Read new_tumbuka_bible Kupenda 22 Bible Online

Kupenda 22 - new_tumbuka_bible bible

Kupenda 22

¹Sono ŵaIsraele ŵakawuka ulendo wawo, ndipo ŵakazenga msasa mu vidika vya Mowabu ku sirya linyakhe la mronga wa Yorodani ku Yeriko.

²Balaki mwana wa Zipora wakawona vyose vyeneivyo ŵaIsraele ŵakaŵachitira ŵaAmori.

³ŴaMowabu ŵakaŵa na wofi ukuru na ŵanthu aŵa, chifukwa ŵakaŵa ŵanandi. ŴaMowabu ŵakaŵa nadi na wofi na ŵaIsraele.

⁴Ntheura ŵaMowabu ŵakaŵaphalira ŵararaŵarara ku Midiyani ŵakati, “Wumba uwu uti umare vyose ivyo vyatizingirizga nga ndi umo ng'ombe yikumalira utheka mu munda.” Ntheura Balaki mwana wa Zipora, mweneuyo wakaŵa karonga wa ku Mowabu pa nyengo yira,

⁵wakatuma nthumi kwa Balaamu mwana wa Beyoro, ku Petoro, pafupi na mronga wa Yufurate mu charu cha Amawu kukamuchema na kumuphalira kuti, “Ŵanthu ŵafuma ku Eguputo. Iwo ŵazura charu chose ndipo ŵakukhara kudunjikana nane.

⁶Zanga sono uŵatemberere ŵanthu aŵa mu malo ghane pakuti mbankhongono kwakuruska ine. Panji ndingamanya kuŵatonda na kuŵachimbizgamo mu charu. Pakuti nkhumanya kuti yose uyo ukumutumbika wakuŵa wakutumbikika, ndipo yose uyo ukumutemba wakutembeka.”

⁷Ntheura ŵararaŵarara ŵa ku Mowabu na ŵa ku Midiyani ŵakayegha malipiro gha kuya karoskera. Ŵakiza kwa Balaamu, na kumuphalira uthenga wa Balaki.

⁸Ndipo Balaamu wakaŵaphalira wakati, “Gonani kuno usiku uno, ndipo nditi ndimupani zgoro, kwakuyana na umo FUMU yiti yindiphalirire.” Ntheura nduna zira za ku Mowabu zikakhara na Balaamu.

⁹Chiuta wakiza kwa Balaamu ndipo wakati, “Kasi ŵanthu aŵa ŵali na iwe mba njani?”

¹⁰Balaamu wakati kwa Chiuta, “Balaki mwana wa Zipora, karonga wa ku Mowabu watuma uthenga kwa ine wakuti,

¹¹ŵanthu ŵafuma mu Eguputo ndipo ŵazura pa charu chose. Sono zanga uŵatemberere ŵanthu aŵa mu malo ghane. Panji ndingamanya kurwa nawo na kuŵachimbizgamo.”

¹²Chiuta wakati kwa Balaamu, “Ungarutanga nawo chara, ndiposo ureke kuŵatemba ŵanthu ŵara, pakuti mbakutumbikika.”

¹³Sono Balaamu wakawuka na macherochero, wakaziphalira nduna zira zikafuma kwa Balaki, wakati, “Rutaninge ku charu cha ku kwinu, pakuti FUMU yandikanizga kuti ndirute namwe.”

¹⁴Ntheura nduna zira zikafuma ku Mowabu na kuruta kwa Balaki, ndipo zikamuphalira kuti, “Balaamu wakana kwiza nase.”

¹⁵Balaki wakatumaso nduna izo zikaŵa zinandiko zakuzirwa kuruska zakudanga zira.

¹⁶Zikiza kwa Balaamu na kumuphalira kuti, Balaki mwana wa Zipora wakuti, “Kuŵavye na chinthu chinyakhe chakujandizga iwe kwiza kwa ine.

¹⁷Nadi ndizamkukuchindika chomene. Chilichose icho wizamkuyowoya kwa ine ndizamkuchichita. Zanga kuti uŵatemberere ŵanthu aŵa mu malo ghane.”

¹⁸Kweni Balaamu wakazgora na kuziphalira nduna za Balaki wakati, “Nanga Balaki wangandipa nyumba yakhe yakuzura na siliva na golide, ine kuti ndingajumpha dango la FUMU, Chiuta wane chara, manyi ndichoko panji ndikuru.

¹⁹Sono nkhumurombani, gonaniso kuno, na usiku uno wuwo, kuti ndimanye icho FUMU yiti yiyowoye.”

²⁰Chiuta wakiza kwa Balaamu na usiku ndipo wakamuphalira wakati, “Usange ŵanthu aŵa ŵiza kwiza kakuchema iwe, wuka urute nawo. Kweni ukachitenge cheneicho ndamkukuphalira.”

²¹Ntheura Balaamu wakawuka na mulenjelenje, wakaŵikapo chiskaro pa mbunda yakhe ndipo wakaruta na nduna zira za Mowabu.

²²Kweni Chiuta wakakwiya chomene chifukwa Balaamu wakaruta. Ndipo mungelo wa FUMU wakimilira mu msewu kuti wamujandizge. Pa nyengo iyi Balaamu wakagara pa mbunda, ndipo ŵateŵeti ŵakhe ŵaŵiri ŵakaŵa pamoza nayo.

²³Mbunda yikawona mungelo wa FUMU wakwimilira mu msewu, wali na lupanga mu woko lakhe. Penepapo mbunda yikareka msewu na kunjira mu munda. Balaamu wakatimba mbunda yira mwakuti wayiwezgere mu msewu.

²⁴Penepapo mungelo wa FUMU wakaya kimilira mu kanthowa kafinyi ako kakaporota pakati pa minda ya mpheska, iyo yikaŵa na viliŵa vya mawe ku madera ghose ghaŵiri.

²⁵Para mbunda yikawona mungelo wa FUMU, yikenda kufupi na chiliŵa chinyakhe kwenekuko kalundi kamoza ka Balaamu kakakwenthekanga. Penepapo Balaamu wakatimbaso mbunda yira.

²⁶Pamanyuma mungelo wa FUMU wakaruta kunthazi na kuya kimilira pa malo ghafinyifinyi, apo pakaŵavye nthowa yakupatukirako, ku maryero panji ku mazere.

²⁷Para mbunda yikawona mungelo wa FUMU, yikagona pasi apo Balaamu wali pachanya. Balaamu wakakwiya chomene ndipo wakatimba mbunda yira na ndodo yakhe.

²⁸Sono FUMU yikajula mlomo wa mbunda, ndipo mbunda yikati kwa Balaamu, “Kasi ndachitachi kwa iwe, pakunditimba katatu kose?”

²⁹Balaamu wakati ku mbunda, “Chifukwa wandisoŵerera. Ndiŵenge na Lupanga mu woko lane, mphanyi ndakukoma waka.”

³⁰Ndipo mbunda yikati kwa Balaamu, “Kasi ndine mbunda yako chara yeneiyo wagarapo mu umoyo wako wose mpaka mu zuŵa ili? Kasi ivi ndili kumuchitiranipo na kale?” Balaamu wakazgora kuti, “Chara.”

³¹Penepapo FUMU yikajula maso gha Balaamu, ndipo wakawona mungelo wa FUMU wimilira mu nthowa, wali na lupanga lwakusorora mu woko lakhe. Balaamu wakasindama na kuwa kavunama.

³²Mungelo wa FUMU wakamufumba wakati, “Chifukwa uli watimba mbunda yako katatu kose? Ndiza kuti ndikujandizge, chifukwa ulendo wako nguheni panthazi pane.

³³Mbunda yangundiwona ndipo yangupatukira ku mphepete panthazi pane katatu. Yirekenge kundipatukira, nadi sono mphanyi ndakukoma iwe, na kureka mbunda kuti yiŵe yamoyo.”

³⁴Penepapo Balaamu wakayowoya na mungelo wa FUMU wakati, “Ndananga, pakuti ndangumanya chara kuti mwimilira mu msewu kundijandizga ine. Ntheura sono usange ncha kumukwiyiskani, ipo ndiwererenge kunyuma.”

³⁵Mungelo wa FUMU wakati kwa Balaamu, “Rutanga nawo ŵanthu aŵa, kweni ukayowoyenge cheneicho ndamkukuphalira.” Ntheura Balaamu wakaruta na nduna za Balaki zira.

³⁶Para Balaki wakapulika kuti Balaamu wiza, wakaruta kuya kakumana nayo mu msumba wa Mowabu, pa mronga wa Arinoni ku umaliro wakhe.

³⁷Ndipo Balaki wakamufumba Balaamu wakati, “Asi nkhatuma nthumi kukuchema iwe? Nchifukwa uli ukareka kwiza kwa ine? Kasi ine ndingakuchindika iwe chara?”

³⁸Balaamu wakamuzgora Balaki kuti, “Wonani, sono ndiza! Kasi sono ndiliso nazo nkhongono zakuyowoyera kanthu kalikose? Mazgu agho Chiuta waŵika mu mlomo wane, ndigho nkhwenera kuyowoya.”

³⁹Penepapo Balaamu wakaruta na Balaki, ndipo ŵakafika ku msumba wa Kiriyati Huzoti.

⁴⁰Kwenekura Balaki wakapereka sembe ya ng'ombe, mberere na mbuzi, ndipo wakatumizgako nyama kwa Balaamu na wa nduna izo zikiza nayo.

⁴¹Na machero ghakhe Balaki, wakamutora Balaamu na kwiza nayo pa malo ghakukwera ku Bamoti Baala. Penepara Balaamu wakamanya kuwona misasa ya ŵaIsraele mpaka uko yikugota.