Read new_tumbuka_bible Kupenda 2 Bible Online

Kupenda 2 - new_tumbuka_bible bible

Kupenda 2

¹FUMU yikayowoya kwa Mozesi na Aroni kuti,

²“ŴaIsraele ŵati ŵazenge misasa yawo, waliyose pafupi na ndembera yakhe yeneiyo yili na chimanyikwiro cha nyumba ya wiskekuru. Iwo ŵati ŵazenge misasa yawo kurazga ku Chihema Chakukumaniranamo pakuchizingirizga.”

³Ŵa fuko la Yuda, mpingo na mpingo, ŵati ŵazengenge misasa yawo pafupi na ndembera ya fuko lawo cha ku mafumiro gha dazi. Nashoni mwana wa Aminadabu ndiyo wati waŵenge murongozgi wa fuko la Yuda.

⁴Unandi wa awo ŵakapendeka ndi 74,600.

⁵Ŵa fuko la Isakara ŵati ŵazengenge misasa yawo pafupi nawo. Netanele mwana wa Zuwara ndiyo wati waŵenge murongozgi wawo.

⁶Unandi wa ŵasilikari awo ŵakapendeka ndi 54,400.

⁷Ŵa fuko la Zebuloni ŵati ŵarondezgenge pa iwo. Eliyabu mwana wa Heloni ndiyo wati waŵenge murongozgi wawo.

⁸Unandi wa ŵasilikari awo ŵakapendeka ndi 57,400.

⁹Wose pamoza awo ŵakapendeka mu msasa wa fuko la Yuda, mpingo na mpingo, ndi 186,400. Iwo ndiwo ŵati ŵaŵenge ŵakudanga pakwenda.

¹⁰Ku dera la ku mwera ndiko kuŵenge ndembera ya msasa wa fuko la Rubeni, kwakuyana na ndondomeko ya vitha, ilo murongozgi wakhe ndi Elizuru mwana wa Sheduru.

¹¹Unandi wa ŵasilikari awo ŵakapendeka ndi 46,500.

¹²Awo ŵati ŵazengenge misasa pafupi nawo ŵaŵenge ŵa fuko la Simiyoni, ilo murongozgi wakhe ndi Shelumiyele mwana wa Zurishadayi.

¹³Unandi wa ŵasilikari awo ŵakapendeka ndi 59,300.

¹⁴Kufuma pa iwo ŵarondezgenge mba fuko la Gadi, ilo murongozgi wakhe ndi Eliyasafu mwana wa Rewele.

¹⁵Unandi wa ŵasilikari awo ŵakapendeka ndi 45,650.

¹⁶Wose pamoza mu msasa wa fuko la Rubeni, mpingo na mpingo, ndi 151,450. Iwo ndiwo ŵati ŵaŵenge ŵa chiŵiri pakwenda.

¹⁷Pamanyuma pakhe, wumba wa fuko la Levi uti wende nacho Chihema Chakukumaniranamo pakatikati pa mawumba. Iwo ŵati ŵafumengepo kwakulingana na umo wakazengera misasa, wumba wose pa malo ghakhe pakurondezga ndembera yakhe na yakhe.

¹⁸Ku manjiliro gha dazi ndiko kuŵenge ndembera ya msasa wa fuko la Efurayimu, mpingo na mpingo, ilo murongozgi wakhe ndi Elishama mwana wa Amihudi.

¹⁹Unandi wa ŵasilikari awo ŵakapendeka ndi 40,500.

²⁰Awo ŵarondezgengepo ŵaŵenge ŵa fuko la Manase, ilo murongozgi wakhe ndi Gamaliyele mwana wa Pedazuru.

²¹Unandi wa ŵasilikari awo ŵakapendeka ndi 32,200.

²²Pamanyuma mba fuko la Benjamini ilo murongozgi wakhe ndi Abidani mwana wa Gidiyoni.

²³Unandi wa ŵasilikari awo ŵakapendeka ndi 35,400.

²⁴Wose pamoza mu msasa wa fuko la Efurayimu, wa vitha na vitha vyose, ndi 108,100. Iwo ndiwo ŵaŵenge ŵa chitatu pakwenda.

²⁵Ku dera la ku mpoto ndiko kuŵenge ndembera ya msasa wa fuko la Dani, mpingo na mpingo, ilo murongozgi wakhe ndi Ahiyezere mwana wa Amishadayi.

²⁶Unandi wa ŵasilikari awo ŵakapendeka ndi 62,700.

²⁷Awo ŵazengenge misasa pafupi nawo ŵaŵenge ŵa fuko la Ashere, ilo murongozgi wakhe ndi Pagiyele mwana wa Okirani.

²⁸Unandi wa ŵasilikari awo ŵakapendeka ndi 41,500.

²⁹Pamanyuma mba fuko la Nafutali ilo murongozgi wakhe ndi Ahira mwana wa Enani.

³⁰Unandi wa ŵasilikari awo ŵakapendeka ndi 53,400.

³¹Wose pamoza mu msasa wa fuko la Dani ndi 157,600. Iwo ŵaŵenge ŵa umaliro pakwenda, pakurondezga ndembera zawo.

³²Aŵa ndiwo ŵaIsraele nga ndi umo ŵakapendekera kwakuyana na nyumba za ŵawiskewokuru. Wose awo ŵakapendeka mu misasa yawo, mpingo na mpingo, ŵakaŵa 603,550.

³³Kweni ŵa fuko la Levi kuti ŵakapendekera pamoza na ŵaIsraele chara, nga ndi umo FUMU yikamulangulira Mozesi.

³⁴Ntheura ndimo ŵaIsraele ŵakachitira. Iwo ŵakachita kwakuyana na vyose ivyo FUMU yikamulangula Mozesi. Ŵakazenga misasa yawo pafupi na ndembera zawo. Ntheura ŵakamba kwenda ulendo wawo waliyose pa mbumba yakhe, kwakuyana na nyumba za ŵawiskewokuru.