Read new_tumbuka_bible Kupenda 1 Bible Online

Kupenda 1 - new_tumbuka_bible bible

Kupenda 1

¹FUMU yikayowoya na Mozesi mu mapopa gha Sinayi mu Chihema Chakukumaniranamo, pa zuŵa lakudanga la mwezi wa chiŵiri, mu chirimika cha chiŵiri, para ŵaIsraele ŵakati ŵafuma mu charu cha Eguputo kuti,

²“Penda mpingo wose wa ŵaIsraele, mbumba na mbumba, kwakuyana na nyumba za ŵawiskewokuru. Ulembenge zina la mwanarume waliyose yumozayumoza.

³Iwe na Aroni mupende mpingo na mpingo ŵanthu awo mbakwenerera kurwa nkhondo, mukati mu ŵaIsraele, kwamba na ŵa virimika 20 na ŵakujumphirapo.

⁴Muti musorengemo munthu yumoza kuti wamovwirani kufuma mu fuko ili na ili, mweneuyo ndi murongozgi pa mbumba ya ŵawiskekuru.”

⁵Ndipo agha ndigho mazina gha ŵanthu awo ŵati ŵamovwiraninge: kufuma mu fuko la Rubeni, wamovwiraninge ndi Elizuru mwana wa Sheduru.

⁶Mu fuko la Simiyoni, Shelumiyele mwana wa Zurishadayi.

⁷Mu fuko la Yuda, Nashoni mwana wa Aminadabu.

⁸Mu fuko la Isakara, Netanele mwana wa Zuwara.

⁹Mu fuko la Zebuloni, Eliyabu mwana wa Heloni.

¹⁰Mu nyumba ya Yosefe, mu fuko la Efurayimu, Elishama mwana wa Amihudi, ndipo mu fuko la Manase, Gamaliyele mwana wa Pedazuru.

¹¹Mu fuko la Benjamini, Abidani mwana wa Gidiyoni.

¹²Mu fuko la Dani, Ahiyezere mwana wa Amishadayi.

¹³Mu fuko la Ashere, Pagiyele mwana wa Okirani.

¹⁴Mu fuko la Gadi, Eliyasafu mwana wa Duwele.

¹⁵Mu fuko la Nafutali, Ahira mwana wa Enani.

¹⁶Aŵa ndiwo ŵakasoreka kufuma mu mpingo, ŵarongozgi mu nyumba za ŵawiskewokuru. Iwo ŵakaŵa ŵarara ŵa mafuko gha ŵaIsraele.

¹⁷Mozesi na Aroni ŵakatora ŵanthu ŵeneawo ŵazunurika,

¹⁸ndipo pa zuŵa lakudanga la mwezi wa chiŵiri, ŵakawunganya ŵanthu wose ŵa mu mpingo. Iwo ŵakalembeska nyumba na nyumba kwakuyana na nyumba za ŵawiskewokuru. Ŵakalembeska ndi awo ŵakaŵa na virimika 20 na ŵakujumphirapo, ndipo ŵakalembeska yumozayumoza.

¹⁹Ntheura Mozesi wakapenda ŵanthu mu mapopa gha Sinayi nga ndi umo FUMU yikamulangulira.

²⁰Mu fuko la Rubeni, mwana wa uŵere wa Yakhobe, ŵakalemba mazina gha ŵanarume wose awo ŵakaŵa ŵakwenerera kurwa nkhondo, ŵa virimika 20 na ŵakujumphirapo, mu miwiro yawo, mbumba na mbumba, kwakuyana na nyumba za ŵawiskewokuru.

²¹Ŵakati ŵapenda ŵa fuko la Rubeni unandi wawo ŵakaŵa 46,500.

²²Mu fuko la Simiyoni, ŵakalemba mazina gha ŵanarume wose awo ŵakaŵa ŵakwenerera kurwa nkhondo, ŵa virimika 20 na ŵakujumphirapo, mu miwiro yawo, mbumba na mbumba, kwakuyana na nyumba za ŵawiskewokuru.

²³Ŵakati ŵapenda, ŵa fuko la Simiyoni unandi wawo ŵakaŵa 59,300.

²⁴Mu fuko la Gadi, ŵakalemba mazina gha ŵanarume wose awo ŵakaŵa ŵakwenerera kurwa nkhondo, ŵa virimika 20 na ŵakujumphirapo, mu miwiro yawo, mbumba na mbumba za ŵawiskewokuru.

²⁵Ŵakati ŵapenda, ŵa fuko la Gadi unandi wawo ŵakaŵa 45,650.

²⁶Mu fuko la Yuda, ŵakalemba mazina gha ŵanarume wose awo ŵakaŵa ŵa kwenerera kurwa nkhondo, ŵa virimika 20 na ŵakujumphirapo, mu miwiro kawo, mbumba na mbumba, kwakuyana na nyumba za ŵawiskewokuru.

²⁷Ŵakati ŵapenda, ŵa fuko la Yuda unandi wawo ŵakaŵa 74,600.

²⁸Mu fuko la Isakara, ŵakalemba mazina gha ŵanarume wose awo ŵakaŵa ŵakwenerera kurwa nkhondo, ŵa virimika 20 na ŵakujumphirapo, mu miwiro yawo, mbumba na mbumba, kwakuyana na nyumba za ŵawiskewokuru.

²⁹Ŵakati ŵapenda ŵa fuko la Isakara unandi wawo ŵakaŵa vikwi 54,400.

³⁰Mu fuko la Zebuloni, ŵakalemba mazina gha ŵanarume wose awo ŵakaŵa ŵakwenerera kurwa nkhondo, ŵa virimika 20 na ŵakujumphirapo, mu miwiro yawo, mbumba na mbumba, kwakuyana na nyumba za ŵawiskewokuru.

³¹Ŵakati ŵapenda ŵa fuko la Zebuloni unandi wawo ŵakaŵa vikwi 57,400.

³²Mu mphapu ya Yosefe, ŵeneawo mba fuko la Efurayimu, ŵakalemba mazina gha ŵanarume wose awo ŵakaŵa ŵakwenerera kurwa nkhondo, ŵa virimika 20 na ŵakujumphirapo, mu miwiro yawo, mbumba na mbumba, kwakuyana na nyumba za ŵawiskewokuru.

³³Ŵakati ŵapenda, ŵa fuko la Efurayimu unandi wawo ŵakaŵa 40,500.

³⁴Ŵa fuko la Manase, ŵakalemba mazina gha ŵanarume wose awo ŵakaŵa ŵakwenerera kurwa nkhondo, ŵa virimika 20 na ŵakujumphirapo, mu miwiro yawo, mbumba na mbumba, kwakuyana na nyumba za ŵawiskewokuru.

³⁵Ŵakati ŵapenda, ŵa fuko la Manase unandi wawo ŵakaŵa 32,200.

³⁶Mu fuko la Benjamini, ŵakalemba mazina gha ŵanarume wose awo ŵakaŵa ŵakwenerera kurwa nkhondo, ŵa virimika 20 na ŵakujumphirapo, mu miwiro yawo, mbumba na mbumba, kwakuyana na nyumba za ŵawiskewokuru.

³⁷Ŵakati ŵapenda, ŵa fuko la Benjamini unandi wawo ŵakaŵa 35, 400.

³⁸Mu fuko la Dani, ŵakalemba mazina gha ŵanarume wose awo ŵakaŵa ŵakwenerera kurwa nkhondo, ŵa virimika 20 na ŵakujumphirapo, mu miwiro yawo, mbumba na mbumba, kwakuyana na nyumba za ŵawiskewokuru.

³⁹Ŵakati ŵapenda, ŵa fuko la Dani unandi wawo ŵakaŵa 62,700.

⁴⁰Mu fuko la Ashere, ŵakalemba mazina gha ŵanarume wose awo ŵakaŵa ŵakwenera kurwa nkhondo, ŵa virimika 20 na ŵakujumphirapo, mu miwiro yawo, mbumba na mbumba, kwakuyana na nyumba za ŵawiskewokuru.

⁴¹Ŵakati ŵapenda, ŵa fuko la Ashere unandi wawo ŵakaŵa 41,500.

⁴²Mu fuko la Nafutali, ŵakalemba mazina gha ŵanarume wose awo ŵakaŵa ŵakwenerera kurwa nkhondo, ŵa virimika 20 na ŵakujumphirapo, mu miwiro yawo, mbumba na mbumba, kwakuyana na nyumba za ŵawiskewokuru.

⁴³Ŵakati ŵapenda, ŵa fuko la Nafutali unandi wawo ŵakaŵa 53,400.

⁴⁴Aŵa ndiwo ŵeneawo Mozesi na Aroni ŵakaŵapenda pakovwirana na ŵarongozgi ŵa ŵaIsraele 12 awo ŵakimilira nyumba za ŵawiskewokuru.

⁴⁵Ntheura ŵanarume wose ŵa mu Israele ŵenawo ŵakaŵa ŵakwenerera kurwa nkhondo, ŵa virimika 20 na ŵakujumphirapo, kwakuyana na nyumba za ŵawiskewokuru,

⁴⁶wose pamoza unandi wawo ŵakaŵa 603,550.

⁴⁷Kweni ŵa fuko la Levi kuti ŵakapendeka pamoza na ŵanyawo chara, kwakuyana na nyumba za ŵawiskewokuru,

⁴⁸chifukwa FUMU yikati kwa Mozesi,

⁴⁹“Ŵa fuko la Levi pera ureke kuŵapenda, panji kuti ureke kuŵapendera lumoza na ŵaIsraele ŵanyakhe.

⁵⁰Uŵimike ŵaLevi kuti ŵasungenge Chihema cha Ukaboni, na viteŵetero vyose, ndiposo na vyose ivyo vili mwenemumo. Ŵayeghenge Chihema pamoza na viteŵetero vyose, ndipo ndiwo ŵati ŵachipwerererenge. Iwo ŵimikenge mahema ghawo kuzingirizga Chihema chira.

⁵¹Para ŵakuchiwuskapo Chihema chira, ŵaLevi ndiwo ŵati ŵachibwangandulirenge pasi, ndipo para ŵakukhumba kujintha, ndiwoso ŵati ŵachimikenge. Ndipo usange munthu munyakhe yose wakwiza pafupi, wati wakomekenge.

⁵²ŴaIsraele ŵati ŵazenge mahema ghawo mpingo na mpingo, munthu yose pa msasa wakhe na wakhe pa ndembera yakhe na yakhe.

⁵³Kweni ŵaLevi ndiwo ŵati ŵimikenge mahema ghawo kuzingirizga Chihema cha Ukaboni, mwakuti ukari wa FUMU ureke kwiza pa mpingo wa ŵaIsraele. ŴaLevi ndiwo ŵati ŵasungenge Chihema cha Ukaboni chira.

⁵⁴Ntheura ndimo ŵaIsraele ŵakachitira. Iwo ŵakachita kwakulingana na vyose ivyo FUMU yikamulangulira Mozesi.”