Read new_tumbuka_bible Amosi 8 Bible Online

Amosi 8 - new_tumbuka_bible bible

Amosi 8

¹FUMU Chiuta wakandirongora ichi mu mboniwoni: Pakaŵa chidunga cha vipambi vya chihanya.

²FUMU yikandifumba yikati, “Amosi, kasi ukuwonachi?” Ine nkhazgora nkhati, “Chidunga cha vipambi vya chihanya.” Ntheura FUMU yikati kwa ine, “Umaliro waŵizira ŵanthu ŵane ŵaIsraele. Ine kuti ndamkuŵagowokeraso chara.

³Pa zuŵa ilo sumu za mu Nyumba ya Chiuta zamkuzgoka za chitengero. Vitanda vyamkuŵa vinandi, vyamkuponyeka waka chisisi palipose.” Ntheura ndimo FUMU Chiuta wakuyowoyera.

⁴Amosi wakati, “Pulikani ivi, imwe mukutindiŵizgira pasi ŵasokwano, imwe mukukandirizgira pasi ŵakavu ŵa mu charu ichi.

⁵Imwe mukuti, ‘Kasi chiphikiro cha kuthwasa kwa mwezi chimarenge pauli, mwakuti tiguliske mbuto zithu? Zuŵa la sabata nalo limarenge pauli, mwakuti tiguliske tirigu withu, kuti tichepeske debe na kukuzga mtengo, mwakuti tibire ŵanthu na vyakupimira vyakupusika,

⁶kuti ŵakavu tiŵagule na ndarama ya siliva, ŵasokwano na skapato ziŵiri, na kuguliska gaga wa tirigu wuwo?’ ”

⁷FUMU yarapa pakujikuzga kwa Yakhobe kuti, “Nadidi, kuti ndamkuruwapo chara nanga nkhamoza ka ivyo wakuchita.

⁸Charu chamkusunkhunyika chifukwa cha vyeneivi. Munthu yose uyo wakukhara mwenemumo wamkutengera. Charu chamkufuruka nga maji gha mronga wa Nayelo. Chamkuyegheka uku na uku na kubira nga ndi mronga wa Nayelo wa charu cha Eguputo.”

⁹FUMU Chiuta wakuti, “Mu zuŵa leneilo ndizamkuzgora dazi kuti linjire na muhanya pakati na kuŵika chisi pa charu apo dazi lichali kuŵala.

¹⁰Viphikiro vyinu ndamkuvizgora kuŵa chitengero, sumu zinu ndamkuzizgora kuŵa chiliro. Munthu waliyose ndamkumuvwarika chigudulu, ndipo waliyose wamkumeteka mupara. Mwamkuŵa nga ndi mupapi uyo wakutengerera mwana wakhe kananda. Zuŵa ili lizamkuŵa la viphyo vikuru nadi mpaka umaliro wakhe.”

¹¹FUMU Chiuta wakuti, “Mazuŵa ghakwiza, apo ndizamkutuma njara pa charu. Yizamkuŵa njara ya chakurya chara nesi nyota ya maji. Kweni yizamkuŵa njara yakukhumba kupulika mazgu gha FUMU.

¹²Ŵanthu ŵamkwendendeka kufuma ku nyanja iyi kuya kafika ku nyanja yinyakhe, kufuma ku mpoto kuya kafika ku mafumiro gha dazi. Ŵizamkuchimbilira uku na uko, kupenjerera mazgu gha FUMU, kweni kuti ŵizamkughasanga chara.

¹³Pa zuŵa ilo, ŵamwali ŵakulangwa na ŵakutowa na ŵanyamata ŵa mathupi ghaweme, ŵizamkufwa lunkhuŵa chifukwa cha nyota.

¹⁴Awo ŵakuchita chirapo mwa Ashima, chiuta ngoza wa ku Samariya, na kuyowoya kuti, ‘Iwe Dani, nkhurapira mwa chiuta wako wamoyo,’ panji kuti, ‘Nkhurapira mu nthowa yakuya ku Beyeresheba,’ wose aŵa ŵizamkuwa kwambula kuwukaso.”