Read new_tumbuka_bible Hoseya 8 Bible Online

Hoseya 8 - new_tumbuka_bible bible

Hoseya 8

¹FUMU yikuti, “Lizgani mbata! Ŵarwani ŵakusenderera pa ŵanthu ŵa FUMU, nga ndi khuŵi pachanya pa nyama. Ŵanthu ŵane ŵaswa phangano lane, na kunangira marango ghane.

²ŴaIsraele ŵakulira kwa ine ŵakuti, ‘Ise tikumumanyani imwe Chiuta withu.’

³Kweni ŵaIsraele ŵakukana icho nchiweme, ŵarwani ŵawo ŵati ŵaŵarondezgenge kosekose.

⁴Iwo ŵakwimika ŵakaronga kwambula ine kumanya, ŵakusora nduna kwambula kuti ine ndazomera. Ŵakupanga vikozgo kufuma ku siliva na golide lawo, vikozgo ivyo viti viŵatorere ku pharaniko.

⁵Imwe ŵa mu Samariya, ndanyanyara nayo wa mwana wa ng'ombe winu, uyo ndi chiuta ngoza winu. Ndakwiya chomene chifukwa cha imwe. Kasi muŵenge ŵambula kusintha mpaka pauli, kuti muŵe ŵakutozgeka?

⁶Nkhwantha ndiyo yikanozga ngoza uyu, ntheura iyo kuti ndi Chiuta chara. Mwana wa ng'ombe uyu wa Samariya, wati wateketeke tuchokotuchoko.

⁷“ŴaIsraele ŵakupanda mphepo, ndipo ŵati ŵavunenge kavuruvuru. Tirigu wawo walije mphonje, wati wapambikenge chara. Waŵenge kuti wangapambika, ŵalendo mphanyi ŵarya.

⁸Imwe ŵaIsraele mwamilimitizgika, sono muli mukati mu ŵamitundu muli nga ndi chiŵiya chambula nchito.

⁹Mwachimbilira ku charu cha Asiriya, nga ndi boli uyo ndi jendayekha. Efurayimu wapereka ndarama, kuti waŵe na ŵakumutemwa.

¹⁰Nangauli ŵakupereka ndarama kuti ŵamitundu ŵaŵawovwire, kweni ndamkuŵawunganya pamoza sonosono. Ndipo kwa kanyengo kachoko waka ŵamkusuzgika chomene, chifukwa cha kuwusa kwa ŵakaronga na nduna za ku Asiriya.

¹¹“Efurayimu wakandaniska majochero, ghakuphepiskirapo zakwananga zakhe. Kweni majochero agha ghazgoka malo ghakwanangirapo.

¹²Ine nkhaŵalembera marango ghanandi chomene, kweni kuti ŵakagharondezga chara, ŵakaghapima kuŵa gha chilendo chomene.

¹³Ŵakupereka sembe kwa ine, ndipouli ŵakurya nyama yakhe, kweni FUMU kuti yikukondwa nawo chara. Sono yiti yikumbuke uheni wawo, na kuŵalanga chifukwa cha zakwananga zawo. Nadi ŵati ŵawerereso ku uzga ku charu cha Eguputo.

¹⁴“Israele waruwa Mlengi wakhe, ndipo wamba kujizengera nyumba za ufumu, Yuda nayo wajizengera misumba yinandi ya malinga. Kweni ine nditi ndiŵatumire moto pa misumba yawo, uwo uti uwoche malinga ghawo.”