Read new_tumbuka_bible Kupenda 25 Bible Online

Kupenda 25 - new_tumbuka_bible bible

Kupenda 25

¹Apo ŵaIsraele ŵakakharanga ku Shitimu, ŵanarume ŵakamba kugonana na ŵanakazi ŵa ku Mowabu.

²Ŵanakazi aŵa ndiwo ŵakachemanga ŵaIsraele ku sembe izo ŵakachitiranga ŵachiuta ŵawo, ndipo ŵanthu ŵakaryanga nawo na kulambira ŵachiuta wawo.

³Ntheura ŵaIsraele ŵakasopanga nawo chiuta Baala wa ku Peyoro, ndipo FUMU yikaŵakwiyira ŵaIsraele.

⁴Sono FUMU yikamuphalira Mozesi yikati, “Utore ŵarongozgi wose ŵa ŵanthu ndipo uŵanyonge pakweru panthazi pane, mwakuti ndireke kukwiyira ŵaIsraele.”

⁵Mozesi wakaŵaphalira ŵeruzgi ŵa ŵaIsraele wakati, “Waliyose wa imwe wakomenge munthu wakhe na wakhe mukati mu ŵanthu awo ŵakaya kasopanga chiuta Baala wa ku Peyoro.”

⁶Sono yumoza wa ŵaIsraele wakiza na mwanakazi wa ku Midiyani ku mbumba yakhe uku Mozesi na mpingo wose wa ŵaIsraele ŵakuwona, apo ŵanthu ŵakaliranga pa muryango wa Chihema Chakukumaniranamo.

⁷Finehasi mwana wa Eleyazara, muzukuru wa musofi Aroni wakati wawona ichi, wakawuka na kureka mpingo. Wakatora mukondo,

⁸ndipo wakamurondezga muIsraele yura kuya kafika mu chipinda cha mukati ndipo wakagwaza wose ŵaŵiri wuwo, mwanarume muIsraele na mwanakazi yura. Ntheura nthenda yakofya yikareka mukati mu ŵaIsraele.

⁹Ndipouli awo ŵakafwapo na nthenda yakofya yira ŵakaŵa 24,000.

¹⁰FUMU yikamuphalira Mozesi yikati,

¹¹“Finehasi mwana wa Eleyazara, muzukuru wa musofi Aroni, wawezgako ukari wane ku ŵaIsraele pakuti wakakana kuti munthu waliyose wasopenge ŵachiuta ŵanyakhe kweni ine pera. Ndicho chifukwa ndilije kuŵasakaza ŵaIsraele mu ukari wane.

¹²Ntheura umuphalire kuti ine nkhumupa iyo phangano lane la mutende.

¹³Nkhupangana kuti iyo na mphapu yakhe pamanyuma pakhe, ŵati ŵaŵe ŵasofi kwa muyirayira, pakuti iyo wakazomerezga chara kuti ŵanthu ŵimikane nane, na kuphepiskira zakwananga ŵaIsraele.”

¹⁴MuIsraele mweneuyo wakakomekera pamoza na mwanakazi wa chiMidiyani, wakaŵa Zimuri mwana wa Salu, murara wa pa nyumba yawo ya fuko la Simiyoni.

¹⁵Mwanakazi wa chiMidiyani mweneuyo wakakomeka wakaŵa Kozibi mwana wa Zuru, mweneuyo wakaŵa murara pa mbumba ya fuko la Midiyani.

¹⁶FUMU yikamuphalira Mozesi yikati,

¹⁷“Rutanga ukarwe na ŵaMidiyani na kuŵakoma

¹⁸pakuti ŵakamusuzganinge imwe na uryarya wawo ku Peyoro ndiposo chifukwa cha makani gha mudumbu wawo Kozibi mwana mwanakazi wa Karonga wa ku Midiyani, mweneuyo wakakomeka pa zuŵa ilo nthenda yakofya yikawiranga chifukwa cha ivyo vikachitika ku Peyoro.”