Read new_tumbuka_bible Amosi 6 Bible Online

Amosi 6 - new_tumbuka_bible bible

Amosi 6

¹Soka kwa imwe mwaŵeneimwe mukukhara mu kufwasa mu Ziyoni, na kwa imwe mukupima kuti muli mu chimango pa Phiri la Samariya. Soka kwa imwe muli ŵakumanyikwa mukati mu ŵamitundu ŵakudanga, mwaŵeneimwe ŵaIsraele ŵakwizako kupenja wovwiri.

²Rutani ku msumba wa Kaline, ndipo mukawone. Kufuma kura muruteso ku Hamati, msumba ukuru ura, ndipo mukhilire ku Gati, msumba wa ŵaFilisiti. Kasi misumba iyi njiweme kuruska maufumu gha Yuda na cha Israele? Panji, kasi charu chawo nchikuru kuruska charu chinu?

³Imwe kuti mukuliŵika kutali zuŵa lira la pharaniko, ndipo mukulisezgera kufupi zuŵa lira la viwawa.

⁴Soka kwa imwe mukugona pa vitara vya minyanga ya zovu, na kujinyorora pa mipando yinu ya kuwowofoka. Imwe mukurya nyama ya ŵana-mberere kufuma ku mskambo ndiposo na ŵana ŵa ng'ombe ŵakututuŵa kufuma mu chiŵaya.

⁵Imwe mukwimba sumu zawakawaka uku mukulizga viding'indi, ndipo, nga ndi Davide, mukujinozgera vyakwimbira.

⁶Imwe mukumwera vinyo mu twadira na kujiphakazga mafuta ghaweme chomene, kweni mulije chitima na kupankhuka kwa charu cha Yosefe.

⁷Ntheura imwe ndimwe mwamkuŵa ŵakudanga kuyorekera ku umikori ndipo viphikiro na vikondwerero vyamkumumalirani.

⁸FUMU, Chiuta Mwenenkhongono zose warapa mu zina lakhe kuti, “Nkhunyanyara nako kujikuzga kwa Yakhobe, nkhutinkhana nagho malinga ghawo. Nadi nditi ndiwupereke msumba wawo ku ŵarwani pamoza na vyose ivyo vili mwenemumo.”

⁹Usange ŵanthu khumi ŵamkubisama mu nyumba yimoza, nawoso ŵamkufwa ndipera.

¹⁰Mubali yumoza wa awo ŵafwa, uyo wakwenera kupwererera vya awo ŵafwa, wizamkufika na kufumiska vitanda vira. Apo wizamkufumba yumoza uyo wakharako mu nyumba yira kuti, “Kasi muliso munthu umo?” Iyo wizamkuzgora kuti, “Chara nadi, mulije.” Penepapo munthu yura wamkuyowoya kuti, “Chetama! Kuŵavye na yumoza wakuzunura zina la FUMU.”

¹¹Nadi, para FUMU yalangula, nyumba zikuruzikuru zizamkubwanganduka, ndipo nyumba zichokozichoko zamkugundumulika nkhanira.

¹²Kasi mahachi ghakuchimbira pa majarawe? Kasi pa nyanja munthu wangamanya kulimapo na ng'ombe. Ndipouli imwe mwazgora weruzgi wakunyoroka kuŵa chinthu chakukoma, ndipo vipambi vya urunji kuŵa nga ndi chinthu chakuŵaŵa.

¹³Imwe mukukondwa pakuthereska msumba wa Lodebara, na kuti, “Asi tathereska msumba wa Karinayimu na nkhongono zithu na zithu?”

¹⁴Sono FUMU, Chiuta Mwenenkhongono zose wakuti, “Ndizamkumutumirani ŵanthu ŵa mtundu unyakhe kuti ŵizakarwe namwe, Mwe ŵaIsraele.” Iwo ŵizamkumuyuzgani kufuma ku chipata cha Hamati, kuya kafika ku kadambo ka Araba.