Read new_tumbuka_bible Yona 2 Bible Online

Yona 2 - new_tumbuka_bible bible

Yona 2

¹Apo Yona wakaŵa mukati mu nthumbo ya chisomba, wakaromba kwa FUMU, Chiuta wakhe wakati:

²“Apo nkhaŵa mu visuzgo nkhachemerezga kwa imwe FUMU, ndipo imwe mukandizgora. Apo nkhaŵa mu malo gha ŵakufwa, nkhalirira kwa imwe FUMU kuti mundovwire, ndipo imwe mukandipulika.

³Imwe mukandiponya mukati mwa ndimba, nadi, mukatikati mwa nyanja, mwezga ukandizingirizga ine kosekose, majigha na maŵiruŵiru ghinu ghose vikandibizga.

⁴Ntheura nkhati, ‘Ndatayika ine kufuma pa maso pinu, kasi ndamkulaŵiskaso uli ku Nyumba yinu yakupatulika?’

⁵Maji ghakandibenekerera ine, ndimba nayo yikandizingirizga ine, ndere zikazingirizga mutu wane.

⁶Nkhakhilira kusi kwa lufura lwa mapiri, nkhabira pasi chomene kusi kwa charu, icho mphingirizgo zakhe zikandijalira kwa muyirayira. Ndipouli, Mwe FUMU, Chiuta wane mukandifumiskamo wamoyo mu dindi.

⁷Para nkhawona kuti umoyo wane ukumara, nkhakumbuka imwe FUMU. Ndipo nkharomba kwa imwe, mu Nyumba yinu yakupatulika.

⁸Awo ŵakusopa vikozgo vya waka, ŵakutaya kugomezgeka kwawo kwa imwe.

⁹Kweni ine, nditi ndiyimbenge sumu ya viwongo, nditi ndipereke sembe kwa imwe. Icho ndapangana, nditi ndifiskenge, kuthaskika kukufuma kwa FUMU.”

¹⁰FUMU yikalangula chisomba chira, ndipo chikamuwukulira Yona pa mtunda.