Read new_tumbuka_bible Yona 3 Bible Online

Yona 3 - new_tumbuka_bible bible

Yona 3

¹Mazgu gha FUMU ghakiza kwa Yona kachiŵiri, ghakati,

²“Wuka, urute ku msumba ura ukuru wa Nineve ndipo ukawupharazgire uthenga uwo nkhukuphalira.”

³Yona wakapulikira ndipo wakaruta ku Nineve kwakuyana na umo FUMU yikamuphalirira. Nineve ukaŵa msumba ukuru, weneuwo mu usani wakhe ukaŵa wa ulendo wa mazuŵa ghatatu.

⁴Pa zuŵa lakudanga Yona wakamba kupharazga uthenga ura mukati mu msumba wakati, “Kwakhara mazuŵa 40 pera kuti Nineve wabwanganduke.”

⁵Ŵanthu ŵa ku Nineve ŵakagomezga uthenga wa Chiuta. Ŵakaphalirana kuti waliyose waziŵizge kurya ndipo ŵavware vigudulu kwamba ŵakuru na ŵachoko wuwo.

⁶Para uthenga uwu ukamufika karonga wa charu cha Nineve, iyo wakafumapo pa chizumbe chakhe cha ufumu, wakavura munjilira wakhe ndipo wakavwara chigudulu na kukhara pasi pa vyoto.

⁷Penepapo karonga yura wakatuma uthenga ku ŵanthu wose mu msumba wa Nineve kuti, “Languro la karonga na ŵarongozgi ŵakhe ndi ili, ‘Munthu waliyose nanga chingaŵa chinyama chilichose, ng'ombe, mberere panji mbuzi, vingachetanga chakurya chilichose chara nesi kumwa maji.

⁸Ŵanthu ŵavware vigudulu ndipo vyakuŵeta navyo ŵavivwarike vigudulu. Ŵanthu ŵachemerezge chomene pakuromba kwa Chiuta na kureka nthowa zawo ziheni ndiposo na vya nkhaza ivyo ŵakuchita.

⁹Ndi njani wakumanya, panji Chiuta wangagowoka ku ukari wakhe wakofya kuti tireke kumara?’ ”

¹⁰Para Chiuta wakawona icho ŵakachita, na umo ŵakawererako ku nthowa zawo ziheni, wakagowoka pakureka kupereka chilango icho wakatenge waŵamare nacho.