Read new_tumbuka_bible Kupenda 12 Bible Online

Kupenda 12 - new_tumbuka_bible bible

Kupenda 12

¹Miriyamu na Aroni ŵakamba kususka Mozesi chifukwa cha mwanakazi muEtiyopiya mweneuyo Mozesi wakatora, pakuti wakatora mwanakazi muEtiyopiya.

²Iwo ŵakati, “Kasi mbunenesko kuti FUMU yayowoya kwizira kwa Mozesi pera? Asi nthena wayowoyera na mwa ise wuwo?” FUMU yikapulika ivi.

³Sono Mozesi wakaŵa munthu wakuzika chomene, kuruska ŵanthu wose awo ŵakaŵa pa charu.

⁴Mwa mabuchibuchi FUMU yikayowoya kwa Mozesi na kwa Aroni na Miriyamu kuti, “Zani kuno ku Chihema Chakukumaniranamo mose mwa ŵatatu.” Ndipo wose ŵatatu ŵakaruta.

⁵FUMU yikakhira mu bingu lakuti pholi, yikimilira pa muryango wa Chihema. Yikachema Aroni na Miriyamu, ndipo wose ŵaŵiri wuwo ŵakiza.

⁶FUMU yikati, “Pulikani mazgu ghane. Usange yilimo nchimi mukati mwinu, ine FUMU nkhujirongora ndekha kwa iyo mu mboniwoni nkhuyowoya nayo mu maloto.

⁷Ndimo kuli kuŵira na muteŵeti wane Mozesi chara. Iyo ngwa magomezgeko mu nyumba yane yose.

⁸Iyo nkhuyowoya nayo mlomo na mlomo, mwakupulikikwa makora ndipo kuti nkhuyowoyera mu vinthanguni chara. Iyo wakuwona kaŵiro ka FUMU. Ntheura kasi nchifukwa uli mukawura kopa kwimikana nayo muteŵeti wane Mozesi?”

⁹Ukari wa FUMU ukagolera pa iwo, ndipo yikawukapo.

¹⁰Apo bingu likawukangapo pa Chihema, Miriyamu wakaŵa na vyoni, tuu nga ndi thonje. Aroni wakang'anamukira kwa Miriyamu, ndipo wakawona kuti wali na vyoni.

¹¹Sono Aroni wakati kwa Mozesi, “Mwe Fumu yane, rekani kutilanga chifukwa cha kwananga uku tachitira mu uchindere.

¹²Miriyamu wareke kupimika nga ndi mwana uyo wababika wakufwa mweneuyo hafu wa thupi lakhe waryeka kufuma mu nthumbo ya ŵanyina.”

¹³Sono Mozesi wakaromba kwa FUMU wakati, “Mwe Chiuta, nkhumuŵeyani muchizgani.”

¹⁴Kweni FUMU yikati kwa Mozesi, “Ŵawiske ŵamufunyirenge mata pa chisko chakhe, asi mphanyi waŵa na soni mazuŵa ghankhonde na ghaŵiri? Iyo wajarilike kuwaro kwa msasa mazuŵa ghankhonde na ghaŵiri, ndipo pamanyuma pakhe mumutoreso mu msasa.”

¹⁵Ntheura Miriyamu wakajalirika kuwaro kwa msasa mazuŵa ghankhonde na ghaŵiri. Ŵanthu kuti ŵakendaso ulendo chara wakasuka Miriyamu wakawereraso mu msasa.

¹⁶Pamanyuma pa ichi ŵanthu ŵara ŵakawuka ulendo kufuma ku Hazeroti ndipo ŵakaya kazenga misasa yawo mu mapopa gha Parani.