Read new_tumbuka_bible Yoyele 1 Bible Online

Yoyele 1 - new_tumbuka_bible bible

Yoyele 1

¹Mazgu gha FUMU ghakiza kwa Yoyele mwana wa Petuwele ghakati,

²“Pulikani ichi, imwe mwa ŵarara, Pulikizgani, mose imwe mukukhara mu charu! Kasi chinthu cha ntheura chili kuchitikapo mu mazuŵa ghinu, panji mu mazuŵa gha ŵawiskemwekuru?

³Ŵaphalirani ŵana winu za chithu ichi, ndipo ŵana winu nawo ŵaphalire ŵana ŵawo, ndipo ŵana ŵawo ŵaphalireso muwiro unyakhe.

⁴Icho chikarekeka na kapuchi charyeka na zombe, icho chikarekeka na chibungu charyeka na zombe icho chikarekeka na chibungu chaliwa na zombe.

⁵Wukani, imwe ŵaloŵevu, lirani. Tengerani, imwe mukumwa vinyo, chifukwa vinyo liphya, lawuskikako ku milomo yinu.

⁶Fuko linyakhe liza kwiza kimikana na charu chane. Iwo mbanthu ŵankhongono na ŵambula mapendeko. Mino ghawo ngakuthwa nga gha nkharamu yanarume, vibwanyu vyawo nga vya nkharamu yanakazi.

⁷Wananga mpheska zane, waphajula vikuyu vyane. Waparanya mpheska zane, wakomora nkhanira vikwa vyakhe na kuvitaya pasi, minthavi yakhe yati waka tuu.

⁸Imwe mwa ŵanthu tengerani nga ndi mwali uyo wavwara chigudulu, mweneuyo wakutengera chifukwa cha nyifwa ya munyamata uyo wati watengwengeko.

⁹Sembe ya ufu na sembe ya vyakumwa kuti vikuperekekaso chara mu Nyumba ya Chiuta. Ŵasofi ŵakutengera, ŵateŵeti ŵa FUMU ŵara.

¹⁰Minda yasakazika, charu chikutengera. Chifukwa vyakurya vyanangika, vinyo kulije, mafuta nagho ghazgeŵa.

¹¹Thikani lusoko, imwe mwa ŵalimi, tengerani, mwa ŵalimi ŵa mpheska. Tengerani chifukwa cha tirigu na nyauti, pakuti vuna ya mu minda yanangika.

¹²Mpheska zomira, makuni gha vikuyu nagho ghakufota. Magalagadeya, mikama na mararanje, na makuni ghose mu minda ghafota. Ntheura kukondwa kose kwa ŵanthu kwamara.

¹³Imwe mwa ŵasofi, vwarani vigudulu na kutengera, namwe mwa ŵateŵeti ŵa pa jochero, lirani. Tiyeni, dikani vigudulu usiku wose, imwe ŵateŵeti ŵa Chiuta wane. Chifukwa sembe za ufu na za vyakumwa zikuchitikaso chara mu Nyumba ya Chiuta winu.

¹⁴Patuliskani zuŵa la kuziŵizga kurya, chemani ungano wakupatulika. Wunganyani ŵarara na wose awo ŵakukhara mu charu. Iwo ŵarute ku Nyumba ya FUMU, Chiuta winu, na kulira kwa FUMU.

¹⁵Zuŵa la FUMU laneng'enera, mu zuŵa leneilo pharaniko lamkwiza kufuma ku Mwenenkhongono zose. Zuŵa ilo lamkuŵa lakofya chomene.

¹⁶Asi vyakurya vyamara, uku ise tikuwona? Asi chimwemwe na kukondwa vyafumamo mu Nyumba ya Chiuta withu?

¹⁷Mbuto zikuvunda pasi pa dongo lomizo, nyumba zakuŵikamo vyakurya zili mwazi. Nthamba zabwanganduka, chifukwa vuna yatondeka.

¹⁸Nako nkhutampha kwa vyakuŵeta! Miskambo ya ng'ombe yazingiziwa chifukwa maluhari kulije. Miskambo ya mberere na mbuzi nayo yasuzgika.

¹⁹“Nkhulirira kwa imwe, Mwe FUMU, chifukwa moto wamyangura maluhari gha mu mapopa, dimi la moto lawocha makuni ghose gha mu minda.

²⁰Nanga ndi vinyama vya mu thengere vikulirira kwa imwe, chifukwa tumironga twakamuka, ndipo moto wamyangura maluhari gha mu mapopa.”