Read new_tumbuka_bible Kupenda 15 Bible Online

Kupenda 15 - new_tumbuka_bible bible

Kupenda 15

¹FUMU yikati kwa Mozesi,

²“Uŵaphalire ŵaIsraele kuti, ‘Para mwaya kafika mu charu icho mwamkukharamo, cheneicho nkhumupani,

³ndipo para mwamkupereka ng'ombe panji mberere na mbuzi, kuŵa sembe yakocha mburuma, panji sembe yakukoma, panji sembe yakuperekekera kufiska chirapo panji mu wanangwa, panji ya pa viphikiro vyinu vyakwimikika, pakuyichitira FUMU sungu liweme.

⁴Penepapo uyo wamkwiza na chakupereka chakhe wamkupereka kwa FUMU chigaŵa cha khumi cha debe la ufu wakunyiririka wakusazgako lita limoza la mafuta.

⁵Wamkuperekaso vinyo la sembe ya vyakumwa lita limoza. Mwamkunozgera pamoza na sembe yakocha mburuma panji na sembe yakukoma pa mwana-mberere waliyose.

⁶Usange ndi mberere yanarume, mukanozgerenge pamoza na sembe ya vyakurya ya ufu wakunyiririka wakukwana vigaŵa viŵiri mu vigaŵa khumi vya debe wakusazgako mafuta ghakukwana lita limoza na hafu.

⁷Pa chakupereka cha vyakumwa, mukaperekenge vinyo lakukwana lita limoza na hafu, kuti yiŵe sembe yakufumiskira sungu liweme kwa FUMU.

⁸Para mukunozgekera kupereka nkhambako kuŵa sembe yakocha mburuma panji sembe yakukoma kufiskira chirapo, panji ya wenenawene kwa FUMU,

⁹mupereke pamoza na nkhambako yira, chakupereka cha ufu wakunyiririka wakukwana vigaŵa vitatu mu vigaŵa khumi vya debe wakusazgikana na mafuta ghakukwana malita ghaŵiri.

¹⁰Pa chakupereka cha vyakumwa mukaperekenge vinyo lakukwana malita ghaŵiri nga ndi sembe yakocha, yakufumiskira sungu liweme kwa FUMU.’

¹¹“Ntheura ndimo viti vichitikirenge pa nkhambako yiliyose, panji pa mberere yanarume, panji mwana-mberere mwanarume, panji kazinyani,

¹²kwakulingana na unandi wa ivyo muperekenge pa nyama yiliyose iyo yikuperekeka, chakupereka chakusazgirapo chiŵenge kwakuyana na umo ziliri nyama.

¹³Wose awo mbenecharu ŵachitenge vinthu ivi mu nthowa iyi pakupereka sembe yakocha moto pa moto, yakufumiskira sungu liweme kwa FUMU.

¹⁴Usange mulendo uyo wakupanjwa mwa imwe panji yose uyo wakukhara mukati mwinu mu miwiro yinu yose, wakukhumba kupereka sembe yakocha pa moto, yakufumiskira sungu liweme kwa FUMU, wachitenge nga ndi umo mukuchitira imwe.

¹⁵Paŵenge dango limoza pera pakati pa imwe na mulendo mweneuyo wakupanjwa mwa imwe, leneilo nda muyirayira mu miwiro yinu yose. Nga ndi umo muliri imwe, ndimo wati waŵirenge panthazi pa FUMU uyo wakupanjwa mwa imwe.

¹⁶Paŵenge dango limoza pera ndiposo na languro limoza pera pakati pa imwe na pa mulendo mweneuyo wakupanjwa mwa imwe.”

¹⁷FUMU yikati kwa Mozesi,

¹⁸“Uŵaphalire ŵaIsraele kuti, ‘Para mwaya kafika ku charu cheneicho nkhumutoreraniko,

¹⁹ndipo para mwamkurya chakurya cha mu charu chira mukatorengepo chinyakhe kuŵa chakupereka kwa FUMU.

²⁰Pa vingwa vyakupangika ku ufu, mwamkupereka chingwa chipapati kuŵa sembe. Mukapereke nga ndi umo mukuperekera sembe ya pa luwugha.

²¹Mu miwiro yinu yose mwizakaperekenge kwa FUMU chingwa chimoza pa vingwa vyinu vyakudanga.

²²“ ‘Kweni nyengo zinyakhe mungapuvya kwambula kumanya, na kureka kusunga marango ghose agho FUMU yikapereka kwa Mozesi,

²³na vyose ivyo FUMU yikamulangulirani mwa Mozesi, kufuma pa zuŵa ilo FUMU yikaperekera marango, mpaka na kunthazi mu miwiro yinu yose.

²⁴Sono usange chikachitikira mu mphuvya kwambula kuti mpingo wamanya, mpingo wose upereke nkhambako yichoko kuŵa sembe yakocha, yakufumiska sungu liweme kwa FUMU. Upereke pamoza na chakupereka cha ufu na cha vyakumwa, kwakuyana na dango. Uperekeso pepe yumoza kuŵa sembe ya zakwananga.

²⁵Musofi wachite maluso ghakuphepiskira mpingo wose wa ŵaIsraele, ndipo ŵati ŵagowokereke chifukwa ŵakapuvya kwambula kumanya, ndipo chifukwa cha mphuvya zawo, sembe yakocha pa moto kwa FUMU na sembe yakuphepiskira zakwananga zawo panthazi pa FUMU.

²⁶Mpingo wose wa ŵaIsraele uti ugowokerekenge pamoza na ŵalendo ŵeneawo ŵakupanjwa mukati mwawo, pakuti ŵanthu wose ŵakapuvya kwambula kumanya.

²⁷“ ‘Usange munthu yumoza uyo wapuvya kwambula kumanya, iyo wapereke mbuzi yanakazi ya chirimika chimoza kuŵa sembe yakuphepiskira zakwananga.

²⁸Ndipo musofi wati wachite maluso ghakumuphepiskira zakwananga panthazi pa FUMU munthu uyo wachita kwananga mu kuwura kumanya. Ntheura munthu yura wati wagowokerekenge.

²⁹Muti muŵe na dango limoza pera pa uyo wananga kwambula kumanya, manyi ndi mwenecharu mukati mu ŵaIsraele, panji mulendo uyo wakupanjwa mukati mwawo.

³⁰“ ‘Kweni munthu uyo wakunangira dala, manyi ndi mwenecharu panji ndi uyo wakupanjwamo, wakuyuyura FUMU, ndipo munthu uyo wawuskikamo mukati mu ŵanthu ŵanyakhe.

³¹Pakuti wayuyura mazgu gha FUMU, ndiposo waswa dango lakhe, munthu mweneuyo wawuskikiremo nkhanira. Kwananga kwakhe kuŵenge pa iyomwene.’ ”

³²Para ŵaIsraele ŵakaŵa mu mapopa ŵakasanga munthu wakutheza nkhuni pa zuŵa la Sabata.

³³Awo ŵakamusanga wakutheza nkhuni ŵakiza nayo kwa Mozesi na Aroni, ndiposo na ku mpingo wose.

³⁴Iwo ŵakamuŵika danga mu gadi chifukwa chikamanyikwa makora chara icho ŵakenera kuchita nayo.

³⁵Sono FUMU yikayowoya kwa Mozesi kuti, “Munthu uyu wakwenera kukomeka. Mpingo wose umudine na mawe kuwaro kwa msasa.”

³⁶Penepapo mpingo wose ukamutorera kuwaro kwa msasa, na kumudina na mawe mpaka wakafwa, kwakuyana na umo FUMU yikamulangulira Mozesi.

³⁷FUMU yikati kwa Mozesi,

³⁸“Yowoya na ŵaIsraele ndipo uŵaphalire kuti mu miwiro yawo yose ŵasonererengemo mphonje pa chingodya cha vyakuvwara vyawo na kuŵika kachingwe ka bululu pa mphonje ya pa chingodya chilichose.

³⁹Mphonje iyi yizamkuŵa yakumukumbuskani, ndipo nyengo yose para mwayilaŵiska mukumbukenge marango ghose gha FUMU, kuti mughasungenge kwambula kurondezga vya mu mitima yinu, na ivyo maso ghinu ghakuviwona, vyeneivyo mukunweka kuvirondezga kwambula kujikora.

⁴⁰Ntheura muti mukumbukenge na kuchita marango ghane ghose, na kuŵa ŵakupatulika pa maso pa Chiuta winu.

⁴¹Ine ndine FUMU, Chiuta winu, mweneuyo wakamufumyani mu charu cha Eguputo, kuti ndiŵe Chiuta winu. Ine ndine FUMU, Chiuta winu.”