Read new_tumbuka_bible Kupenda 16 Bible Online

Kupenda 16 - new_tumbuka_bible bible

Kupenda 16

¹Kora mwana wa Izihara, mwana wa Kohati muLevi, pamoza na Datani na Abiramu ŵana ŵa Eliyabu, ndiposo na Oni mwana wa Peleti wa mphapu ya Rubeni,

²wakakopakopa ŵanthu. Iwo ŵakimikana na Mozesi pamoza na ŵarongozgi ŵa ŵaIsraele 250, ŵeneawo ŵakasoreka mu mpingo, ŵanthu ŵakumanyikwa chomene.

³Wose aŵa ŵakawungana pamoza kwimikana na Mozesi na Aroni kuŵaphalira kuti, “Imwe mwatalulira chomene. Mpingo wose ngwa kupatulika, munthu waliyose uyo wali mwenemumo ngwa kupatulika, ndipo FUMU yili mukati mwawo. Kasi sono nchifukwa uli mukujikwezga mwekha pachanya pa mpingo wa FUMU?”

⁴Para Mozesi wakapulika mazgu agha wakawa kavunama na kuromba.

⁵Pamanyuma pakhe wakayowoya kwa Kora pamoza na mpingo wakhe wose kuti, “Na machero na mulenje FUMU yiti yirongore mweneuyo ngwakhe, ndiposo na uyo ngwa kupatulika, ndipo yiti yimusenderezgere kufupi na iyo. Mweneuyo yamusora yiti yimusenderezgere kufupi na iyo.

⁶Sono iwe Kora na mpingo wako wose mutore majonjo ghakocheramo vyakununkhira.

⁷Na machero muŵikemo moto na vyakununkhira panthazi pa FUMU, ndipo munthu mweneuyo FUMU yamusora ndiyo wati waŵenge wakupatulika. Mwatalulira chomene, imwe ŵaLevi.”

⁸Mozesi wakatiso kwa Kora, “Pulikani sono, imwe mwa ŵaLevi!

⁹Kasi mundakhorwe kuti Chiuta wa Israele wali kumusorani imwe kufuma mu mpingo wa ŵaIsraele, na kumutorerani kufupi na iyo kuti muteŵetenge mu Chihema Chakupatulika cha FUMU, ndiposo na kwimilira panthazi pa mpingo kuwuteŵetera?

¹⁰Ndiposo Chiuta wamutorerani imwe kufupi na iyo, ndiposo na wose ŵabali ŵinu ŵaLevi kuti muŵe nawo pamoza. Kasi mukudokeraso na usofi wuwo?

¹¹Sono uku nkhwimikana na FUMU kuti iwe na mpingo wako wose muwungane pamoza. Kasi Aroni ndi njani kuti mumudinginyikirenge?”

¹²Mozesi wakatuma munthu kuya kachema Datani na Abiramu, ŵana ŵa Eliyabu. Ndipo iwo ŵakati, “Ise kuti tizengeko chara.

¹³Kasi mundakhorwe chara kuti mukatifumya mu charu cha mkaka na uchi, na kwiza katikomera mu mapopa, mwakuti mujizgore mwekha kuŵa karonga withu?

¹⁴Na kwenenako mulije kutitorera ku charu cha mkaka na uchi, nesi kutipa apo tingalima panyakhe minda ya mpheska. Kasi mukukhumba kutizgora vindere. Ise kuti tizengeko chara.”

¹⁵Mozesi wakakaripa chomene, ndipo wakati kwa FUMU, “Mungapokereranga sembe yawo chara. Ndilije kutorapo nanga ndi mbunda yawo yimoza, ndiposo ndindanangirepo nanga njumoza wa iwo.”

¹⁶Sono Mozesi wakati kwa Kora, “Iwe na mpingo wako wose, na machero mukizenge panthazi pa FUMU, iwe wamwene, iwo ndiposo na Aroni.

¹⁷Waliyose wa imwe wize na jonjo lakhe na kuŵikapo vyakununkhira. Waliyose wa imwe wize na jonjo lakhe lakocherapo vyakununkhira panthazi pa FUMU. Majonjo ghaŵe 250, ndipo iwe nawe na Aroni, waliyose wize na jonjo lakhe.”

¹⁸Ntheura waliyose wakatora jonjo lakhe, wakaŵikamo moto na kuŵikapo vyakununkhira, ndipo ŵakimilira pa muryango wa Chihema Chakukumaniranamo pamoza na Mozesi na Aroni.

¹⁹Kora wakawunganya mpingo wose kwimikana nawo pa muryango wa Chihema Chakukumaniranamo. Ndipo uchindami wa FUMU ukawonekera mpingo wose.

²⁰FUMU yikati kwa Mozesi na Aroni,

²¹“Patukaniko ku mpingo uwo, kuti ndiwumare petu mu kanyengo kachoko waka.”

²²Mozesi na Aroni ŵakawa kavunama, ŵakachemerezga ŵakati, “Mwe Chiuta, Chiuta wa mizimu ya ŵanthu wose, kasi muti mukaripire mpingo wose usange ndi munthu yumoza uyo wananga?”

²³Ndipo FUMU yikati kwa Mozesi,

²⁴“Yowoya ku mpingo kuti ŵafumeko ku msasa wa Kora, wa Datani na wa Abiramu.”

²⁵Mozesi wakaruta kwa Datani na Abiramu, ndipo ŵarara ŵaIsraele ŵakamurondezga.

²⁶Mozesi wakawuphalira mpingo wakati, “Nkhumuŵeyani patukaniko ku misasa ya ŵanthu ŵaheni aŵa, ndipo mureke kukhwaska vinthu vyawo mzire mumarire kumoza chifukwa cha mauheni ghawo ghose.”

²⁷Ntheura ŵanthu ŵara ŵakafumako ku msasa wa Kora, wa Datani na wa Abiramu. Penepapo Datani na Abiramu ŵakafuma na kwimilira pa muryango wa misasa yawo pamoza na ŵawoli ŵawo, ŵana ŵawo na twabonda twawo.

²⁸Sono Mozesi wakati, “Na cheneichi muti mumanye kuti FUMU yili kundituma kuchita milimo yose iyi, na kutiso ndilije kwata ndekha.

²⁹Usange ŵanthu aŵa ŵafwenge nga ndi umo ŵakufwira ŵanthu wose, panji chiŵawirenge chinthu icho chikuwira ŵanthu wose, ipo FUMU yilije kundituma.

³⁰Kweni usange FUMU yikuchita chinthu chiphya, ndipo charu chikujula mlomo wakhe na kuŵamira pamoza na vyose ivyo ŵali navyo ndipo ŵakuruta ŵamoyo ku dindi, penepapo ndipo muti mumanye kuti ŵanthu aŵa ŵayiyuyura FUMU.”

³¹Mozesi wakati waka mare kuyowoya mazgu agha, charu apo ŵakimilira chikaŵaŵanuka.

³²Na kuŵamira wose pamoza na ŵa mbumba zawo zose pamoza na katundu wawo yose na ŵanthu wose awo ŵakarondezga Kora pamoza na vyuma vyawo vyose.

³³Ntheura iwo wakanjira ŵamoyo mu dindi, pamoza na vyose ivyo ŵakaŵa navyo. Charu chikaŵabenekerera ndipo ŵakamara petu kufuma mu wumba.

³⁴Sono ŵaIsraele wose awo ŵakaŵazingirizga ŵakachimbira pakupulika kulira kwawo, pakuti ŵakati, “Mzire nase charu chitimire!”

³⁵Sono pakabuka moto kufumire kwa FUMU ndipo ukamyangura ŵanthu 250, awo ŵakaperekanga vyakununkhira.

³⁶Ntheura FUMU yikati kwa Mozesi,

³⁷“Uphalire Eleyazara mwana wa musofi Aroni, kuti wawuskemo majonjo mukati mu dimi la moto, ndipo wawuparanyire kutali, pakuti majonjo ngakupatulika.

³⁸Agha ndi majonjo gha ŵanthu ŵeneawo ŵakomeka chifukwa cha kwananga kwawo. Majonjo agha waghafure kuti ghaŵe ghapapati mwakuti ghaŵenge ghakubenekerera pa jochero, pakuti ŵakaghapereka panthazi pa FUMU. Ndicho chifukwa ngakupatulika. Ntheura ghati ghaŵenge chimanyikwiro ku ŵaIsraele.

³⁹Ntheura Eleyazara musofi wakatora majonjo gha mkuŵa ghara, gheneagho ŵakapereka ŵanthu ŵara ŵakaphya na moto. Ŵakaghafura na nyondo mwakuti ghaŵe ghakubenekerera pa jochero,

⁴⁰kuŵa chikumbusko ku ŵaIsraele mwakuti paŵavye munthu bweka, mweneuyo kuti ndi musofi chara ndiposo na uyo kuti ngwa mbumba ya Aroni chara, wize kufupi na kocha vyakununkhira panthazi pa FUMU, mzire waŵe nga ndi Kora na mpingo wakhe. Vyose vikachitika kwakuyana na umo FUMU yikamuphalirira Eleyazara mwa Mozesi.”

⁴¹Kweni na machero ghakhe mpingo wose wa ŵaIsraele ukasinginikira Mozesi na Aroni ukati, “Mwakoma ŵanthu ŵa FUMU.”

⁴²Para mpingo ura ukawungana kwimikana na Mozesi na Aroni, iwo ŵakazgokera ku Chihema Chakukumaniranamo. Sono ŵakawona kuti bingu lachibenekerera Chihema chira, ndipo uchindami wa FUMU ukawoneka.

⁴³Mozesi na Aroni ŵakiza panthazi pa muryango wa Chihema Chakukumaniranamo.

⁴⁴FUMU yikamuphalira Mozesi yikati,

⁴⁵“Fumamo mukati mu mpingo uwu, kuti ndi umare kanyengo kachoko waka.” Mozesi na Aroni ŵakawa kavunama.

⁴⁶Mozesi wakati kwa Aroni, “Tora jonjo lako, uŵikemo moto wa pa jochero na kuŵikapo vyakununkhira. Urute nalo luŵiro ku mpingo ndipo uŵachitire maluso ghakuphepiskira kwananga kwawo, pakuti ukari wa FUMU wafuma ndipo nthenda yakofya yayamba.”

⁴⁷Ntheura Aroni wakatora jonjo nga ndi umo Mozesi wakayowoyera na kuchimbilira mukati mu mpingo. Ndipo wakasanga kuti nthenda yakofya yira yayamba kale mukati mu ŵanthu. Sono wakaŵikapo vyakununkhira ndipo wakachita maluso ghakuphepiskira kwananga kwa ŵanthu.

⁴⁸Aroni wakimilira pakati pa awo ŵakafwa na ŵamoyo, ndipo nthenda yakofya yira yikareka.

⁴⁹Sono ŵeneawo ŵakafwa na nthenda yakofya yira ŵakaŵa vikwi 14,700, kwambula kusazgako ŵara ŵakafwa pa mrandu wa Kora.

⁵⁰Pamanyuma Aroni wakawerera kwa Mozesi pa muryango wa Chihema Chakukumaniranamo para yikati yareka nthenda yakofya yira.