Read new_tumbuka_bible Kupenda 20 Bible Online

Kupenda 20 - new_tumbuka_bible bible

Kupenda 20

¹Mu mwezi wakudanga mpingo wose wa ŵaIsraele ukafika mu mapopa gha Zini, ndipo ŵanthu ŵara ŵakakhara ku Kadeshi. Miriyamu wakafwira na kusungika kwenekura.

²Sono ku malo ghara kukaŵavye maji kuti mpingo umwe. Sono ŵanthu ŵakawungana pamoza ndipo ŵakimikana na Mozesi na Aroni.

³Ŵanthu ŵakamugarukira Mozesi, ŵakati, “Chikaŵa chiweme mphanyi tikafwiranga waka penepara ŵakafwiranga ŵabali ŵithu panthazi pa FUMU.

⁴Chifukwa uli mwawutorera mpingo wa FUMU mu mapopa agha, kuti ndimo tifwire, ise pamoza na vyakuŵeta vyithu?

⁵Ndipo chifukwa nchichi mukatifumya mu Eguputo, na kutitorera mu malo ghaheni agha. Agha kuti ndi malo gha vyakurya chara, nesi vikuyu, nanga ndi mpheska, panji magalagadeya. Ndiposo mulije na maji ghakumwa.”

⁶Penepapo Mozesi na Aroni ŵakafumapo pa maso pa wumba na kuruta mu muryango wa Chihema Chakukumaniranamo, ndipo ŵakawa kavunama. Uchindami wa FUMU ukaŵawonekera.

⁷Ndipo FUMU yikati kwa Mozesi,

⁸“Tora ndodo yako ndipo iwe na mukuru wako Aroni muwunganiske pamoza mpingo. Sono iwe uyowoye ku jarawe uku ŵanthu ŵakuwona mwakuti lifumye maji. Ntheura ndimo uti uŵafumiskire maji kufumira mu jarawe na kuŵapa ŵa mpingo kuti ŵamwe pamoza na vyakuŵeta vyawo.”

⁹Mozesi wakatora ndodo kufuma panthazi pa FUMU, nga ndi umo yikamulangulira.

¹⁰Sono Mozesi na Aroni ŵakawunganiska mpingo wose pamoza panthazi pa jarawe, ndipo Mozesi wakaŵaphalira ŵanthu ŵakati, “Pulikani sono, imwe ŵanthu ŵachigaruka. Kasi mbwenu ntheura timupaninge maji kufuma mu jarawe ili kuti mumwe?”

¹¹Mozesi wakawuska woko lakhe na kutimba jarawe na ndodo yakhe kaŵiri. Maji ghakafuma ghanandi, ndipo mpingo ukamwa, pamoza na vyakuŵeta vyawo.

¹²FUMU yikati kwa Mozesi na Aroni, “Pakuti mukareka kugomezga mwa ine, kureka kuchindika ine kuti ndine wakupatulika panthazi pa ŵaIsraele, imwe kuti mwamkuwunjizga chara mpingo uwu mu charu cheneicho ndaŵapa.”

¹³Gheneagha ndigho maji gha Meriba, pa malo agho ŵaIsraele ŵakalimbana na FUMU, ndipo iyo yikajirongora kuŵa yakupatulika mukati mwawo.

¹⁴Mozesi wakatuma nthumi kufumira ku Kadeshi kuya kwa karonga wa charu cha Edomu kuti ŵakamuyowoyere kuti, “Ŵabali ŵinu ŵaIsraele ŵakuti, ‘Mukumanya visuzgo vyose ivyo vyatiwira.

¹⁵Mukumanya umo ŵasekuru ŵithu ŵakarutira ku Eguputo, ndipo na umo tikakhalira kwenekura nyengo yitali. ŴaEguputo ŵakatisuzga ise na ŵasekuru ŵithu.

¹⁶Para tikalira kwa FUMU, yikatipulika na kutuma mungelo uyo wakatifumyamo mu Eguputo. Sono tili muno mu Kadeshi, msumba uwo uli mu mphepete mwa charu chinu.

¹⁷Sono tikupempha kuti mutizomerezge kujumphamo mu charu chinu. Kuti tendenge mu minda yinu chara panji mu mpheska zinu, nanga nkhumwamo maji mu visimi vyinu. Ise titi tendenge mu Msewu Ukuru wa Karonga ndipo titi tipatukirenge uku na uku chara, mpaka tijumphe charu chinu.’ ”

¹⁸Kweni Edomu wakati kwa iyo, “Mureke kujumphapo mzire ndimwizirani na nkhondo kuti ndirwe namwe.”

¹⁹ŴaIsraele ŵakamuphalira ŵakati, “Ise titi tendenge mu msewu ukuru pera. Usange ise na vyakuŵeta vyithu timwengeko maji ghinu, tiripirenge. Mutizomerezge kuti tijumphemo waka.”

²⁰Kweni Edomu wakati kwa iwo, “Mujumphengemo chara,” Penepapo Edomu wakiza na ŵankhondo ŵanandi na ŵankhongono kwiza karya nawo.

²¹Ntheura Edomu wakakana kuti ŵaIsraele ŵajumphemo mu charu chakhe. Ndipo ŵaIsraele ŵakatora nthowa yinyakhe.

²²Sono mpingo wose wa ŵaIsraele ukenda ulendo kufuma ku Kadeshi na kuya kafika ku Phiri la Horo.

²³Pa Phiri la Horo, mu mphaka za charu cha Edomu, ndipo FUMU yikaphalira Mozesi na Aroni kuti,

²⁴“Aroni wati wafwenge na kusungika pamoza na ŵabali ŵakhe. Iyo kuti wamkunjiramo chara mu charu cheneicho ndaŵapa ŵaIsraele, chifukwa imwe mukareka kupulikira languro lane pa maji gha ku Meriba.

²⁵Utore Aroni pamoza na Eleyazara mwana wakhe, ndipo wize nawo ku Phiri la Horo.

²⁶Kwenekura ukamuvure vyakuvwara vyakhe vya usofi na kumuvwarika Eleyazara mwana wakhe. Ndipo Aroni wati wafwire kwenekura na kusungika pamoza na ŵabali ŵakhe.”

²⁷Mozesi wakachita nga ndi umo FUMU yikamulangulira. Iwo ŵakaruta Phiri la Horo, uko mpingo wose ukaŵawona.

²⁸Mozesi wakamuvura Aroni vyakuvwara vyakhe vya usofi, na kumuvwarika Eleyazara mwana wakhe. Ndipo Aroni wakafwira kwenekura pachanya pa phiri. Sono Mozesi na Eleyazara ŵakakhira phiri.

²⁹Para mpingo wose ukapulika kuti Aroni wafwa, ŵaIsraele wose ŵakalira nyifwa ya Aroni mazuŵa 30.