Read new_tumbuka_bible Kupenda 24 Bible Online

Kupenda 24 - new_tumbuka_bible bible

Kupenda 24

¹Para Balaamu wakawona kuti chikaŵa chakukondweska FUMU kuti watumbike ŵaIsraele, iyo kuti wakarutako chara nga mpha nyengo zinyakhe, ndiposo kuti wakaruta chara kuya kapenja vya maula, kweni wakarazgira waka chisko chakhe ku mapopa.

²Balaamu wakawona kuti ŵaIsraele ŵazenga misasa yawo fuko lose pa lekha. Ndipo Mzimu wa Chiuta wakiza pa Balaamu,

³ndipo wakamba kuyowoya wakati, “Uwu ndiwo uvumbuzi wa Balaamu mwana wa Beyoro, uvumbuzi wa uyo maso ghakhe ghakuwona makora,

⁴uvumbuzi wa mweneuyo wakupulika mazgu gha Chiuta, mweneuyo wakuwona mboniwoni ya Mwenenkhongono zose, wakuwa pasi, kweni maso ghakhe ghakulaŵiska.

⁵Nako nkhutowa kwa misasa yako iwe Yakhobe, nako nkhutowa kwa nyumba zako iwe Israele!

⁶Zili nga ndi madambo agho ghatandazgikira kutali, nga ndi minda mu mphepete mwa mronga, nga ndi chinthembwe icho FUMU yili kupanda, ndiposo nga ndi makuni gha milanje mu mphepete mwa maji.

⁷Maji ghizamkufurukira kufuma mu ndowo zakhe, ndipo mbewu yakhe yizamkuŵa na maji ghanandi. Karonga wakhe wizamkuŵa mukuru kuruska Agagi ndipo ufumunkhuru wakhe wizamkukwezgeka pachanya.

⁸Chiuta wakaŵafumya mu Eguputo. Chiuta wali na nkhongono nga za njati. Wamkurya nga nchakurya mafuko agho ghakwimikana nayo. Wamkuphyora viwangwa vyawo tuchokotuchoko, ndipo mivwi yakhe yamkuŵalasa na kuporota.

⁹Wakuwanchama na kugona nga ndi nkharamu yanarume ndiposo nga ndi nkharamu yanakazi. Ndi njani uyo wati wamuwuske? Watumbikike yose uyo wakumutumbikani, ndipo watembeke yose uyo wakumutembani.”

¹⁰Balaki wakakwiyira Balaamu, ndipo wakakuwa makwa. Wakamuphalira Balaamu wakati, “Nkhakuchema kwiza katemba ŵarwani ŵane, ndipo wona sono waŵatumbika katatu kose.

¹¹Ntheura sono wukapo urutenge ku kwako. Nkhayowoya kuti, ‘Nadi ndamkukuchindika’ kweni FUMU yakana kuti upokere nchindi.”

¹²Sono Balaamu wakamuphalira Balaki wakati, “Asi nkhaziphalira nthumi zako izo ukazituma kwa ine kuti,

¹³‘Nanga Balaki wandipenge nyumba yakuzura na siliva na golide mphanyi nkhajumpha chara mazgu gha FUMU, kuti ndichite manyi chiweme panji chiheni cha mu khumbo lane na lane. Icho FUMU yayowoya ndicho ndamkuyowoya.’ ”

¹⁴Balaamu wakati kwa Balaki, “Sono nkhuruta ku ŵanthu ŵane. Zaninge ndimuphalirani icho ŵaIsraele ŵamkuŵachitira ŵanthu ŵinu mu mazuŵa gha umaliro.”

¹⁵Iyo wakamba kuyowoya, wakati: “Uwu ndi uvumbuzi wa Balaamu mwana wa Beyoro, uvumbuzi wa uyo maso ghakhe ghajurika,

¹⁶uvumbuzi wa uyo wakupulika mazgu gha Chiuta, wa uyo wakumanyiska mahara gha Chiuta Chikurukuru, wa uyo wakuwona mboniwoni ya Mwenenkhongono zose, uyo wakuŵa pasi kweni maso ghakhe ghakulaŵiska.

¹⁷Nkhumuwona, kweni sono chara, nkhumulaŵiska, kweni kuti wali pafupi chara. Karonga wakuŵala nga ndi nyenyezi wamkuwuka kufumira mu nyumba ya Yakhobe, ndipo nthonga ya ufumu yamkuwuka kufuma mwa Israele. Ndiyo wamkuparanya ŵarongozgi wa Mowabu, kuthereskerathu mtundu wose wa Seti.

¹⁸Wamkuthereska ŵarwani ŵakhe mu Edomu, wamkutora charu chawo, apo ŵaIsraele ŵakurutilira kuvivya.

¹⁹Mwa Yakhobe ndimo mwizamufuma karonga wakuwusa, mweneuyo wizamkumara petu awo wakharako mu misumba.”

²⁰Ndipo Balaamu wakalaŵiska kwa Amaleki ndipo wakamba kuyowoya wakati, “Fuko la Amaleki ndilo likaŵa lankhongono kuruska mafuko ghanyakhe ghose, kweni ku umaliro lizamkumara petu.”

²¹Pamanyuma wakalaŵiska ku ŵaKeni ndipo wakamba kuchima wakati, “Malo ghinu ghakukharamo ngakukhalirira, ndipo nyumba yinu yakukharamo yili mukati mu jarawe.

²²Ndipouli ŵaKeni ŵati ŵaparanyike. Kasi ŵaAsiriya ŵati ŵamuŵikani mu uzga mpaka pauli?”

²³Balaamu wakarutilira kuyowoya kuti, “Mbaya mwe, ndi njani wamkuŵa wamoyo para Chiuta wachita ichi?

²⁴“Kweni ngaraŵa zamkwiza kufuma ku Kitimu ndizo zamkubwangandula Asiriya na Ebere Kitimu nayoso wizamkubwanganduka.”

²⁵Penepapo Balaamu wakawuka na kukwereraso ku kwakhe. Balaki nayo wakaruta ku kwakhe.