Read new_tumbuka_bible Yona 1 Bible Online

Yona 1 - new_tumbuka_bible bible

Yona 1

¹Zuŵa limoza mazgu gha FUMU ghakiza kwa Yona mwana wa Amitayi, ghakati,

²“Wuka, urute ku msumba ukuru ura wa Nineve, ukachemerezge pakuŵapharazgira ŵanthu mazgu ghakuŵasuska chifukwa ndawona kuti ŵananga chomene.”

³Kweni Yona wakachimbilira ku Tarishishi mwakuti wawukepo panthazi pa FUMU. Wakakhilira ku dowoko la ku Yopa ndipo kwenekura wakasanga ngaraŵa iyo yikarutanga ku charu chira. Wakati walipira ndarama zakwendera, wakakwera kuti warute ku Tarishishi mwakuti wareke kuwonekera kwa FUMU.

⁴Kweni FUMU yikawuska mphepo yikuru pa nyanja, ndipo kukaŵa chimphupuru chankhongono chomene mwakuti ngaraŵa nayo yikaŵa pafupi na kusweka.

⁵Ŵendeski ŵa ngaraŵa ŵakopa chomene ndipo waliyose wakachemerezga kwa chiuta wakhe na wakhe. Ntheura ŵakamba kutaya ŵakatundu awo ŵakaŵa mu ngaraŵa mwakuti ŵayipepuske. Pa nyengo iyi Yona wakaŵa kuti wakhilira mu vipinda vya pasi mu ngaraŵa ndipo wakagona tulo twa kafwe na kafwe.

⁶Murara wa ngaraŵa wakakhilira kwenekura ndipo wakati wamusanga wakati kwa Yona, “Kasi iwe ukung'anamulachi pakugona tulo? Wuka! Nawe chemerezga kwa chiuta wako. Panji chiuta wako wangatipulika kuti tireke kufwa.”

⁷Ntheura ŵendeski ŵa ngaraŵa ŵara ŵakati ku yumoza na munyakhe, “Tiyeni tose pamoza tichite mphenduzgo mwakuti timanye kuti kasi nchifukwa cha njani soka ili latiwira?” Ntheura ŵakachita mphenduzgo ndipo yikawira Yona.

⁸Penepapo ŵakamufumba Yona ŵakati, “Kasi nchifukwa cha njani kuti soka ili latiwira? Nchito iyo ukuchita nja mtundu uli? Kasi ukufumirankhu? Charu chako ndi nchi? Ndiwe munthu wa mtundu uli?”

⁹Iyo wakazgora wakati, “Ine ndine muHebere. Ndipo nkhusopa FUMU, Chiuta wa kuchanya, uyo wakalenga nyanja na mtunda.”

¹⁰Penepapo ŵendeski ŵa ngaraŵa ŵara ŵakopa chomene ndipo ŵakamufumba ŵakati, “Kasi icho wachita nchithu uli?” Kweni iwo ŵakamanya kuti wakachimbiranga FUMU, pakuti wakaŵaphalirapo kale za cheneichi.

¹¹Chimphupuru chira chikakulirangakuliranga Ntheura ŵakati kwa iyo, “Kasi sono tichite chivichi kwa iwe mwakuti nyanja yitikhalire bata?”

¹²Yona wakaŵazgora wakati, “Mundinyamure na kundiponya mu nyanja ndipo yiti yimukhaliraninge bata. Pakuti nkhumanya kuti chimphupuru chikuru ichi chamuwirani chifukwa cha ine.”

¹³Ŵendeski ŵa ngaraŵa ŵara ŵakayezga chomene kuvuŵa kuti ŵayiwezgere ngaraŵa yira ku mtunda, kweni ŵakatondeka chifukwa chimphupuru chikakulirangakuliranga pa nyanja kuŵajandizga.

¹⁴Ntheura ŵakaromba kwa FUMU ŵakati, “Mwe FUMU tikumuŵeyani kuti tireke kufwa chifukwa cha kumara umoyo wa munthu uyu, ndipo mureke kuŵika mrandu wa nyifwa yakhe pa ise, pakuti imwe FUMU mwachita icho nchakumukondweskani.”

¹⁵Ntheura ŵakamutora Yona na kumuponya mu nyanja. Penepapo nyanja yikaŵakhalira bata.

¹⁶Ŵendeski ŵa ngaraŵa ŵakati ŵawona ichi, ŵakopa FUMU chomene ndipo ŵakapereka sembe kwa FUMU na kupangana kuti ŵati ŵateŵetere FUMU.

¹⁷FUMU yikanozgera chisomba chikuru kuti chimumire Yona. Yona wakaŵa mu nthumbo ya chisomba mazuŵa ghatatu muhanya na usiku.