Read new_tumbuka_bible Amosi 4 Bible Online

Amosi 4 - new_tumbuka_bible bible

Amosi 4

¹Pulikani mazgu agha, imwe ŵanakazi ŵakututuŵa nga ndi ng'ombe za ku Bashani, mwaŵeneimwe mukukhara ku Phiri laSamariya. Imwe mukuyuzga ŵakavu, mukutindiŵizgira pasi ŵasokwano, na kuyowoya ku ŵafumu ŵinu kuti, “Tipani vyakumwa timwenge!”

²Fumu Chiuta, mu utuŵa wakhe warapa kuti, “Mazuŵa ghakwiza ghakumulangirani, apo ŵarwani ŵizamkumukoloworani na mbeja. Inya ŵizamkumukoloworani na zimbeja za somba, mpaka pa wa umaliro.

³Mwizamkufumira mu vidangazi vya malinga, waliyose pa chidangazi icho warazgapo, na kuponyeka pa Phiri la Harimoni.” Ntheura ndimo yikuyowoyera FUMU.

⁴“Zaninge ku Betele na kuchitirako uheni winu. Zaniso ku Giligala na kurutilira kwananga. Zani nazo sembe zinu mulenje uliwose na vyakhumi vyinu pa mazuŵa ghatatu ghali ghose.

⁵Perekani sembe ya chingwa cha chirungo kuti muwonge Chiuta. Yowoyani na kupharazga pakweru ivyo mwapereka mu wanangwa, pakuti ndicho mukutemwa kuchita, Mwe ŵaIsraele.” Ntheura ndimo FUMU Chiuta wakuyowoyera.

⁶“Ine ndine nkhalangula kuti muŵe njara mu misumba yinu yose, kuti muŵavye chakurya mu malo ghinu ghose. Ndipouli imwe kuti mukawerera kwa ine chara.” Ntheura ndimo yikuyowoyera FUMU.

⁷“Ndine nkhamunorani vura, apo yikati yakharako myezi yitatu kuti muvune. Ndine nkharokweska vura mu msumba umoza, na kuyikanizga kurokwa mu msumba unyakhe. Nkharokweska vura mu munda umoza, ndipo mu munda umo yikareka kurokwamo, mbuto zikafota.

⁸Ŵanthu ŵa misumba yiŵiri panji yitatu ŵakarutanga ku msumba umoza kuya kamwa maji, kweni kuti ghakaŵakhorweskanga chara. Ndipouli imwe kuti mukawerera kwa ine chara.” Ntheura ndimo yikuyowoyera FUMU.

⁹“Nkhatuma nthenda yakuŵawura mbuto zinu na ya chinoni. Nkhomizga mbuto za mu minda yinu ndiposo na za mu minda ya mpheska. Zombe likapurura makuni gha vikuyu na gha maolive. Ndipouli imwe kuti mukawerera kwa ine chara.” Ntheura ndimo yikuyowoyera FUMU.

¹⁰“Nkhatuma vilengo mukati mwinu nga ndi vira vya mu charu cha Eguputo. Nkhakomeska ŵawukirano ŵinu ku nkhondo, na kupereka mahachi yinu ku ŵarwani. Nkhamununkhiskani na sungu la vitanda la kufumira mu misasa yinu. Ndipouli imwe kuti mukawerera kwa ine chara.” Ntheura ndimo yikuyowoyera FUMU.

¹¹“Ŵanji ŵa imwe nkhaŵamara petu nga ndi umo nkhamalira petu Sodomu na Gomora, ndipo mwe mukaŵa nga ndi kachisinga ako ŵaphura pa moto. Ndipouli imwe kuti mukawerera kwa ine chara.” Ntheura ndimo yikuyowoyera FUMU.

¹²“Sono ndizamkuchita namwe ntheura, Mwe ŵaIsraele. Pakuti ndizamkumuchitirani ivi, ipo muŵe ŵakunozgeka kwiza kakumana na Chiuta winu, Mwe ŵaIsraele.”

¹³Sono pulikani. Chiuta uyo wakuwumba mapiri na kulenga mphepo, ndiyo wakumuvumbulira munthu maghanoghano ghakhe, ndiyo wakuzgora mulenje kuti uŵe chisi ndipo ndiyo wakwenda mu mapiri gha charu cha pasi. Zina lakhe ndi FUMU Chiuta Mwenenkhongono zose.