Read new_tumbuka_bible Kupenda 11 Bible Online

Kupenda 11 - new_tumbuka_bible bible

Kupenda 11

¹Zuŵa limoza ŵanthu ŵakasinginikira FUMU chifukwa cha soka lawo. Para FUMU yikapulika ichi, iyo yikakwiya chomene, ndipo moto wa FUMU ukabuka mukati mwawo na kumyangura chigaŵa chimoza cha msasa.

²Ŵanthu ŵakalira kwa Mozesi. Mozesi wakaromba kwa FUMU, ndipo moto ukazimwa.

³Ntheura malo ghara ghakachemeka Tabera, chifukwa moto wa FUMU ukabuka mukati mwawo.

⁴Pa nyengo chiwuru cha ŵanthu awo ŵakaŵa mukati mu ŵaIsraele chikaŵa na chilyokolyoko chikuru cha nyama. ŴaIsraele nawo ŵakamba kusinginika ŵakati, “Mbaya mwe, mphanyi taryanga nyama!

⁵Tikukumbuka somba izo tikaryanga mu Eguputo kwambula kulipira, vimphwete, vinkhaka, hanyezi za mitundumitundu.

⁶Kweni sono nkhongono zithu zamara, ndipo palije kanthu kanyakhe ako tikurya kweni mana pera.” (

⁷Sono mana yikaŵa nga ndi njere la muchese, ndipo yikawoneka nga ndi ulimbo wa nthura na wakulangala.

⁸Ŵanthu ŵakarutanga uku na uku kukayora mana, ndipo ŵakaskanga pa mphero panji kupura mu mathuli. Ŵakaphikanga mu viŵiya na kupanga vingwa vipapati. Kanowero kakhe kakaŵa nga nkha vingwa vipapati vyakuphikika na mafuta.

⁹Para jumi likawanga pa msasa na usiku, mana yikawanga pamoza nalo.)

¹⁰Mozesi wakapulika ŵanthu ŵakulira mu mbumba zawo, munthu waliyose pa muryango wa hema lakhe. FUMU yikakwiya chomene, ndipo Mozesi nayo kuti wakakondwa chara.

¹¹Mozesi wakati kwa FUMU, “Kasi mwandisuzgirachi ntheura, nda muteŵeti winu? Kasi nchifukwa uli ndilije kusanga uchizi pa maso pinu, apo mwaŵika katundu ŵanthu wose aŵa pa ine?

¹²Kasi ŵanthu wose aŵa mbana ŵane? Kasi ndine nkhaŵababa apo imwe mukuyowoya kwa ine kuti, ‘Uŵapakate pa chifuŵa chako, nga ndi umo mlezi wakupakatira mwana wakonkha, kuti urute nawo ku charu icho mukapangana kuchipereka ku ŵawiskewokuru?’

¹³Kasi ndiyitorenkhu nyama kuti ndiŵape ŵanthu wose aŵa? Iwo ŵakundilirira ine kuti, ‘Utipe, nyama kuti tirye.’

¹⁴Kuti ndingamanya kuŵapwererera ŵanthu aŵa ndekha chara. Uyu ndi katundu muzitu kwa ine.

¹⁵Usange ndimo muti muchitire nane ntheura, ipo ndikomani waka luŵiro, para ndasanga uchizi pa maso pinu kuti ndireke kuwona kuphatira kwane.”

¹⁶FUMU yikazgora Mozesi kuti, “Undiwunjikire ŵanarume 70 ŵa ŵarara ŵaIsraele, ŵanthu ŵeneawo ukuŵamanya kuti mbarara ŵa ŵanthu ndipo mbarongozgi ŵawo. Wize nawo ku Chihema Chakukumaniranamo, ndipo ŵimilire kwenekuko pamoza na iwe.

¹⁷Ine nditi ndize kwenekuko kwiza kayowoya nawo. Ndizamutorapo chigaŵa cha mzimu uwo uli mwa iwe na kuwuŵika mwa iwo, ndipo ŵati ŵayeghenge katundu wa ŵanthu pamoza na iwe, mwakuti ureke kuyegha wekha.

¹⁸Ndipo uŵaphalire ŵanthu kuti, ‘Mujipatuliske mwaŵene, kunozgekera zuŵa la machero, ndipo muti murye nyama.’” Imwe mwaliranga kwa FUMU mwakuti yipulike kuti, “Ndi njani wati watipe nyama, tirye? Ise tikakharanga makora mu Eguputo.” Ntheura FUMU yiti yimupani nyama ndipo muti murye.

¹⁹Kuti muti murye zuŵa limoza, panji ghaŵiri, panji ghankhonde, nanga ndi mazuŵa khumi panji 20, chara.

²⁰Kweni muti murye mwezi wose wa mphumphu, yisuke yifumire mu mphuno zinu na kumukorani. Chifukwa imwe mwayikana FUMU yeneiyo yili mukati mwinu, ndipo mwalira panthazi pakhe kuti, “Kasi tikafumirachi mu Eguputo?”

²¹Kweni Mozesi wakati, “Ŵanthu ŵeneawo nkhwenda nawo ŵakukwana 600,000 kweni imwe mukuti, ‘Nditi ndiŵape nyama, kuti ŵarye mwezi wose wa mphumphu.’

²²Kasi zingakomeka mberere na mbuzi na ng'ombe zilinga kuti ziŵakwanire? Panji kasi tingaŵawunjikira pamoza somba zose za mu nyanja kuti ziŵakwanire?”

²³Ndipo FUMU yikamuzgora Mozesi kuti, “Kasi nkhongono za FUMU zingapereŵera? Sono uti uwone usange mazgu ghane nga unenesko kwa iwe panji chara.”

²⁴Ntheura Mozesi wakaruta kuya kuŵaphalira ŵanthu mazgu gha FUMU. Wakawunganya ŵanthu 70 kufuma ku ŵarara ŵa ŵanthu, ndipo wakaŵandandika kuzingirizga Chihema.

²⁵Penepapo FUMU yikikhilira mu bingu ndipo yikayowoya kwa Mozesi. Yikatorapo chigaŵa cha mzimu uwo ukaŵa mwa Mozesi na kuwuŵika mu ŵarara ŵara 70. Para chigaŵa cha mzimu chikanjira mwa iwo, ŵakamba kuchima. Kweni kuti ŵakarutilira kuchima chara.

²⁶Sono ŵanthu ŵaŵiri ŵakakhalira mu msasa. Yumoza wakaŵa Elidadi, ndipo munyakhe wakaŵa Medadi. Ŵanthu aŵa ŵakaŵa mukati mwa awo ŵakalembeka kweni kuti ŵakarutako ku Chihema chara. Chigaŵa cha Mzimu chikiza pa iwo, ntheura ŵakamba kuchima mu msasa.

²⁷Munyamata munyakhe wakachimbira na kuya kamuphalira Mozesi kuti, “Elidadi na Medadi ŵakuchima mu msasa.”

²⁸Ndipo Yoshuwa mwana wa Nuni, mweneuyo kufuma ku wanichi wakhe, wakamovwiranga Mozesi wakayowoya wakati, “Sekuru wane Mozesi muŵakanizge.”

²⁹Kweni Mozesi wakati kwa iyo, “Kasi uli na sanje chifukwa cha icho ine nkhuchita? Ndakhumbanga kuti mphanyi ŵanthu wose ŵa FUMU ŵazgoka kuŵa nchimi, na kuti mphanyi FUMU yikaŵika mzimu wakhe pa iwo!”

³⁰Penepapo Mozesi wakiza na kuŵa pamoza na ŵarara ŵa ŵaIsraele ku msasa.

³¹FUMU yikawuska mphepo yeneiyo yikiza na swembe kufumira ku nyanja, ndipo yikazimbotoska pafupi na msasa. Viyuni ivi vikambotokera kosekose kuzingirizga msasa vikenda ulendo wa zuŵa limoza. Ndipo zikarundana kufika pa mita limoza, kufuma pasi kufika pachanya.

³²Ŵanthu ŵakawuka na kuziwunjika swembe zira zuŵa lose lira, ndiposo na usiku wose ura, na zuŵa lose la machero ghanyakhe. Awo ŵakawunjika zichoko, ndi ŵeneawo ŵakawunganya za uzitu wa mahomeri khumi. Ndipo ŵakanika swembe zira kuzingirizga msasa.

³³Ndipo, apo nyama yikaŵa yichali mu mlomo mwawo, pambere ŵandamire, ukari wa FUMU ukagolera pa ŵanthu ŵara, ndipo FUMU yikakoma ŵanthu na nthenda yakofya.

³⁴Ntheura malo ghara ghakathyika Kibiroti Hataava,[1] chifukwa penepara ndipo ŵakasunga ŵanthu awo ŵakaŵa na chiryoko.

³⁵Kufuma pa Kibiroti Hataava ŵanthu ŵakenda kuruta ku Hazeroti, ndipo ŵakakhara penepara.