Read new_tumbuka_bible Hoseya 9 Bible Online

Hoseya 9 - new_tumbuka_bible bible

Hoseya 9

¹Imwe mwa ŵaIsraele, mureke kusekerera. Mureke kujikuzga nga ndi ŵamitundu. Imwe muli kureka kugomezgeka kwa Chiuta winu, nga ndi umo wakuchitira mwanakazi muhule. Mukutemwa njombe ya mu uzaghali, na mose mu maluwugha.

²Tirigu na mpheska kuti vimukwanireninge chara, vinyo wakuti mumwe nayo wamkumusoŵani.

³Imwe kuti mwamkukhalira mu charu cha FUMU chara. Mwa ŵaEfurayimu mwakuwerera ku umikori ku Eguputo, mwamkuryanga chakurya chaukazuzi cha ku Asiriya.

⁴Kwenekura kuti ŵamkuperekaso chara, sembe ya vinyo kwa FUMU. Ŵamkuyikondweska FUMU na sembe zawo chara. Chakurya chawo chamkuŵa nga ncha pa nyifwa, wose awo ŵamkuryako ŵamkukazuzgika. Chakurya chira chamkuŵa chakuryera njara pera, kuti chamkuperekeka ku Nyumba ya Chiuta chara.

⁵Kasi ŵanthu aŵa ŵizamkuchitachi pa zuŵa la viphikiro, pa zuŵa la kuchindikira FUMU?

⁶Usange ŵizamkuchimbira pa nyengo ya chilango chawo, ŵaEguputo ndiwo ŵizamkuŵawunganya, ŵanthu ŵa mu Memufisi, ndiwo ŵamkuŵasunga mu dindi. Ku migodi yawo ya siliva kwamkumera nkhunga, ndipo minga nayo yamkumera mu zinyumba zawo.

⁷Mazuŵa gha chilango ghafika, mazuŵa gha kuwezgera nduzga ghakwana. Penepapo ŵaIsraele ŵati ŵamanye ichi. Nchimi yikupimika kuti njakupusa, uyo wakhuŵirizgika na mzimu ŵakuti ngwa kufuntha. Ŵakuyowoya ntheura chifukwa zakwananga zawo nzinandi, tinkho lawo nalo ndikuru chomene.

⁸Nchimi ndiyo yakuchenjezga ŵaEfurayimu, ŵanthu ŵa Chiuta wane. Kweni ŵamuthyera vipingo mu nthowa zakhe zose, ndipo tinkho liri mu Nyumba ya Chiuta wakhe.

⁹Ŵanthu ŵajinangiska chomene, nga ndi umo vikachitikira ku Gibeya.[3] Chiuta wati waruwenge uheni wawo chara, wati waŵalange chifukwa cha zakwananga zawo.

¹⁰FUMU yikuti, “Israele nkhamusanga nga ndi mpheska ya mu mapopa. Ŵawiskekuru nkhaŵasekerera, nga vipambi vya vikuyu vyakudanga kuphya. Kweni ŵakati ŵiza ku Baala wa ku Peyoro, ŵakajipereka kwa chiuta Baala. Penepapo ŵakajizgora kuŵa ŵakazuzi, nga ndi chikozgo chira icho wakachitemwa chomene.

¹¹Uchindami wa Efurayimu, uti uwuruke nga nkhayuni, Iwo kuti ŵamkubabaso chara, Ŵawoli ŵawo ŵamkuzuwuka chara nesi kuŵa na nthumbo.

¹²Nanga ŵalere ŵana ŵawo, ndamkuŵaparanya, kusuke kuŵavye na yumoza wakukharako. Soka ku ŵanthu aŵa, para ine nkhuwukako kwa iwo.”

¹³Umo nkhuwonera, ŵana ŵaEfurayimu ŵapimikira ku kukomeka. ŴaEfurayimu ŵarongozgenge ŵana ŵawo kuya kakomeka.

¹⁴Muŵape, Mwe FUMU, kweni kasi muŵapenge vichi? Muŵape nthumbo izo zikutaya mphapu, na maŵere ghakomira.

¹⁵FUMU yikuti, “ŴaIsraele Uheni wawo ukawoneka ku Giligala. Ntheura nkhamba kuŵatinkha kwenekura. Nditi ndiŵachimbizge mu nyumba yane, chifukwa cha machitiro ghawo ghaheni. Ndiŵatemwengeso chara, ŵarongozgi ŵawo wose ŵandigarukira.

¹⁶Efurayimu wali nga ndi khuni lakudumuka, leneilo misisi yakhe yomira, kuti lingapambikaso vipambi chara. Nanga iwo ŵangababa ŵana, nditi ndiŵakome ŵana ŵawo ŵakutemweka.”

¹⁷Chiuta wane wati waŵataye kuwaro ŵaIsraele, chifukwa ŵalije kumupulikira iyo. Ŵamkuŵa ŵanthu ŵakuyingayinga mukati mu ŵamitundu.