Read new_tumbuka_bible Kupenda 23 Bible Online

Kupenda 23 - new_tumbuka_bible bible

Kupenda 23

¹Ndipo Balaamu wakati kwa Balaki, “Undizengere pano majochero ghankhonde na ghaŵiri ndipo undipozgere nkhambako zinkhonde na ziŵiri na mberere zanarume zinkhonde na ziŵiri.”

²Balaki wakachita nga ndi umo Balaamu wakayowoyera. Ndipo Balaki na Balaamu ŵakapereka sembe ya nkhambako na mberere yanarume pa jochero lirilose.

³Balaamu wakati kwa Balaki, “Milira pafupi na sembe yako yakocha, ndipo ine ndirute panji FUMU yamkwiza na kukumana nane. Chose icho yamkundirongora ndizamkukuphalira.” Ntheura wakaruta pachanya pa phiri pambula kumerapo kanthu.

⁴Chiuta wakakumana na Balaamu ndipo Balaamu wakati kwa iyo, “Ndanozga majochero ghankhonde na ghaŵiri, ndipo ndapereka pa jochero lirilose nkhambako na mberere yanarume kuŵa sembe.”

⁵Ndipo FUMU yikamuphalira Balaamu kuti, “Werera kwa Balaki, ukayowoye vyeneivi.”

⁶Balaamu wakawerera kwa Balaki ndipo wakawona Balaki na nduna zose za ku Mowabu ŵakimilira pafupi na sembe yakhe yakocha.

⁷Penepapo Balaamu wakamba kuyowoya wakati, “Balaki wakanditora kufuma ku Aramu, ndiyo karonga wa ku Mowabu ku mapiri gha ku mafumiro gha dazi. Wakati, ‘Zanga, utembe Yakhobe mu malo ghane, zanga uyuyure Israele.’

⁸Kasi ndingamutemba uli mweneuyo Chiuta walije kumutemba? Ndingachombola uli mweneuyo FUMU yilije kumuchombola?

⁹Pakuti apo ndili pachanya pa phiri nkhuŵawona, apo ndili pa tumapiri nkhuŵalaŵiska, ŵanthu ŵakujikhalira ŵekha, ŵambula kujipendera pamoza na ŵamitundu.

¹⁰Kasi ndi njani uyo wangapenda ŵana ŵa Yakhobe, panji kupenda mawumba gha ŵaIsraele? Rekani ine ndifwe nyifwa ya ŵarunji, ndipo umaliro wane uŵe nga ndi wawo!”

¹¹Ndipo Balaki wakamufumba Balaamu wakati, “Nchichi icho wandichitira? Nkhakuchema iwe kwiza katemba ŵarwani ŵane, ndipo iwe ulije kuchita kanthu kweni waŵatumbika.”

¹²Balaamu wakazgora wakati, “Kasi ndireke kuyowoya icho FUMU yandiphalira?”

¹³Balaki wakamuphaliraso kuti, “Tiyeni ku malo ghanyakhe, kwenekuko ungamanya kuŵawona. Wamkuwona awo ŵali pafupi pera, ndipo kuti wamkuŵawona wose chara. Penepara ndipo ukaŵa temberere ŵanthu ŵara mu malo ghane.”

¹⁴Wakaruta nayo ku Zofimu pachanya pa Phiri la Pisiga, ndipo wakazenga majochero ghankhonde na ghaŵiri. Wakapereka nkhambako na mberere yanarume pa jochero lirilose kuŵa sembe.

¹⁵Balaamu wakati kwa Balaki, “Milira pano pafupi na sembe yako yakocha, apo ine nkhuruta kuya kakumana na FUMU kura.”

¹⁶FUMU yikakumana na Balaamu, na kumuphalira icho wamuyowoya yikati, “Werera kwa Balaki ukayowoye vyeneivi.”

¹⁷Balaamu wakawerera kwa Balaki ndipo wakawona kuti wimilira pafupi na sembe yakhe yakocha pamoza na nduna za ku Mowabu zira. Balaki wakamufumba wakati, “Kasi FUMU yayowoyachi?”

¹⁸Balaamu wakamba kuyowoya wakati, “Wuka Balaki, tegherezga kwa ine iwe mwana wa Zipora.

¹⁹Chiuta kuti ndi munthu chara, kuti watete nesi mwana wa munthu kuti wasinthe maghanoghano ghakhe. Iyo asi wanena, kasi wati wareke kuchichita? Iyo asi wayowoya, kasi wati wareke kuchifiska?

²⁰Nadi, nkhapokera languro lakuti nditumbike. Iyo watumbika, ndipo ine kuti ndingasintha chara.

²¹Iyo walije kuwonamo kanthu kaheni mwa Yakhobe, nanga nkhusangamo soka mwa iyo. FUMU, Chiuta wawo wali nawo, ndipo mukati mwawo muli nchemerezgo kuti iyo ndi karonga wawo.

²²Chiuta wakaŵafumya mu Eguputo, ŵali na nkhongono nga ndi za njati.

²³Pakuti palije chakuwukwa icho chingimikana na Yakhobe, nanga ndi chakuroska icho chingimikana na Israele. Sono ŵamkuyowoya za Yakhobe na Israele kuti, ‘Wonani icho Chiuta wachita!’

²⁴Wonani ŵaIsraele! Iwo ŵali nga ndi nkharamu yanakazi iyo yikuwukira muchanya, ndiposo nga ndi nkharamu yanarume iyo yikujiwuskira muchanya. Iyo kuti yikugona pasi chara mpaka yimarizge icho yakoma, na kumwa ndopa za nyama iyo yakoma.”

²⁵Ndipo Balaki wakati kwa Balaamu, “Ureke kuŵatemberera, ndipo ureke kuŵatumbika.”

²⁶Kweni Balaamu wakamufumba Balaki wakati, “Kasi nkhakuphalira chara kuti chose icho FUMU yayowoya ndicho nkhwenera kuchita?”

²⁷Balaki wakati kwa Balaamu, “Zanga sono, nditi ndikutorere ku malo ghanyakhe. Panji chamkumukondweska Chiuta kuti ukatemberere ŵanthu ŵara mu malo ghane kufuma penepara.”

²⁸Ntheura Balaki wakaruta nayo pachanya pa Phiri la Peyoro, ilo likuchiwonera pasi chiparamba.

²⁹Balaamu wakati kwa Balaki, “Undizengere pano majochero ghankhonde na ghaŵiri, ndipo undipe nkhambako zinkhonde na ziŵiri na mberere zanarume zinkhonde na ziŵiri.”

³⁰Balaki wakachita kwakuyana na umo Balaamu wakamuphalirira. Wakapereka pa jochero lirilose nkhambako yimoza na mberere yanarume yimoza kuŵa sembe.