Read new_tumbuka_bible Amosi 9 Bible Online

Amosi 9 - new_tumbuka_bible bible

Amosi 9

¹Nkhawona FUMU yimilira pa mphepete pa jochero. Iyo yikati, “Timbani pa mitu ya mizati, mpaka malufura ghasunkhunyike, ndipo muyiswe kuti yiwire pa mitu ya ŵanthu. Awo ŵakharako, ndizamkuŵakoma na nkhondo. Palije na yumoza uyo wizamkuchimbira, nanga njumoza uyo wizamkuphokwa.

²Nanga ŵajime pasi mpaka ku malo gha ŵakufwa, nako woko lane lamkuŵatora. Nanga ŵakwere mpaka kuchanya, nako ndamkuŵakhizgira pasi.

³Nanga ŵabisame pa Phiri la Karimele, ndamkuŵapenja na kuŵawuskapo. Nanga ŵabisame kwa ine pasi pa nyanja yikuru, kwenekura ndamkulangula njoka kuti yiŵarume.

⁴Nanga ŵarwani ŵawo ŵangaŵatorera ku umikori, kwenekura ndamkulangula kuti ŵakomeke na nkhondo. Maso ghane ghamkuŵa pa iwo, kuti ndiŵachitire chiheni, chiweme chara.”

⁵Para FUMU, Chiuta Mwenenkhongono zose wakhwaska waka charu, charu chira chikusongonoka, ndipo wose awo ŵakukharamo ŵakutengera. Charu chose chikuwuka nga ndi mronga wa Nayelo, chikukhiraso nga ndi mronga wa Nayelo mu charu cha Eguputo.

⁶Iyo ndiyo wakuzenga malo ghakhe ghakukharamo kuchanya, ndipo wakwimika lufura lwa mlengalenga wakhe pa charu. Iyo ndiyo wawunganya pamoza maji gha mu nyanja, na kughapungulira pachanya pa charu. Zina lakhe ndi FUMU.

⁷FUMU yikuti, “Asi kwa ine imwe ŵaIsraele mukuyana waka na ŵaEtiyopiya? Asi ndine nkhafumiska ŵaIsraele kufuma mu charu cha Eguputo? Asi ndine nkhafumiska ŵaFilisiti kufuma mu charu cha Kafitoro ndipo ŵaSiriya kufuma ku Kiri?

⁸Wonani, maso gha ine FUMU Chiuta ghali pa ufumu wakwananga, ndipo nditi ndiwumare petu pa charu cha pasi. Kweni mbumba ya Yakhobe pera ndiyo ndamkuyimalira nkhanira chara.” Ntheura ndimo yikuyowoyera FUMU.

⁹“Pakuti wonani, ndizamkulangula, na kusunkhunya ŵaIsraele mukati mu mafuko ghose, nga ndi ufu mu sefa na kuwuskako wose awo mbawakawaka.

¹⁰Ŵakwananga wose mukati mu ŵanthu ŵane, ŵamkufwa la lupanga, iwo ŵakuti ‘Uheni wamkutisanga chara nanga nkhukumana nase.’ ”

¹¹FUMU yikuti, “Mu zuŵa ilo, ndamkuzengaso ufumu wa Davide uwo uli kuwa. Ndamkunozgaso viliŵa vyakhe, na kuzengaso mahami ghakhe, kuti uŵe nga ndi umo ukaŵira mazuŵa gha kale.

¹²Panyengo iyo, ŵaIsraele ŵizamkuthereska awo ŵakharako mu Edomu na mafuko ghanyakhe ghose agho ngane.” Ntheura ndimo yikuyowoyera FUMU iyo yichitenge ivyo yayowoya.

¹³FUMU yikuti, “Mazuŵa ghakwiza apo mulimi wizamkumuruska uyo wakuvuna, ndipo uyo wakuponda mpheska wizamkumuruska uyo wakupanda mbuto. Mu mapiri muzamkuthonya vinyo lakunowa, mu tumapiri tose muzamkuŵaso vinyo.

¹⁴Ndizamkuŵawezgera mauweme ŵanthu ŵane ŵaIsraele, ndipo iwo ŵizamkuzengaso misumba yakupankhuka na kukharamo. Ŵizamkulima minda ya mpheska na kumwa vinyo lakhe, ndipo ŵizamkulimanga minda na kurya vipambi vyakhe.

¹⁵Ndizamkuŵapandaso mu charu chawo ndipo ŵizamkuzgulikaso chara mu charu icho ndaŵapa.” Ntheura ndimo FUMU, Chiuta winu wakuyowoyera.