Read new_tumbuka_bible Amosi 5 Bible Online

Amosi 5 - new_tumbuka_bible bible

Amosi 5

¹Mwe ŵaIsraele, pulikani mazgu agha, gheneagho nkhumuphalirani uku nkhutengera.

²“Mwali wakulangwa Israele wawa, ndipo wawukengeso chara. Wasidika yekha mu charu chakhe, kwambula na yumoza wakumuwuska.”

³FUMU Chiuta wakuti, “Msumba uwo ukaruta ku nkhondo na ŵasilikari 1,000, uzamkuŵa na ŵasilikari ŵakupona 100 pera. Uwo ukaruta ku nkhondo na ŵasilikari 100, uzamkuŵa na ŵasilikari ŵakupona khumi pera mu ŵaIsraele.”

⁴FUMU yikuti ku ŵaIsraele, “Muwerere kwa ine kuti muŵe ŵamoyo.

⁵Kweni mureke kuya kasopa vikozgo ku Betele, nanga nkhuruta ku Giligala panji kwambukira ku Beyeresheba. Nadidi ŵanthu ŵa ku Giligala ŵamkuyorekera ku umikori, malo gha Betele ghamkuzgoka kuŵa ghawakawaka.”

⁶Muwerere kwa FUMU kuti muŵe ŵamoyo. Usange mwareka, iyo yigolerenge nga ndi moto mu mumba ya Yosefe. Wizamkumyangura ŵanthu ŵa ku Betele, kwambula na yumoza wakuwuzimya.

⁷Imwe mukuzgora weruzgi wakunyoroka kuŵa wakuŵaŵa, ndipo urunji mukuwutaya mu fuvu.

⁸Chiuta uyo wakalenga nyenyezi za chilimira na mauta, uyo wakuzgora chisi chikuru kuŵa kungweruka kwa mulenje, uyo wakuzgora muhanya kuŵa usiku, uyo wakuwunganya pamoza maji gha mu nyanja na kughapungulira pa charu, zina lakhe ndi FUMU.

⁹Mwamabuchibuchi iyo wakuparanya vinkhara, mwakuti malinga ghakubwanganduka.

¹⁰Imwe mukutinkha uyo wakumuchenyani pa mphara, ndipo mukumunyanyara uyo wakuyowoya unenesko.

¹¹Mukukandirizgira pasi ŵakavu na kuŵachichizga kumupani tirigu. Ntheura, nangauli mwazenga nyumba za mawe, kweni kuti mwamkukharamo chara. Nangauli mwalima minda yiweme ya mpheska, kweni kuti mwamkumwapo vinyo lakhe chara.

¹²Ine nkhumanya unandi wa majuvyo ghinu na unandi wa zakwananga zinu. Imwe mukusuzga ŵarunji, na kupoka vimbundi. Mukureka kweruzga makora mirandu ya ŵakavu pa mphara.

¹³Ndicho chifukwa munthu wa mahara wakukhara chete pa nyengo nga ndi iyi, pakuti iyi ndi nyengo yiheni.

¹⁴Penjani uweme, uheni chara mwakuti muŵe ŵamoyo. Ntheura FUMU, Chiuta Mwenenkhongono zose, wati waŵe namwe nga ndi umo mukuyowoyera kuti ndimo waliri.

¹⁵Tinkhani uheni, ndipo temwani uweme. Weruzgi winu uŵe wakunyoroka pa mphara ya mirandu. Tikumanya chara, panji FUMU, Chiuta Mwenenkhongono zose wamkuŵa na lusungu kwa awo ŵakharako mu nyumba ya Yosefe.

¹⁶Pa chifukwa ichi FUMU, Chiuta Mwenenkhongono zose, wakuti, “Mu maluwugha ghose mwamkuŵa chitengero, mu ŵagurwe wose ŵamkulira kuti, ‘Mbaya mwe! Mbaya mwe!’ Ŵalimi ŵamkuchemekera ku chiliro, awo ŵakumanya kutengera nawo ŵamkuchemeka.

¹⁷Mu minda yose ya mpheska mwakuŵa chitengero pakuti ndizamkwenda mukati mwinu, kuti ndimulangani nadi.” Ntheura ndimo yikuyowoyera FUMU.

¹⁸“Soka kwa imwe, mwaŵeneimwe mukunwekera kuwona zuŵa la FUMU. Kasi zuŵa la FUMU lizamkuŵa na chandulo uli kwa imwe? Ndi zuŵa la mdima bii, ungweru chara.

¹⁹Kwizamkuŵa nga ndi munthu wakuchimbira ku nkharamu, kweni wakukumana na nkharamira. Panji nga ndi munthu uyo wakanjira mu nyumba na kweghamira woko lakhe ku chimati ndipo njoka yikumuruma.

²⁰Asi zuŵa la FUMU nda mdima, lambula ungweru? Asi nda mdima wakofya, lambula kuŵala?”

²¹FUMU yikuti, “Ine nkhuvitinkha na kuviyuyura viphikiro vyinu. Ine kuti nkhukondwera chara na maungano ghinu ghakupatulika.

²²Nanga mupereke kwa ine sembe zinu zakocha na za ufu, ine kuti ndizipokererenge chara. Sembe zinu za wenenawene za ng'ombe zinu zakututuŵa, ine kuti ndizamkuzilaŵiska chara.

²³Mungandizinganga makutu chara na mphomo ya kwimba kwinu. Ine nditegherezgenge chara para mukulizga ŵabango.

²⁴Kweni nkhukhumba weruzgi wakunyoroka, wendenge nga ndi maji. Urunji nawo uŵenge nga ndi mronga uwo kuti ukukamuka maji ghakwenda chara.

²⁵“Kasi imwe ŵaIsraele mukandiyegherapo sembe na vyakupereka mu mapopa mu virimika 40?

²⁶Sono imwe ipo mwamkuyeghanga Sakuti, karonga winu, Kayiwani, nyenyezi yira, chiuta winu, vyeneivyo ndi vikozgo ivyo mukajinozgera mwaŵene.

²⁷Ntheura ndamkumuyorerani ku umikori kujumpha charu cha Damaseko.” Ntheura ndimo yikuyowoyera FUMU, yeneiyo zina lakhe ndi Chiuta Mwenenkhongono zose.