Read new_tumbuka_bible Amosi 2 Bible Online

Amosi 2 - new_tumbuka_bible bible

Amosi 2

¹FUMU yikuti, “Chifukwa cha zakwananga zinandinandi za ŵanthu ŵa ku Mowabu, ine kuti ndirekenge kuŵalanga chara. Iwo ŵakocha viwangwa vya Karonga wa ku Edomu mpaka vikazgoka vyoto.

²Ntheura nditi nditume moto pa charu cha Mowabu ndipo wamkocha malinga gha msumba wa Keriyoti. ŴaMowabu wamkufwira mukati mu mphomo ya nkhondo, mukati mu chiwawa na kulizga zimbata.

³Uyo wakuŵawusa ndizamkumukomera mu msumba, nduna zakhe zose ndamkuzikoma pamoza nayo.” Ntheura ndimo yikuyowoyera FUMU.

⁴FUMU yikuti, “Chifukwa cha zakwananga zinandinandi za ŵaYuda, ine kuti ndirekenge kuŵalanga chara. Iwo ŵaghapata marango gha FUMU, ŵalije kusunga malangulo ghane. Ŵachiuta ŵa utesi awo ŵawiskewokuru ŵakasopanga ndiwo ŵaŵapuruska.

⁵Ntheura nditi nditume moto pa charu cha Yuda, ndipo wamkocha malinga gha Yerusalemu.”

⁶FUMU yikuti, “Chifukwa cha zakwananga zinandinandi za ŵaIsraele, ine kuti ndirekenge kuŵalanga chara. Iwo ŵakuguliska ŵarunji na siliva, ndipo ŵakavu pa mtengo wa skapato ziŵiri.

⁷Iwo ŵakukandirizgira ŵakavu mu fuvu, na kukanchizgira mu mphepete mwa nthowa awo ŵakusuzgika. Mwana na wiske ŵakwendezgana na mwali yumoza, mwakuti ŵakukazuzga zina lane lituŵa.

⁸Ŵanthu aŵa ŵakujigoneka waka pafupi na jochero lirilose, pa vyakuvwara ivyo ŵakapoka nga nchikhole. Mu Nyumba ya Chiuta wawo ndimo ŵa ku mwera vinyo leneilo ŵanthu ŵakalipira pa mrandu.

⁹“Ndipouli ine ndine nkhaparanya ŵaAmori apo ŵaIsraele wakiziranga, nangauli ŵaAmori ŵakaŵa ŵataliŵatali nga ndi makumi gha milanje. Iwo ŵakaŵa ŵankhongono nga ndi makuni gha misoro. Nkhaparanya vipambi vyawo muchanya ndiposo na misisi yawo kusi.

¹⁰Imwe ŵaIsraele, ine ndine nkhamufumiskani mu Eguputo, ndine nkhamurongozgani mu mapopa virimika 40, kuti mutore charu cha ŵaAmori kuŵa chinu.

¹¹Ndine nkhasankha ŵanji mu ŵana ŵinu, kuti ŵaŵe nchimi. Nkhasankhaso ŵanji mu ŵanyamata ŵinu, kuti ŵaŵe ŵaNaziri. Imwe ŵaIsraele, kasi ndi ntheura chara?” Ntheura ndimo yikuyowoyera FUMU.

¹²Kweni imwe mukaŵamweska vinyo ŵaNaziri ŵara, ndipo mukalangula nchimi kuti, “Mungachimanga chara!”

¹³“Wonani, ndizamkumunyekezgerani pasi mu malo ghinu, nga gareta ilo lanyekezgekera pasi na mphundwe.

¹⁴Chiponosko chamkuzgeŵa uyo ngwa luŵiro. Uyo ngwa nkhongono wizamkuŵavye nkhongono, chinkhara chizamkujithaska chara.

¹⁵Uyo ndi nkhwantha pakulasa na uta, wamkuchintha chara. Uyo ndi mupusu pakuchimbira wamkuthaska umoyo wakhe chara. Uyo wakukwera pa hachi nayoso wamkuthaska umoyo wakhe chara.

¹⁶Uyo ngwa kukhwima mtima mukati mu vinkhara, wamkuchimbira wali nkhule mu zuŵa leneilo.” Ntheura ndimo yikuyowoyera FUMU.