Read new_tumbuka_bible Amosi 7 Bible Online

Amosi 7 - new_tumbuka_bible bible

Amosi 7

¹FUMU Chiuta wakandirongora chinthu ichi mu mboniwoni. FUMU yikapanganga zombe apo utheka ukambanga kuphukaso. Ukaŵa utheka uwo ukamera apo karonga wakaŵa kuti wavunamo kale.

²Para nkhawona kuti zombe wamara kurya utheka wose ŵa mu charu chira, ine nkhati, “Mwe FUMU Chiuta, nkhumuŵeyani, gowokani! Kasi ŵaYakhobe aŵa ŵangachintha uli? Iwo aŵa ŵalije na nkhongono.”

³Penepapo FUMU yikagowoka, yikati, “Ichi kuti chichitikenge chara.”

⁴Chinyakhe icho FUMU Chiuta wakandirongora mu mboniwoni ndi ichi: FUMU Chiuta wakachemanga moto kuti ulange ŵanthu. Moto ura ukamyangura ndimba yikuru ya nyanja ndipo ukamba kunanga charu.

⁵Penepapo ine nkhati, “Mwe FUMU Chiuta, nkhumuŵeyani, rekani. Kasi ŵaYakhobe aŵa ŵangachintha uli? Iwo aŵa ŵalije na nkhongono.”

⁶Penepapo FUMU yikagowoka. Ntheura FUMU Chiuta wakazgora wakati, “Ichi nacho kuti chichitikenge chara.”

⁷FUMU yikandirongora ichi: FUMU yimilira pa mphepete pa chiliŵa, uku yakolera chingwe chakupimira.

⁸Sono FUMU yikandifumba yikati, “Iwe Amosi, kasi ukuwona vichi?” Ine nkhazgora nkhati, “Chingwe chakupimira.” Penepapo FUMU yikati, “Wona, nkhuŵika chingwe chakupimira mukati mu ŵanthu ŵane, ŵaIsraele. Ine kuti ndizamkuŵagowokeraso chara.

⁹Malo gha pachanya ghakusoperako gha Yisake ghamkuŵa mahami, malo ghakupatulika gha ŵaIsraele, ghizamkupankhuka. Ŵa mu nyumba ya Yerobowamu, ndizamkuŵawukira na nkhondo.”

¹⁰Sono ku Betele kukaŵa musofi munyakhe zina lakhe Amaziya. Iyo wakatuma mazgu kwa Yerobowamu, karonga wa charu cha Israele, wakati, “Amosi wakumwenderani mphiska mukati mu ŵaIsraele. Ŵanthu kuti ŵangamanya kuzomerezga chara vyose ivyo iyo wakuyowoya.

¹¹Amosi wakuti, ‘Yerobowamu wamkufwa na nkhondo, ŵaIsraele nawo ŵamkuyorekera ku umikori kufuma mu charu cha kwawo.’”

¹²Amaziya wakayowoyaso kwa Amosi wakati, “Iwe muwoni, fumako kuno, ndipo rutanga ku charu cha Yuda. Kwenekuko ndiko ukaryenge na kuchima.

¹³Kweni ungizakachimangaso ku Betele chara, chifukwa ndi malo gha karonga ghakusoperako ndiposo ndi Nyumba ya Chiuta mu charu ichi.”

¹⁴Penepapo Amosi wakamuzgora Amaziya wakati, “Ine kuti ndine nchimi chara, ndiposo kuti ndine yumoza wa nchimi zichokozichoko chara. Ine ndine waka mliska ndiposo nkhupwererera waka makuni gha vikuyu.

¹⁵FUMU ndiyo yikachita kunditora na kundirekeska mlimo wakuŵeta mberere na mbuzi mberere na mbuzi, ndipo yikandiphalira kuti, ‘Rutanga, ukachime ku ŵanthu ŵane, ŵaIsraele.’

¹⁶Ntheura sono pulika mazgu agho FUMU yikuyowoya. Iwe ukuti, ‘Reka kuchima vyakususka ŵaIsraele, reka kupharazga vyakususka nyumba ya Yisake.’

¹⁷Pa chifukwa ichi FUMU yikuti, ‘Muwoli wako wati waŵenge muzaghali mu msumba, ŵana ŵako ŵanarume na ŵanakazi ŵamkukomeka na nkhondo. Charu chako ŵamkuchigaŵagaŵa na kuchipereka ku ŵanthu ŵanji. Iwe wamwene wamkufwira ku charu chambula kumanya Chiuta. ŴaIsraele nawo ŵamkuyorekera ku umikori kufuma mu charu cha kwawo.’ ”