵawombola, kweni ŵakuyowoya mautesi na vya ine.

¹⁴Iwo kuti ŵakuromba kwa ine na mtima wose chara, ŵakulira uku ŵagona pa vitara vyawo. Ŵakujichekacheka chifukwa cha vyakurya na vinyo, ndipouli ŵakundigarukira.

¹⁵Ŵanthu aŵa nkhaŵasambizga na kuŵakhwimiska, ndipouli ŵakundichitira chiŵembu.

¹⁶Iwo ŵakuzgokera kwa chiuta wawakawaka, kwa Chiuta Chikurukuru chara, ŵali nga ndi uta uwo ngwa kubendera. Ŵarongozgi ŵawo ŵati ŵafwenge na lupanga, chifukwa cha mayowoyero ghawo gha mutafu. Ntheura ŵati ŵasekeke mu charu cha Eguputo.”