Read new_tumbuka_bible Amosi 1 Bible Online

Amosi 1 - new_tumbuka_bible bible

Amosi 1

¹Agha ndi mazgu gha Amosi uyo wakaŵa yumoza wa ŵaliska ŵa mberere ku Tekowa agho wakapokera kwizira mu mboniwoni. Ghakuphara na vya ŵaIsraele virimika viŵiri pambere chindindindi chindize. Apa pakaŵa pa nyengo iyo Uziya wakaŵa karonga wa charu cha Yuda, ndiposo na apo Yerobowamu, mwana wa Yowashi, wakaŵa karonga wa charu cha Israele.

²Amosi wakati, “FUMU yikubangura ku Ziyoni, mazgu ghakhe ghakududumira kufumira ku Yerusalemu. Ndicho chifukwa maluhari ghakomira ndipo utheka pa Phiri la Karimele ukufota.”

³FUMU yikuti, “Chifukwa cha zakwananga zinandinandi za ŵanthu ŵa ku Damaseko ine kuti ndirekenge chara kuŵalanga. Iwo ŵakuyuzga ŵanthu ŵa ku Gileyadi pakuŵatimba na chisulo.

⁴Ntheura nditi nditume moto pa mbumba ya Hazayele, ndipo wamkocha malinga gha Beni Hadadi.

⁵Ndamkuphyora mphingirizgo za Damaseko, ndizamkumara petu awo ŵakukhara mu Dambo la Aveni ndiposo na uyo wakuwusa ku Beti Edeni. ŴaSiriya ŵamkuyorekera ku umikori kuruta ku charu cha Kiri.” Ntheura ndimo yikuyowoyera FUMU.

⁶FUMU yikuti, “Chifukwa cha zakwananga zinandinandi za ŵanthu ŵa ku Gaza ine kuti ndirekenge chara kuŵalanga. Iwo ŵakayorera ku umikori mtundu wa msuma wa ŵanthu, na kuwupereka ku charu cha Edomu.

⁷Ntheura nditi nditume moto pa viliŵa vya msumba wa Gaza, ndipo wamkocha malinga ghakhe.

⁸Ndizamkumara petu awo ŵakukhara mu msumba wa Ashidodi ndiposo na uyo wakuwusa mu msumba wa Ashikeloni. Ndamkuwulanga msumba wa Ekuroni, ndipo ŵaFilisiti awo ŵakakharako ŵamkumara petu.” Ntheura ndimo FUMU Chiuta wakuyowoyera.

⁹FUMU yikuti, “Chifukwa cha zakwananga zinandinandi za ŵanthu ŵa ku Ture, ine kuti ndirekenge chara kuŵalanga. Iwo ŵakutorera mtundu wa msuma wa ŵanthu ku umikori ku charu cha Edomu, kwambula kusungilira phangano la ubali wawo.

¹⁰Ntheura nditi nditume moto pa viliŵa vya msumba wa Ture, ndipo wamkocha malinga ghakhe.”

¹¹FUMU yikuti, “Chifukwa cha zakwananga zinandinandi za ŵanthu ŵa ku Edomu ine kuti ndirekenge chara kuŵalanga. Iwo ŵakaŵachimbizga ŵabali uku ŵakorera lupanga, na kureka kuŵa na chiwuravi na iwo. Nyengo zose mitima yawo yikatukutwa na ukari ndipo ŵakakwiya kwambula kugowoka.

¹²Ntheura nditi nditume moto pa msumba wa Temani, ndipo wamkocha malinga gha ku Bozira.”

¹³FUMU yikuti, “Chifukwa cha majuvyo gha ŵaAmoni agho ghakukulirakulira ndipo chifukwa cha zakwananga zawo zinandinandi, nditi ndirekenge chara kuŵalanga. Iwo pakukhumba kukuzga charu chawo, ŵakafulumura ŵanakazi ŵa zinthumbo mu charu cha Gileyadi.

¹⁴Ntheura ndamkupemba moto pa viliŵa vya msumba wa Raba, ndipo wizamkocha malinga ghakhe. Na kupoma kukuru pa zuŵa lira la nkhondo, ŵarwani ŵizamkurwa na ukari nga ndi chimphupuru icho chiza na kavuruvuru.

¹⁵Karonga wawo wamkutorekera ku umikori, iyo pamoza na nduna zakhe.” Ntheura ndimo yikuyowoyera FUMU.