Read new_tumbuka_bible Kupenda 19 Bible Online

Kupenda 19 - new_tumbuka_bible bible

Kupenda 19

¹Sono FUMU yikati kwa Mozesi na Aroni,

²“Dango leneilo FUMU yalangula ndi ili: Uŵaphalire ŵaIsraele kuti ŵize kwa iwe na ng'ombe yanakazi yiswesi yeneiyo yilije kalema nesi kafukwa ndiposo yeneiyo yilije kukakikapo na goliwoli.

³Mukayipereke kwa Eleyazara musofi, ndipo iyo wakayitorere kuwaro kwa msasa, ndipo ŵakayikomere panthazi pakhe.

⁴Eleyazara musofi watorepo ndopa za ng'ombe yira na munwe wakhe, ndipo wakazimijire panthazi pa Chihema Chakukumaniranamo kankhonde na kaŵiri.

⁵Ng'ombe yira wakayiwochere panthazi pakhe. Chikumba chakhe, nyama yakhe, ndopa zakhe pamoza na ulongwe wakhe, ŵakaviwoche.

⁶Musofi watore khuni la milanje, kakhuni ka hisopo, uzi uswesi waviponye mukati mu moto wakochera ng'ombe yira.

⁷Penepapo musofi wati wachape vyakuvwara vyakhe na kugeza thupi lakhe, ndipo pamanyuma wati wanjire mu msasa. Musofi wati waŵe wambula kuphotoka mpaka na mise.

⁸Mweneuyo wakocha ng'ombe yira wachape vyakuvwara vyakhe na kugeza thupi lakhe, ndipo wati waŵe wambula kuphotoka mpaka na mise.

⁹Munthu mweneuyo ngwa kuphotoka ndiyo wati watore vyoto vya ng'ombe yira, na kuviŵika kuwaro kwa msasa pa malo ghaweme. Vyoto ivi vyamkusungikira mpingo wa ŵaIsraele kuti viŵenge vyakunozgera maji pa kaluso kakuwuskira ukazuzi. Maluso agha nga kuwuskirapo kwananga.

¹⁰Munthu mweneuyo wakuwunjika vyoto vya ng'ombe yira, wasukenge vyakuvwara vyakhe, ndipo iyo waŵenge wambula kuphotoka mpaka na mise. Ili ndilo liŵe dango la muyirayira mu ŵaIsraele na ku mulendo mweneuyo wakupanjwa mukati mwawo.

¹¹“Yose uyo wakukhwaska chitanda cha munthu wati waŵe nga nkhaluso wakukazuzgika mazuŵa ghankhonde na ghaŵiri.

¹²Iyo wakwenera kujitozga na maji ghakupatulika ghara pa zuŵa la chitatu ndiposo na pa zuŵa la chinkhonde na chiŵiri, ndipo ntheura wati waŵe wakutowa. Kweni usange wakureka kujitozga pa zuŵa la chinkhonde na chiŵiri, wati waŵe wambula kutozgeka.

¹³Munthu waliyose uyo wakukhwaska munthu wakufwa, ndipo wakureka kujitozga, wakukazuzga Chihema Chakupatulika cha FUMU. Munthu wa ntheura wawuskikemo mu ŵaIsraele. Iyo wati waŵe wambula kutozgeka chifukwa ŵakaŵavye kumuthilira maji agho ghakutozga ivyo nvyambula kutowa. Iyo wakuŵa wachali wambula kutozgeka.

¹⁴“Para munthu wafwira mu hema dango lakhe ndi ili: Munthu waliyose uyo wakunjira mu hema, ndipo waliyose uyo wali mu hema wati waŵe wambula kuphotoka kwa mazuŵa ghankhonde na ghaŵiri.

¹⁵Chiŵiya chose icho chilije kubenekerereka pachanya pakhe, nchambula kuphotoka.

¹⁶Munthu waliyose uyo wakukhwaska munthu uyo wakomeka na lupanga kuwaro, panji chitanda, panji chiwangwa cha munthu, panyakhe dindi, wati waŵe wambula kuphotoka kwa mazuŵa ghankhonde na ghaŵiri.

¹⁷“Munthu wambula kuyowoya kuti watozgeke, ŵati ŵatore vyoto vya sembe yakocha yakuphepiskira zakwananga na kuŵika mu chiŵiya, ndipo ŵati ŵasazgemo maji ghaweme.

¹⁸Penepapo munthu uyo ngwa kutowa wati watore kakhuni ka hisopo na kubizga mu maji ndipo wati wamijire pa hema, pa viŵiya vyose, pa ŵanthu ŵeneawo ŵakaŵa penepapo, ndiposo na pa mweneuyo wakhwaska chiwangwa, panji uyo wakomeka, panji wakufwa waka, panji dindi.

¹⁹Munthu uyo ngwa kutozgeka ndiyo wati wamumijire munthu wambula kutozgeka pa zuŵa la chitatu na pa zuŵa la chinkhonde na chiŵiri. Ntheura pa zuŵa la chinkhonde na chiŵiri wati wamutozge munthu yura para wachapa vyakuvwara vyakhe na kugeza thupi lose, ndipo na mise wati waŵe wakutozgeka.

²⁰“Kweni munthu mweneuyo ngwambula kutowa ndipo wakureka kujitozga, ŵa muwuskemo mukati mu mpingo, pakuti wakazuzga Chihema Chakupatulika cha FUMU. Iyo ngwambula kutowa chifukwa ŵalije kumumijira maji agho ghakutozga ivyo nvyambula kutowa.

²¹Ili liti liŵenge dango la muyirayira kwa iwo. Munthu uyo wakumija maji ghakutozgera ivyo nvyambula kutowa, wakachape vyakuvwara vyakhe. Ndipo munthu uyo wakukhwaska maji agha wati waŵe wambula kuphotoka mpaka na mise.

²²Chose icho munthu wambula kuphotoka wakukhwaska chiti chiŵe chambula kuphotoka. Ndipo yose uyo wakukhwaska chinthu chira wati waŵe wambula kuphotoka mpaka na mise.”