Read new_tumbuka_bible Kupenda 14 Bible Online

Kupenda 14 - new_tumbuka_bible bible

Kupenda 14

¹Penepapo mpingo wose ukachemerezga chomene, ndipo usiku ura ŵanthu ŵakalira chomene.

²ŴaIsraele wose ŵakadinginyikira Mozesi na Aroni. Mpingo wose ukati kwa iwo, “Mphanyi kukaŵa kuweme kuti ise tikafwire mu charu cha Eguputo, panji kuti tifwire waka mu mapopa mwenemuno.

³Chifukwa uli FUMU yikutitorera ku charu chira, kuti tikakomeke waka mu nkhondo? Ŵawoli ŵithu na ŵana ŵithu ŵati ŵazgoke kuŵa vyakuskogha. Kasi chingaŵa chiweme chara kwa ise kuti tiwerere ku Eguputo?”

⁴Ndipo ŵakayowoyeskana ŵakati, “Tiyeni, tisore murongozgi, ndipo tiwerere ku Eguputo.”

⁵Penepapo Mozesi na Aroni ŵakawa kavunama panthazi pa ungano wose wa mpingo wa ŵaIsraele.

⁶Yoshuwa mwana wa Nuni na Kalebu mwana wa Yefune, ŵeneawo ŵakaŵa mukati mu ŵanthu ŵara ŵakaya kaskoranga charu, ŵakaparura vyakuvwara vyawo.

⁷Ndipo iwo ŵakati ku mpingo wose wa ŵaIsraele, “Charu icho tikendamo kuya kachiskora nchiweme kwakuruska.

⁸Usange FUMU yikukondwa nase, yamkutitorera ku charu icho ndipo yamkuchipereka kwa ise, charu cha mkaka na uchi.

⁹Kweni, rekani kugarukira FUMU. Rekani kopa ŵanthu ŵa charu chira, pakuti iwo tamkuŵamara petu. Iwo ŵalije wakuŵavikirira, kweni FUMU yili nase. Rekani kuŵawopa.”

¹⁰Kweni mpingo wose ukatenge uŵadine na mawe. Penepapo uchindami wa FUMU ukaŵawonekera ŵaIsraele wose mu Chihema Chakukumaniranamo.

¹¹FUMU yikati kwa Mozesi, “Kasi ŵanthu aŵa ŵati ŵandiyuyure mpaka pauli? Ndiposo kasi ŵati ŵareke kupulikana nane mpaka pauli, uku ine ndaŵachitira vimanyikwiro vyose ivyo mukati mwawo?

¹²Nditi ndiŵakome na nthenda yakofya na kuŵapoka chiharo, ndipo nditi ndikuzgore iwe kuŵa fuko likuru na lankhongono kuruska iwo.”

¹³Kweni Mozesi wakati kwa FUMU, “ŴaEguputo ŵati ŵavipulike vinthu ivi, pakuti ndimwe mukaŵafumya ŵanthu aŵa mukati mwawo na nkhongono zinu.

¹⁴ŴaEguputo ŵati ŵaŵaphalire ŵanthu ŵa mu charu ichi. Iwo ŵali kupulika kuti imwe, Mwe FUMU, muli mukati mu ŵanthu aŵa. Pakuti imwe, Mwe FUMU, mukuŵawonekera maso na maso, ndipo bingu linu likwimilira pa iwo. Imwe mukuŵadangirira mu mzati wa bingu na muhanya ndipo mu mzati wa moto na usiku.

¹⁵Sono usange mwaŵakomera pamoza ŵanthu wose aŵa, penepapo mafuko gheneagho ghati ghapulike lumbiri lwinu, ghati ghayowoyenge kuti,

¹⁶FUMU yaŵakomera mu mapopa chifukwa yikatondeka kuŵatorera ŵanthu aŵa ku charu icho yikarapa kuŵapa.

¹⁷Sono nkhumurombani, mazaza ghinu FUMU ghaŵe ghakuru nga ndi umo muli kupanganirana kuti,

¹⁸‘FUMU njakuziwurika kukaripa, ndipo njakuzura na chisungusungu, yikugowokera zakwananga na majuvyo. Kweni yirekenge kulanga ŵakwananga chara. Yikulanga ŵana chifukwa cha zakwananga za ŵawiskewokuru mpaka pa muwiro wa chitatu na wa chinayi.’

¹⁹Nkhumurombani, gowokerani uheni wa ŵanthu aŵa kwakuyana na ukuru wa chisungusungu chinu, ndiposo nga ndi umo mwagowokeranga ŵanthu aŵa, kufuma ku Eguputo mpaka na sono.”

²⁰Penepapo FUMU yikati, “Ndaŵagowokera kwakuyana na mazgu ghako.

²¹Kweni nadi nkhurapa umo ine ndiliri wamoyo ndiposo na umo charu chose chikuzulira na uchindami wa ine FUMU,

²²palije na yumoza wa ŵanthu awo ŵawona uchindami wane na vimanyikwiro vyane ivyo nkhachita mu Eguputo na mu mapopa, ndipouli ŵandiyezga ine mwa kakhumi kose kweni ŵalije kundipulikira,

²³ŵeneawo wati wachiwone charu icho nkharapa kuŵapa ŵawiskewokuru. Palije na yumoza wa awo ŵakandiyuyura mweneuyo wamkuchiwona.

²⁴Kweni muteŵeti wane Kalebu, chifukwa wali na mzimu wa pa dera, ndipo wandirondezga ine fikepo, nditi ndimutorere ku charu icho wakarutako ndipo ŵa mphapu yakhe ndiwo ŵamuchihara.

²⁵Sono pakuti ŵaAmaleki na ŵaKanani ŵakukhara mu vidika, na machero ndipo muzgokere ku dera la ku mapopa na kuruta ku nthowa ya ku Nyanja ya Matete.”

²⁶FUMU yikati kwa Mozesi na Aroni,

²⁷“Kasi mpingo wakubendera uwu uti undisinginikirenge mpaka pauli? Ndapulika kusinginika kwa ŵaIsraele uko ŵakuchitira ine.

²⁸Uŵaphalire kuti FUMU yikuti, ‘Nkhurapa nadi, icho mwandiyowoyera nditi ndimuchitirani.

²⁹Mufwenge ndipo vitanda vyinu viŵenge posepose mu mapopa. Ŵanthu wose, kwamba ŵa virimika 20 na ŵakujumphirapo mwa awo ŵandisinginikira ine,

³⁰palije nanga njumoza uyo wamkunjira mu charu icho nkharapa kumukharikanimo, kweni Kalebu pera mwana wa Yefune na Yoshuwa mwana wa Nuni.

³¹Ŵana ŵinu, ŵeneawo mukatenge ŵatorekenge kuŵa ŵazga, ndiwo ndamkuŵanjizgamo, ndipo ndiwo ŵamkuchimanya charu icho imwe mwachinyoza.

³²Kweni imwe vitanda vyinu viti viŵenge posepose mu mapopa.

³³Ŵana ŵinu ŵamkuŵa ŵaliska mu mapopa kwa virimika 40, ndipo ŵamkusuzgika chifukwa chakuwura kugomezgeka kwinu, mpaka mumare na kufwa mu mapopa.

³⁴Muti mulangike virimika 40 chifukwa cha zakwananga zinu, kupenda chirimika chimoza pa zuŵa lirilose la mazuŵa 40, gheneghara mukaya kaskoreranga charu. Mwamkuwumanya uheni wakwimikana nane.

³⁵Ine FUMU, ndarapa nadi kuti ichi ndicho ndamkuchitira mpingo wose wakubendera uwu, weneuwu wawungana pamoza kwimikana nane. Ŵati ŵamalirenge muno mu mapopa na kufwira mwenemuno.’ ”

³⁶Sono ŵanthu ŵeneawo Mozesi wakaŵatuma kuya kaskora charu, ndipo ŵeneawo pakuwerako ŵakawuska mpingo wose kumusinginikira Mozesi pakwiza na mbiri yiheni ya charu chira,

³⁷ŵanthu aŵa nawo ŵakiza na lumbiri luheni lwa charu chira ŵakafwa na nthenda yakofya panthazi pa FUMU.

³⁸Kweni Yoshuwa mwana wa Nuni na Kalebu mwana wa Yefune ndiwo ŵakakharako ŵamoyo, mu ŵanthu wose awo ŵakatumika kuya kaskora charu.

³⁹Mozesi wakaŵandulira ŵaIsraele wose mazgu agha, ndipo ŵanthu ŵakatengera chomene.

⁴⁰Ŵakawuka na mulenjelenje na kukwerera ku charu cha mapiri, ŵakati, “Ise pano tanozgeka kukwerera ku malo gheneagho FUMU yikapangana kutipa. Ise tananga nadi.”

⁴¹Kweni Mozesi wakati, “Chifukwa uli sono mukujumpha marango gha FUMU, pakuti ichi kuti chiti muwovwirani chara?

⁴²Rekani kurutako mzire mukomeke panthazi pa ŵarwani ŵinu, chifukwa FUMU kuti yili mukati mwinu chara.

⁴³Pakuti kura ŵaAmaleki, ŵaKanani wakumulindizgani ndipo mwamkukomeka na lupanga. FUMU kuti yamkuŵa namwe chara chifukwa ndareka kuyirondezga.”

⁴⁴Kweni ŵakakoserezga kuruta ku charu cha mapiri, nangauli Bokosi la Phangano la FUMU likafumamo mu msasa chara, nesi Mozesi.

⁴⁵Penepapo ŵaAmaleki na ŵaKanani, awo ŵakakharanga mu charu cha mapiri chira, ŵakakhira na kuŵaruska ndipo ŵakaŵarondora mpaka ku Horima.