Read new_tumbuka_bible Kupenda 18 Bible Online

Kupenda 18 - new_tumbuka_bible bible

Kupenda 18

¹FUMU yikati kwa Aroni, “Iwe na ŵana ŵako na ŵa mu nyumba ya ŵawusokuru iyo ukupwererera muti muŵenge na mrandu pa uheni uwo ukukhwaska Chihema Chakupatulika. Iwe pamoza na ŵana ŵako ndimwe mwiza muŵa na mrandu pa uheni uwo ukukhwaska usofi winu.

²Wize nawo ŵabali ŵako ŵa mu fuko la Levi, mtundu wa ŵawusokuru, kuti ŵaŵe pamoza nawe, na kukovwira pa nyengo iyo iwe pamoza na ŵana ŵako muli panthazi pa Chihema cha Ukaboni.

³Iwo ŵakovwirenge iwe na kuchita milimo yose ya mu Chihema. Kweni ŵareke kwiza kufupi na viteŵetero vya pa Malo Ghakupatulika nanga nkhwiza kufupi na jochero, mzire iwo na iwe mufwe.

⁴Ŵaŵenge pamoza na iwe, na kuteŵetera mu Chihema Chakukumaniranamo, pa milimo yose ya mu Chihema. Kuŵavye na yumoza uyo wize kufupi na iwe.

⁵Muti muchite milimo ya pa Chihema Chakupatulika na milimo ya pa jochero, mwakuti ukari wa FUMU ureke kwizaso pa ŵaIsraele.

⁶Ndaŵasora ŵabali ŵako ŵaLevi mukati mu ŵaIsraele. Iwo nchawanangwa kwa iwe, ŵaperekeka kwa FUMU, kuti ŵachite milimo ya mu Chihema Chakukumaniranamo.

⁷Ndipo iwe pamoza na ŵana ŵako muchitenge mlimo winu pa usofi wa vyose ivyo vikukhwaska jochero na ivyo vili kuseri kwa salu yakuchinga. Uwu ndi mlimo wako. Nkhukupa mlimo wa usofi nga ncha wanangwa, kweni munthu munyakhe waliyose mweneuyo wakwiza kufupi, wati wakomekenge.”

⁸Ntheura FUMU yikati kwa Aroni, Pa ivyo vikuperekeka kwa ine, ndakupa chose icho chikukharako, ndipo kuti vinthu vyose vyakupatulika ivyo vyaperekeka kuti viŵe na ŵaIsraele. Ndavipereka kuti viŵe phande lako na la ŵana ŵako, kuti viŵe vyakugaŵikira imwe kwa muyirayira.

⁹Pa vyakupereka vyakupatulika nkhanira vyeneivyo vindawocheke pa moto, vyinu viŵenge ivi: sembe zawo zose, vyakupereka vyawo vyose vya ufu, sembe zawo zose zakuphepiskira kwananga ndiposo na sembe zawo zose zakuphepiskira majuvyo. Vyose ivyo ŵakupereka kwa ine viŵenge vyakupatulika nkhanira kwa imwe na ku ŵana ŵinu.

¹⁰Mukwenera kuryera mu malo ghakupatulika nkhanira. Mwanarume waliyose wangaryako. Ivi nvyakupatulika kwa imwe.

¹¹“Ivi navyo nvyinu: Ivyo vyaperekeka nga vyawanangwa vyose vya ŵaIsraele. Ndavipereka kwa iwe na ku ŵana ŵako, kuti viŵe phande linu kwa muyirayira. Munthu waliyose uyo ngwa kuphotoka mu nyumba yako wangaryako.

¹²“Nkhumupani mafuta ghose ghaweme chomene, na vinyo lose liweme, na tirigu, vuna yakudanga ya ivyo ŵaIsraele ŵakupereka kwa FUMU.

¹³Vipambi vyakudanga kuphya vyeneivyo vili mu charu, ivyo ŵaIsraele ŵakwiza navyo ŵaIsraele ŵakwiza navyo kwa FUMU viŵenge vyako. Munthu waliyose uyo ngwa kuphotoka mu nyumba yako wangaryako.

¹⁴“Chinthu chilichose icho chaperekeka mwa chisanisani kwa FUMU mu charu cha Israele, chiŵenge chako.

¹⁵“Chinthu chilichose chakudanga kubabika, manyi ndi munthu, manyi nchinyama, cheneicho ŵakupereka kwa FUMU, chiŵenge chako. Ndipouli uti uwombole mwana wa uŵere mu ŵanthu, ndiposo na mwana wakudanga kubabika mu vinyama ivyo nvyambula kuphotoka.

¹⁶Chilichose uchiwombolenge para chili na mwezi umoza. Mtengo wakhe wakuwombolera upimenge ndarama za siliva zinkhonde gha siliva kwakuyana na ndarama zakupimikira mu Chihema Chakupatulika.

¹⁷Kweni ŵana ŵa ng'ombe panji ŵa mberere panji ŵa mbuzi, awo mbakwamba kubabika ureke kuŵawombola. Iwo mbakupatulika. Umijire ndopa zawo pa jochero, na kocha mafuta ghawo kuŵa sembe yakocha, yakuperekeka pa moto, yakupereka sungu liweme kwa FUMU.

¹⁸Kweni nyama yakhe yiŵenge yako nga ndi umo yikuŵira nganga iyo yazungunyika ndiposo na chigha cha maryero.

¹⁹“Vyakupereka vyose vyakupatulika ivyo ŵaIsraele ŵakupereka kwa FUMU, ndavipereka kwa iwe na ku ŵana ŵako ŵanarume na ŵanakazi, kuti viŵe phande linu kwa muyirayira. Ili ndi phangano la muyirayira panthazi pa FUMU, lakuchita na iwe na mphapu yako.”

²⁰Ndipo FUMU yikati kwa Aroni, “Iwe wamkuŵavye chiharo mu charu chawo, nanga nkhuŵa na phande lirilose mukati mwawo. Ine ndine phande lako ndiposo ndine chiharo chako mukati mu ŵaIsraele.”

²¹“ŴaLevi ndaŵapa chakhumi chilichose mu charu cha Israele kuŵa chiharo chawo, nga njombe pa mlimo wawo wa Chihema Chakukumaniranamo.

²²Ndipo kufuma sono ŵaIsraele ŵareke kusenderera kufupi na Chihema Chakukumaniranamo, mzire ŵanange na kufwa.

²³Kweni ŵaLevi ndiwo ŵachitenge mlimo wa mu Chihema Chakukumaniranamo ndipo ŵati ŵapataulenge usange ŵananga pa mlimo wawo. Ili liŵenge dango la muyirayira mu miwiro yinu. Ndipo mukati mu ŵaIsraele ŵaLevi ŵaŵenge na chiharo chara.

²⁴Pakuti chakhumi chakufuma mu ŵaIsraele, cheneicho ŵakupereka kwa FUMU, ndachipereka kwa ŵaLevi kuŵa chiharo chawo. Ichi ndicho chifukwa ndayowoya na za iwo kuti walije na chiharo mukati mu ŵaIsraele.”

²⁵FUMU yikati kwa Mozesi,

²⁶“Uŵaphalire ŵaLevi kuti, para ŵakupoka chakhumi chakufuma mu ŵaIsraele, cheneicho ndapereka kwa iwo kuŵa chiharo chawo, ŵarekenge chakhumi cha chakhumi kuti chiŵe sembe kwa FUMU.

²⁷Kwakuyana na iwo, sembe yawo yiti yipimikenge nga ndi tirigu wakufuma pa luwugha, ndiposo nga ndi vinyo ilo lafuma mu chakukamiramo.

²⁸Ntheura ndipo nawoso ŵati ŵaperekenge sembe kwa FUMU kufuma mu vyakupereka vyawo vyose vya chakhumi vyeneivyo ŵakupoka ku ŵaIsraele. Kufuma mu vya khumi ivi ŵamkupereka phande la FUMU kwa musofi Aroni.

²⁹Kufuma mu vyawanangwa vyose ivyo vyakupereka kwa iwo, ŵakaperekenge kwa FUMU chawanangwa chose icho ukwenera kupokera, cheneicho nchiweme kwakuruska ndipo nchakupatulika.

³⁰Ndicho chifukwa uŵaphalire kuti, ‘Para mwaperekapo viweme kwakuruska, ivyo vyakharako mukavipime kuŵa nga ndi tirigu wa ŵaLevi wakufuma pa luwugha ndiposo nga ndi vinyo ilo lafuma mu chakukamiramo.

³¹Mungamanya kuryera pa malo ghalighose, imwe na mbumba zinu. Pakuti iyi ndi njombe yinu pa mlimo winu weneuwo mukuchita mu Chihema Chakukumaniranamo.

³²Ndipo chifukwa cha ichi, imwe kuti munangenge chara, usange mwapereka icho nchiweme kwakuruska kwa FUMU. Mungakazuzganga vinthu vyakupatulika vya ŵaIsraele chara, mzire mufwe.’ ”