Read new_tumbuka_bible Kupenda 13 Bible Online

Kupenda 13 - new_tumbuka_bible bible

Kupenda 13

¹FUMU yikati kwa Mozesi,

²“Tuma ŵanthu kuya kaskora charu cha Kanani, cheneicho nkhupereka ku ŵaIsraele. Mu fuko lirilose la ŵawiskewokuru utume munthu yumoza, mweneuyo ndi murongozgi mukati mwawo.”

³Ntheura Mozesi wakaŵatuma kufumira mu mapopa gha Parani, kwakuyana na languro la FUMU, ndipo wose ŵara ndiwo ŵakaŵa ŵarongozgi mu ŵaIsraele.

⁴Agha ndigho ghakaŵa mazina ghawo: Mu fuko la Rubeni, wakatuma Shamuwa mwana wa Zakuru.

⁵Mu fuko la Simiyoni, wakatuma Shafati mwana wa Hori.

⁶Mu fuko la Yuda, wakatuma Kalebu mwana wa Yefune.

⁷Mu fuko la Isakara, wakatuma Igala mwana wa Yosefe.

⁸Mu fuko la Efurayimu wakatuma Hosheya mwana wa Nuni.

⁹Mu fuko la Benjamini wakatuma Paliti mwana wa Rafu.

¹⁰Mu fuko la Zebuloni, wakatuma Gadiyele mwana wa Sodi.

¹¹Mu fuko la Yosefe (ndiko kuti mu fuko la Manase) wakatuma Gadi mwana wa Susi.

¹²Mu fuko la Dani, wakatuma Amiyele mwana wa Gemali.

¹³Mu fuko la Ashere, wakatuma Seturu mwana wa Mikayele.

¹⁴Mu fuko la Nafutali, wakatuma Nabi mwana wa Vofisi.

¹⁵Mu fuko la Gadi, wakatuma Guwele mwana wa Maki.

¹⁶Agha ndigho ghakaŵa mazina gha ŵanthu ŵeneawo Mozesi wakaŵatuma kuya Kaskora charu. Ndipo Hosheya mwana wa Nuni, Mozesi wakamuthya zina la Yoshuwa.

¹⁷Mozesi wakaŵatuma kuya kaskora charu cha Kanani, ndipo wakati kwa iwo, “Rutani kura mu charu cha Negebu ndipo mukakwerere ku charu cha mapiri.

¹⁸Mukawone umo charu chiliri, usange ŵanthu wose ŵakukhara mwenemumo mbankhongono panji mbambula nkhongono, usange mbachoko panji mbanandi.

¹⁹Mukawone usange charu icho ŵakukharamo nchiweme panji nchiheni ndiposo usange misumba iyo ŵakukharamo ndi misasa panji malinga.

²⁰Mukawoneso usange charu nchisambazi panji nchikavu ndipo usange makuni ghalimo panji chara. Muŵe ŵa chikanga, ndipo mukayegheko vinyakhe mwa vipambi vya charu chira.” Sono iyi yikaŵa nyengo ya kuphya kwa vipambi vyakudanga vya mpheska.

²¹Ntheura ŵakaruta ndipo ŵakaskora charu kufumira ku mapopa gha Zini mpaka ku Rehobu, kufupi na chipata cha Hamati.

²²Ŵakaruta mu charu cha Negebu ndipo ŵakafika ku Heburoni, mwenemumo mukakharanga Ahimani, Sheshayi na Talimayi, ŵa mphapu ya Anaki. (Heburoni wakazengeka virimika vinkhonde na viŵiri pambere Zowani wandazengeke ku Eguputo.)

²³Ŵakiza ku Dambo la Eshikolo, ndipo ŵakatemako munthavi uwo ukaŵa khunje la mpheska. Ŵakayegha ŵanthu ŵaŵiri pakuchita kupayika pa khuni. Ŵakatorakoso na vipambi vya magalagadeya na vikuyu.

²⁴Malo ghara ŵakaghathya Dambo la Eshikolo chifukwa cha khunje la mpheska ilo ŵaIsraele ŵakatemako.

²⁵Pa umaliro wa mazuŵa 40 ŵakawerako uko ŵakaya kaskora charu.

²⁶Iwo ŵakiza kwa Mozesi na Aroni na ku mpingo wose wa ŵaIsraele ku Kadeshi mu mapopa gha Parani. Ŵakaphara na umo ŵakendera kwa iwo ku mpingo wose wa ŵaIsraele, ndipo ŵakaŵarongora vipambi vya charu chira.

²⁷Ŵakamuphalira Mozesi kuti, “Tikaya kafika ku charu icho imwe mukatitumako. Ndi charu cha mkaka na uchi, ndipo ivi ndivyo vipambi vyakhe.

²⁸Kweni ŵanthu awo ŵakukhara mu charu chira mbankhongono ndipo misumba yawo yili kukhozgeka na malinga ndiposo njikuru chomene. Na kweni nako tikawonaso ŵa mphapu ya Anaki kwenekura.

²⁹ŴaAmaleki ŵakukhara mu charu cha Negebu. ŴaHiti, ŵaYebusi, na ŵaAmori ŵakukhara mu charu cha mapiri. ŴaKanani ŵakukhara mu mphepete mwa nyanja, ndiposo na mu mphepete mwa mronga wa Yorodani.”

³⁰Kweni Kalebu wakachetamiska ŵanthu panthazi pa Mozesi, wakati, “Tiyeni tirutenge luŵiro na kuchihara charu, chifukwa tingamanya kuŵathereska.”

³¹Penepapo ŵanthu awo ŵakaruta nayo ŵakati, “Ise tingamanya kwimikana nawo ŵanthu ŵara chara, chifukwa mbankhongono kuruska ise.”

³²Ntheura ŵakiza ku ŵaIsraele na lumbiri luheni lwa charu chira ŵakaya kaskoranga, ŵakati

³³“Kwenekura tikawona vya Nefilimu (ŵa mphapu ya Anaki ŵakafuma mu ŵaNefilimu). Ise tikajiwonanga nga mphazi, ntheura ndimo tikawonekangaso kwa iwo.”