Read new_tumbuka_bible Kupenda 17 Bible Online

Kupenda 17 - new_tumbuka_bible bible

Kupenda 17

¹FUMU yikati kwa Mozesi,

²“Uŵaphalire ŵaIsraele kuti ŵakupe ndodo, kufumira ku nyumba yiliyose ya ŵawiskewokuru wawo ndodo yimoza. Ŵarongozgi ŵawo wose ŵakupe ndodo 12 kwakuyana na nyumba za ŵawiskewokuru. Ulembe zina la munthu waliyose pa ndodo yakhe.

³Ulembepo zina la Aroni pa ndodo ya Levi. Pakuti paŵenge ndodo yimoza pa murongozgi waliyose wa nyumba za ŵawiskewokuru.

⁴Sono ndodo izi uziŵike mu Chihema Chakukumaniranamo panthazi pa Bokosi la Phangano apo nkhukumana nawe.

⁵Ndodo ya munthu mweneuyo ndamusora yamkuphuka. Ntheura nditi ndirekeske kusinginika kwa ŵaIsraele uko ŵakusinginikira iwe.”

⁶Mozesi wakaŵaphalira ŵaIsraele. Ndipo ŵarongozgi ŵawo wose ŵakapereka ndodo zawo, waliyose ndodo yimoza, kwakuyana na nyumba za ŵawiskewokuru. Ndodo zikaŵa 12. Ndodo ya Aroni nayo yikaŵa pamoza na ndodo zawo.

⁷Mozesi wakaŵika ndodo zira mu Chihema Chakukumaniranamo panthazi pa Bokosi la Phangano.

⁸Na machero ghakhe Mozesi wakaruta mu Chihema cha Ukaboni. Wakawona kuti ndodo ya Aroni wa mbumba ya Levi yaphuka, yachita maluŵa ndipo yapambika vipambi vyakuphya vya alimondi.

⁹Penepapo Mozesi wakafumiska ndodo zose izo zikaŵa panthazi pa FUMU na kuzirongora ku ŵaIsraele. Iwo ŵakaziwona ndipo waliyose wakatorapo ndodo yakhe.

¹⁰Ndipo FUMU yikati kwa Mozesi, “Wezgera ndodo ya Aroni panthazi pa Bokosi la Phangano. Uyisunge kuti yiŵe chimanyikwiro ku awo ŵakugaruka kuti ŵareke kusinginikira imwe, mzire ŵafwe.”

¹¹Ntheura ndimo wakachitira Mozesi. Wakachita kwakuyana na umo FUMU yikamulangulira.

¹²Sono ŵaIsraele ŵakati kwa Mozesi, “Wonani tikufwa, tikumara, tose tikumara petu.

¹³Yose uyo wakwiza kufupi, mweneuyo wakusenderera ku Chihema Chakupatulika cha FUMU, wati wafwenge. Kasi tose titi timarenge ntheura?”