Read new_tumbuka_bible Kupenda 10 Bible Online

Kupenda 10 - new_tumbuka_bible bible

Kupenda 10

¹FUMU yikati kwa Mozesi,

²“Nozga mbata ziŵiri za siliva pakuzifura na nyondo. Izi ndizo uti uchemerenge mpingo, ndiposo na kuwuskirapo msasa.

³Para zalira zose ziŵiri, mpingo wose uwunganenge kwa iwe pa muryango wa Chihema Chakukumaniranamo.

⁴Kweni para ŵalizga mbata yimoza pera, penepapo ŵarongozgi, awo mbarara ŵa mafuko gha Israele, ndiwo ŵati ŵawunganenge kwa iwe.

⁵Para walizga mbata yakuchenjezga, ŵa mu misasa iyo yili ku mafumiro gha dazi ŵati ŵawukenge.

⁶Para ŵalizga kachiŵiri mbata yakuchenjezga, ŵa mu misasa iyo yili ku mwera ŵati ŵawukenge. Mbata ya kuchenjezga yiti yilirenge pa nyengo yose iyo ŵati ŵawukirengepo.

⁷Kweni para mukukhumba kuti mpingo uwungane pamoza, muti mulizgenge mbata, kweni kaliriro kakhe kaŵe kambula kuchenjezga.

⁸Ŵasofi ŵa mbumba ya Aroni ndiwo ŵati ŵalizgenge zimbata. Mlimo wa kulizga mbata utiŵenge dango la muyirayira ku miwiro yose.

⁹Para mukuruta ku nkhondo mu charu chinu kuya karwa na ŵarwani awo ŵakumutindiŵizgirani pasi, penepapapo ndipo mukalizgenge mbata zakuchenjezga, kuti FUMU, Chiuta winu wamukumbukani na kumuponoskani ku ŵarwani ŵinu.

¹⁰Pa zuŵa lakukondwa kwinu, pa viphikiro vyinu ivyo vili kwimikika, pa viphikiro vya kuthwasa kwa mwezi, mukalizgenge mbata zinu pa sembe zinu zakocha mburuma na pa sembe zinu zakukoma za wenenawene. Izi ziti zimovwirani kukumbukira Chiuta winu. Ine ndine FUMU, Chiuta winu.”

¹¹Pa zuŵa la 20, mu mwezi wa chiŵiri, mu chirimika cha chiŵiri, bingu likasezgekapo pa Chihema cha Ukaboni.

¹²Sono ŵaIsraele ŵakawuka ulendo wawo kufuma mu mapopa gha Sinayi. Bingu lira likaya kimilira mu mapopa gha Parani.

¹³Iyi yikaŵa nyengo yawo yakudanga kuti ŵawuke ulendo wawo kwakuyana na umo FUMU yikaŵalangulira mwa Mozesi.

¹⁴Awo ŵakamba kuwuka ulendo wawo ŵakaŵa ŵa ndembera ya msasa wa ŵaYuda, wupu na wupu. Nashoni mwana wa Aminadabu ndiyo wakaŵa murongozgi wawo ŵasilikari.

¹⁵Netanele mwana wa Zuwara ndiyo wakaŵa murongozgi wa nkhondo ya fuko la Isakara.

¹⁶Eliyabu mwana wa Heloni ndiyo wakaŵa murongozgi wa nkhondo ya fuko la Zebuloni.

¹⁷Ndipo para Chihema ŵakachiwiskira, ŵaGerishoni na ŵaMerari, ŵeneawo ŵakayegha Chihema chira, ŵakawuka ulendo wawo.

¹⁸Pamanyuma ŵa ndembera ya msasa ŵaRubeni ŵakawuka ulendo kwenda wupu na wupu. Murongozgi wawo wa nkhondo wakaŵa Elizuru mwana wa Sheduru.

¹⁹Murongozgi wa nkhondo wa fuko la Simiyoni wakaŵa Shelumiyele mwana wa Zurishadayi.

²⁰Murongozgi wa nkhondo wa fuko la Gadi wakaŵa Eliyasafu mwana wa Duwele.

²¹Sono ŵaKohati ŵakawuka ulendo uku ŵayegha vinthu vyakupatulika, ndipo Chihema chikajinthika pambere iwo ŵandafike.

²²Ndipo ŵa ndembera ya msasa wa ŵaEfurayimu ŵakawuka ulendo wupu na wupu. Murongozgi wawo wa nkhondo wakaŵa Elishama mwana wa Amihudi.

²³Murongozgi wa ŵasilikari ŵa fuko la wa ŵaManase wakaŵa Gamaliyele mwana wa Pedazuru.

²⁴Murongozgi wa nkhondo wa fuko la Benjamini wakaŵa Abidani mwana wa Gidiyoni.

²⁵Pa umaliro ŵa ndembera ya msasa wa ŵaDani ŵakawuka ulendo wupu na wupu, nga ndi para mbalinda kunyuma kwa misasa yose. Murongozgi wa nkhondo wakaŵa Ahiyezere mwana wa Amishadayi.

²⁶Murongozgi wa nkhondo wa fuko la Ashere wakaŵa Pagiyele mwana wa Okirani.

²⁷Murongozgi wa nkhondo wa fuko la Nafutali wakaŵa Ahira mwana wa Enani.

²⁸Iyi ndiyo yikaŵa ndondomeko ya kendero ka ŵaIsraele kwakuyana na ŵasilikari ŵawo, para ŵakawukanga ulendo.

²⁹Mozesi wakamuphalira Hobabu mwana wa Rewele muMidiyani, wiskevyara wakhe, kuti, “Ise tikuwuka ulendo kuruta ku malo agho FUMU yikayowoya kuti, ‘Ndamkumupani.’ Murute nase ndipo tamkukhara namwe makora. Pakuti FUMU yapangana kuŵachitira uweme ŵaIsraele.”

³⁰Kweni Hobabu wakamuphalira Mozesi kuti, “Nditi ndirute namwe chara. Nditirutenge ku charu cha kwithu na ku ŵabali ŵane.”

³¹Ndipo Mozesi wakati, “Nkhuŵeya ureke kutisida, pakuti iwe ukumanya na malo apo tikwenera kuzenga misasa yithu mu mapopa ndipo iwe ndiwe wamkutirongoranga.

³²Usange ungaruta nase, kaweme kose ako FUMU yamkutichitira, nase tamkuchitira iwe.”

³³Ntheura ŵakafuma ku Sinayi, phiri la FUMU, na kwenda ulendo wa mazuŵa ghatatu. Bokosi la Phangano la FUMU likaŵadangirira kwa mazuŵa ghatatu ghara kuŵapenjera malo ghakupumulapo.

³⁴Bingu la FUMU ndilo likaŵarongozganga na muhanya para ŵawuka kufuma pa msasa.

³⁵Nyengo yiliyose para Bokosi la Phangano likawukakanga, Mozesi wakayowoyanga kuti, “Wukani, Mwe FUMU, kuti ŵarwani ŵinu ŵambininiske, na kutiso awo ŵakumutinkhani pakuwona imwe ŵachimbire.”

³⁶Ndipo para limilira, iyo wakati, “Wererani, Mwe FUMU ku vikwi na vikwi vya ŵanthu ŵinu ŵaIsraele.”