Read new_tumbuka_bible Kupenda 21 Bible Online

Kupenda 21 - new_tumbuka_bible bible

Kupenda 21

¹Karonga wa ku Aradi, muKanani, mweneuyo wakakharanga ku Negebu, wakati wapulika kuti ŵaIsraele ŵakwizira mu nthowa ya ku Atarimu, wakiza na kurwa nawo, ndipo ŵanyakhe mwa iwo wakaŵakora umikori.

²ŴaIsraele ŵakachita chirapo kwa FUMU ŵakati, “Usange nadi muti muŵaperekenge ŵanthu aŵa mu mawoko ghithu, ise titi tiyimare petu misumba yawo.”

³FUMU yikapulikira mazgu ghawo, ndipo yikaŵapereka ŵaKanani mu mawoko ghawo. ŴaIsraele ŵakamara petu ŵaKanani pamoza na misumba yawo. Ntheura malo ghara ghakathyika Horima.

⁴ŴaIsraele ŵakawuka ulendo wawo kufuma pa Phiri la Horo ŵakenda na nthowa ya ku Nyanja ya Matete kuzingirira charu cha Edomu. Kweni ŵanthu kuti ŵakajikora mitima chara apo ŵakendanga.

⁵Ŵanthu ŵara ŵakamba kwimikana na Chiuta ndiposo na Mozesi mu kayowoyero ŵakati, “Chifukwa uli mukatifumya mu Eguputo kuti tizakafwirenge waka muno mu mapopa? Pakuti mulije chakurya nanga ndi maji, ndipo chakurya chawakawaka chambula kukondweska.”

⁶Penepapo FUMU yikatuma njoka za urwirwi nga wa moto mu ŵanthu, ndipo zikaŵaruma, mwakuti ŵaIsraele ŵanandi ŵakafwa.

⁷Ŵanthu ŵakiza kwa Mozesi ŵakati, “Tananga chifukwa timikana na FUMU na imwe wuwo mu mayowoyero ghithu. Murombe kwa FUMU, kuti yiwuskeko njoka izi kwa ise.” Ntheura Mozesi wakaŵarombera ŵanthu.

⁸FUMU yikamuphalira Mozesi yikati, “Unozge njoka ya mkuŵa, na kuyipayika pa khuni. Yose uyo walumika, para wati walaŵiskepo pa njoka ya mkuŵa yira, wati waŵe wa moyo.”

⁹Ntheura Mozesi wakanozga njoka ya mkuŵa ndipo wakayipayika pa khuni. Sono usange njoka yamuluma munthu ndipo wakalaŵiskapo pa njoka ya mkuŵa yira, munthu yura wakaŵanga wamoyo.

¹⁰ŴaIsraele ŵakawuka ulendo wawo, ŵakaya kazenga msasa ku Oboti.

¹¹Ndipo ŵakawukaso ulendo kufuma ku Oboti, ŵakaya kazenga ku Iye Abarimu, mu mapopa ghakuthyana na Mowabu, kurazga ku mafumiro gha dazi.

¹²Kufuma para ŵakawuka ulendo wawo, ŵakaya kazenga msasa mu Dambo la Zeredi.

¹³Kufuma para ŵakawuka ulendo wawo, ŵakaya kazenga sirya linyakhe la mronga wa Arinoni, weneuwo uli mu mapopa agho ghakufuma mu mphaka ya ŵaAmori. Mronga wa Arinoni uwo ndi mphaka ya Mowabu, uli pakati pa charu cha Mowabu na Amori.

¹⁴Pa chifukwa ichi vili kuyowoyeka mu buku la zinkhondo za FUMU kuti, “Msumba wa Wahebu uli mu Sufa, ku vidika vya Arinoni,

¹⁵ku usendemuko wa vidika uwo ukafika mpaka ku Ari, ndipo ukukhwaskana na mphaka ya Mowabu.”

¹⁶Kufuma kura wakarutilira mpaka ku Beyere. Ichi nchisimi cheneicho FUMU yikamuphalira Mozesi kuti, “Wunganya ŵanthu pamoza ndipo nditi ndiŵape maji.”

¹⁷Sono ŵaIsraele ŵakimba sumu iyi yakuti, “Bwibwituka iwe chisimi! Zani timbire chisimi!

¹⁸Chisimi cheneicho ŵana ŵa karonga ŵakajima, cheneicho ŵarongozgi ŵakumanyikwa ŵa ŵanthu ŵakajima, na ndodo ya ufumu pamoza na ndodo zawo.” Kufuma ku mapopa ŵaIsraele ŵakaruta ku Matana.

¹⁹Kufuma ku Matana ŵakaruta ku Nahaliyele ndipo kufuma ku Nahaliyele ŵakaruta ku Bamoti.

²⁰Kufuma ku Bamoti ŵakaruta ku chidika icho chili mu charu cha Mowabu, kwizira pachanya pa Phiri la Pisiga ilo likurazgirana na chiparamba musi mwakhe.

²¹Penepapo ŵaIsraele ŵakatuma nthumi kwa Sihoni karonga wa ŵaAmori kukayowoya kuti,

²²“Mundizomerezge kuti ndiporote mu charu chinu. Kuti titi tipatukire mu minda chara nanga ndi mu mpheska. Titi timwengemo maji gha mu visimi chara. Ise titi tendenge mu Msewu ukuru wa Karonga, mpaka tiporote mu charu chinu.”

²³Kweni Sihoni wakaŵazomerezga chara ŵaIsraele kuti ŵaporote mu charu chakhe. Wakawunganya ŵasilikari ŵakhe wose pamoza. Wakaruta kuya karwa nkhondo na ŵaIsraele mu mapopa, ndipo wakafika ku Yahazi na kurwa na ŵaIsraele.

²⁴ŴaIsraele ŵakamuthereska na nkhondo ndipo ŵakatora charu chakhe kufuma ku mronga wa Arinoni kuya kafika ku mronga wa Yaboko, mpaka ku mphaka ya charu cha ŵaAmoni, pakuti msumba wa Yazere ndiwo waŵa mphaka ya ŵaAmoni.

²⁵ŴaIsraele ŵakatora misumba yose iyi, ndipo ŵakakhara mu misumba yose ya ŵaAmori: msumba wa Heshiboni, na vikaya vyakhe vyose.

²⁶Heshiboni ukaŵa msumba wa Sihoni karonga wa ŵaAmori, mweneuyo wakarwa na karonga wa kale wa ŵaMowabu na kupoka charu chakhe chose, mpaka ku mronga wa Arinoni.

²⁷Ndicho chifukwa ŵimbi sumu ŵakuti, “Zaninge ku msumba wa Heshiboni, mwakuti uzengeke, tiyeni tizenge msumba wa Sihoni kuti ukhazikike.”

²⁸Moto ukabuka mu Heshiboni, dimi likafuma mu msumba wa Sihoni. Moto ukamyangura Ari, msumba wa ku Mowabu, ukanyeskerathu mapiri gha kunena kwa Arinoni.

²⁹Soka kwa iwe, Mowabu! Mwamara petu, imwe mukusopa Kemoshi! Ŵana ŵakhe ŵanarume waŵazgora kuŵa ŵakuchimbirachimbira. Ŵana ŵakhe ŵanakazi waŵazgora kuŵa ŵazga, pasi pa Sihoni, karonga wa ŵaAmori.

³⁰Ntheura mphapu yawo yikamara petu kufumira ku Heshiboni mpaka ku Diboni ndipo tikaŵamara nkhanira mpaka moto ura ukatandazgikira ku Nofa, msumba wa Medeba.

³¹Ntheura ŵaIsraele ŵakakhara mu charu cha ŵaAmori.

³²Mozesi wakatuma ŵanthu kuya kaskora Yazere. Ndipo ŵaIsraele ŵakatora vikaya vyakhe, na kuŵachimbizgamo ŵaAmori awo ŵakaŵa mwenemura.

³³Penepapo ŵakawerako ndipo ŵakatora nthowa yakuya ku chigaŵa cha Bashani. Ndipo Ogi, karonga wa ku Bashani wakiza na ŵasilikari ŵakhe wose kuti ŵarwe nawo nkhondo ku msumba wa Edireyi.

³⁴Kweni FUMU yikati kwa Mozesi, “Ungamopanga, pakuti ndamupereka iyo mu mawoko ghako pamoza na ŵanthu ŵakhe wose, ndiposo na charu chakhe. Uchite nayo nga ndi umo ukachitira na Sihoni karonga wa ŵaAmori mweneuyo wakakharanga ku Heshiboni.”

³⁵Ntheura ŵakakoma Ogi na ŵana ŵakhe ndiposo na ŵasilikari ŵakhe wose. Kukaŵavye na yumoza uyo wakakharako wamoyo ndipo ŵakatora charu chakhe.