Read new_tumbuka_bible Yoyele 2 Bible Online

Yoyele 2 - new_tumbuka_bible bible

Yoyele 2

¹Lizgani mbata mu Ziyoni! Ŵasokani awo ŵakhara mu phiri lane lakupatulika. Wose awo ŵakukhara mu charu ŵatentheme, pakuti zuŵa la FUMU likwiza, liri pafupi.

²Ili ndi zuŵa la chisi na la mdima, zuŵa la maŵingu na munkhorwe wakofya! Mtundu wa ŵanthu ŵakuru na ŵankhongono wabenekerera mapiri nga ndi chisi. Mtundu nga ndi uwu undaŵeko kufuma papo kale, nesi kuti uzakaŵeko pamanyuma pawo mu virimika vya miwiro yose.

³Panthazi pawo moto ukumyangura, pamanyuma pawo dimi la moto likulilima. Panthazi, charu chili nga ndi munda wa Edeni, kweni kunyuma ndi mapopa gha mayiyi. Palije icho chingaphokwa pa maso pawo.

⁴Mawonekero ghawo ghali nga gha mahachi, ŵakuchimbira nga mahachi gha nkhondo.

⁵Ŵakudukaduka pachanya pa mapiri nga kamphomezi ka magareta. Ŵakupulikikwa nga ndi kuphwaraphwatika kwa moto pa kocha viswaswa. Ŵali nga ndi ŵasilikari ŵankhongono awo ŵanozgekera kurwa nkhondo.

⁶Ŵamitundu ŵakutenthema panthazi pawo, visko vyose vikuwa nkhumbi.

⁷Ŵakurotoka nga ndi awo ŵakurwa nkhondo, ŵakukwera malinga nga ŵasilikari. Waliyose wakwenda pa mzere wakhe kwambula kusezgekamo mu nthowa yakhe.

⁸Iwo ŵakubwanyana chara, waliyose wakwenda mu nthowa yakhe. Ŵakusorota pakati pa mahomwa, ndipouli kuti ŵakujandizgika chara.

⁹Ŵakudukira pa msumba, na kuchimbira pachanya pa malinga. Ŵakunjira mu zinyumba, ŵakunjirira mu vidangazi nga mbankhungu.

¹⁰Charu chikuyaghayika panthazi pawo, mtambo nawo ukutenthema. Dazi na mwezi vyati waka bii, nyenyezi zareka na kuŵala wuwo.

¹¹Mazgu gha FUMU ghadudumira pakulangula ŵasilikari ŵakhe, Wumba wa ŵasilikari ŵakhe ngukuru chomene, uyo wakufiska mazgu ghakhe ngwa nkhongono. Zuŵa la FUMU ndikuru na lakofya. Ndi njani wangamanya kuchintha.

¹²Ndipouli FUMU yikuti, “Nanga ndi sono wererani kwa ine na mtima winu wose, uku mukuziŵizga kurya na kulira ndiposo na kutengera.

¹³Parurani mitima yinu, vyakuvwara vyinu chara.” Wererani kwa FUMU, Chiuta winu, chifukwa ngwa uchizi na wa chiwuravi. Ngwakuziwurika kukaripa na wakuzura na chisungusungu, ndipo wakugowoka kureka kupereka chilango.

¹⁴Ndi njani wangamanya, panji wangang'anamuka na kugowoka, na kusida vitumbiko kunyuma zakhe, ivyo ndi sembe ya vyakurya na ya vyakumwa, vyakupereka kwa FUMU, Chiuta winu?

¹⁵Lizgani mbata mu Ziyoni. Patuliskani zuŵa la kuziŵizga kurya. Chemani ungano wakupatulika.

¹⁶Wunganyani ŵanthu, patuliskani mpingo. Wunganyani ŵarara, wunjikani ŵana na ŵabonda wuwo. Mwene-nthengwa wafume mu chipinda chakhe, mutengwa nayo wafume mu kachipinda kakhe.

¹⁷Ŵasofi, awo mbateŵeti ŵa FUMU, ŵalirenge, pakati pa khonde na jochero. Iwo ŵayowoyenge kuti, “Mwe FUMU muŵe na chiwuravi na ŵanthu ŵinu. Mureke kuzgora chiharo chinu kuŵa chisunjizgo, na chimuhoyere mukati mu ŵamitundu. Chifukwa uli ŵamitundu ŵafumbenge kuti, ‘Kasi Chiuta wawo walinkhu?’ ”

¹⁸Penepapo FUMU yikaŵa na sanje na charu chakhe, ndipo yikaŵa na chiwuravi na ŵanthu ŵakhe.

¹⁹FUMU yikati kwa iwo, “Wonani, ndimutumiraninge tirigu, vinyo, na mafuta, ndipo mukhutenge. Ndizomerezgenge chara kuti mafuko ghanyakhe ghamusunjizganiso.”

²⁰“Ndamkufumyako ŵarwani ŵa ku mpoto kuti ŵaŵe kutali na imwe, na kuŵachimbizgira ku charu chomizo na cha mapopa. Awo ŵali kunthazi ndamkuŵachimbizgira ku nyanja ya ku mafumiro gha dazi, awo ŵali kunyuma ndamkuŵachimbizgira ku nyanja ya ku manjiliro gha dazi. Vitanda vyawo vyamkufumiska sungu liheni, pakuti FUMU yachita vinthu vikuru.”

²¹“Iwe charu, ungopanga chara, kondwera na kusekerera, chifukwa FUMU yachita vinthu vikuru!

²²Imwe vinyama vya mu thengere, mungopanga chara, pakuti maluhari gha ku mapopa ghasundaso. Makuni ghakupasaso vipambi vyawo, vikuyu na mpheska vikupambikaso makora.

²³Imwe ŵana ŵa Ziyoni, kondwerani, na kusekerera mu FUMU, Chiuta winu. Yamupani vura mwaluŵiro kurongora urunji winu. Yamurokweskerani vura yinandi vura yakwambilira na ya umaliro, nga mpha kudanga.

²⁴Maluwugha ghamkuzura na tirigu, viŵiya vyakusungiramo vinyo na mafuta vyamkufuruka.

²⁵Ndiwezgerengeposo virimika ivyo vyakurya vikanangika na zombe, wakuduka, wakuparanya, na wakudumula, nkhondo yane iyo yikalimbana namwe.”

²⁶“Mwamkurya vyakuzara na kukhuta, ndipo mwamkurumba zina la FUMU, Chiuta winu, uyo wamuchitirani vyakuzizwiska. Ndipo ŵanthu wane ŵakhozgekengeso soni kwa muyirayira chara.

²⁷Muti mumanye kuti Ine ndili mukati mwa Israele, na kuti Ine, FUMU, ndine Chiuta winu kulijeso munyakhe. Ŵanthu ŵane ŵakhozgekengeso soni kwa muyirayira chara.

²⁸Ndipo pamanyuma, ndamkupungulira Mzimu wane pa ŵanthu wose. Ŵana ŵinu ŵanarume na ŵanakazi ŵamkuchima. Ŵarara ŵinu ŵamkulota maloto, ndipo ŵanyamata ŵinu ŵamkuwona mboniwoni.

²⁹Nanga mpha ŵateŵeti ŵinu ŵanakazi na ŵanarume ndipungulirenge Mzimu wane.”

³⁰“Ndipo ndirongorenge minthondwe kuchanya na pano pasi, ndopa na moto, na mizati ya josi.

³¹Dazi lizgoke mdima, ndipo mwezi uzgoke ndopa, pambere lindize zuŵa la FUMU likuru na lakofya.

³²Ndipo kwamkuti, uyo yose wamkuchema pa zina la FUMU wamkuthaskika pakuti mu Phiri la Ziyoni na mu Yerusalemu ndimo ŵamkuŵa awo mba kuthaskika, nga ndi umo FUMU yanenera, ndipo mukati mwa awo ŵakuphokwa mwamkuŵamo ŵeneawo FUMU yikuŵachema.”