Read new_tumbuka_bible Kupenda 26 Bible Online

Kupenda 26 - new_tumbuka_bible bible

Kupenda 26

¹Pamanyuma pa nthenda yakofya yira, FUMU yikayowoya kwa Mozesi na kwa Eleyazara mwana wa musofi Aroni yikati,

²“Upende ŵanthu wose awo ŵali mu mpingo wa ŵaIsraele, kwakuyana na nyumba za ŵawiskewokuru, kwamba ŵa virimika 20 na ŵakujumphirapo, ŵeneawo mbakwenerera kurwa nkhondo mu ŵaIsraele.”

³Ndipo Mozesi na Eleyazara musofi ŵakayowoya na ŵanthu mu vidika vya Mowabu, pa mronga wa Yorodani pafupi na msumba wa Yeriko, ŵakati.

⁴“Mupende ŵanthu, kwamba ŵa virimika 20 na ŵakujumphirapo, nga ndi umo FUMU yikamulangulira Mozesi.” ŴaIsraele awo ŵakafuma mu charu cha Eguputo ŵakaŵa aŵa.

⁵Mbumba ya Rubeni, mwana wa uŵere wa Israele yikaŵa iyi: Ŵana ŵanarume ŵakaŵa aŵa: Hanoki wakaŵa sekuru wa ŵa mu mbumba ya Hanoki. Palu wakaŵa sekuru wa ŵa mu mbumba ya Palu.

⁶Hezironi wakaŵa sekuru wa ŵa mu mbumba ya Hezironi. Karimi wakaŵa sekuru wa ŵa mu mbumba ya Karimi.

⁷Ŵeneaŵa ndiwo ŵakaŵa ŵa mbumba ya Rubeni. Unandi wawo ukaŵa 43,730.

⁸Mwana wa Palu wakaŵa Eliyabu,

⁹ndipo ŵana ŵaEliyabu ŵakaŵa Nemuyele, Datani, na Abiramu. Aŵa ndiwo ŵaDatani na ŵaAbiramu ŵeneawo ŵakasoreka mu mpingo, ndiposo mbeneawo ŵakalimbananga na Mozesi na Aroni pakuŵa pamoza na Kora, apo ŵakimikananga na FUMU.

¹⁰Ndipo charu chikajurika ndipo chikaŵamilira pamoza na Kora, penepapo mpingo wa ŵanthu ŵara ukamara, pa nyengo yira moto ukamyangulira ŵanthu 120,000. Iwo ŵakazgoka chiyerezgero.

¹¹Ndipouli ŵana ŵaKora kuti ŵakafwa wose chara.

¹²Ŵana ŵaSimiyoni kwakuyana na mbumba zawo ndi aŵa: Nemuyele wakaŵa sekuru wa mbumba ya ŵaNemuyele. Yamini wakaŵa sekuru wa mbumba ya ŵaYamini. Yakini wakaŵa sekuru wa mbumba ya ŵaYakini.

¹³Zera wakaŵa sekuru wa mbumba ya ŵaZera. Shawulu wakaŵa sekuru wa mbumba ya ŵaShawulu.

¹⁴Ŵeneaŵa ndiwo ŵakaŵa ŵa fuko la Simiyoni. Unandi wawo ukaŵa 22,200.

¹⁵Ŵana ŵa Gadi kwakuyana na mbumba zawo, ŵakaŵa aŵa: Zefoni wakaŵa sekuru wa ŵaZefoni. Hagi wakaŵa sekuru wa ŵaHagi. Shuni wakaŵa sekuru wa ŵaShuni.

¹⁶Ozini wakaŵa sekuru wa ŵa mu mbumba ya Ozini. Eri wakaŵa sekuru wa ŵa mu mbumba ya Eri.

¹⁷Arodi wakaŵa sekuru wa ŵa mu mbumba ya Arodi. Areli wakaŵa sekuru wa ŵa mu mbumba ya Areli.

¹⁸Ŵeneaŵa ndiwo wakaŵa ŵa mbumba ya Gadi. Kwamuyana na unandi wawo ŵakaŵa 40,500.

¹⁹Ere na Onani ŵakaŵa ŵana ŵa Yuda, kweni iwo ŵakafwira mu charu cha Kanani.

²⁰Ŵana ŵa Yuda ŵanyakhe kwakuyana na mbumba zawo ŵakaŵa aŵa: Shela wakaŵa sekuru wa ŵaShela. Perezi wakaŵa wa ŵaZera wakaŵa sekuru wa ŵaZera.

²¹Sono ŵana ŵa Perezi ŵakaŵa aŵa: Hezironi wakaŵa sekuru wa ŵa mu mbumba ya Hezironi. Hamulu wakaŵa sekuru wa ŵa mu mbumba ya Hamulu.

²²Ŵeneaŵa ndiwo ŵakaŵa ŵa mbumba ya Yuda. Kwakuyana na unandi wawo wakaŵa 26,500.

²³Ŵana ŵa Isakara kwakuyana na mbumba zawo ŵakaŵa aŵa: Tola wakaŵa sekuru wa ŵaTola. Puva wakaŵa sekuru wa ŵaPuva.

²⁴Yashubu wakaŵa sekuru wa ŵa mu mbumba ya Yashubu. Shimuroni wakaŵa sekuru wa ŵa mu mbumba ya Shimuroni.

²⁵Ŵeneaŵa ndiwo ŵakaŵa ŵa mbumba ya Isakara. Kwakuyana na unandi wawo ŵakaŵa 64,300.

²⁶Ŵana ŵa Zebuloni kwakuyana na mbumba zawo ŵakaŵa aŵa: Seredi wakaŵa sekuru wa ŵaSeredi. Eloni wakaŵa sekuru wa mbumba ya ŵaEloni. Yaleyele wakaŵa sekuru wa mbumba ya ŵaYelele.

²⁷Ŵeneawo ndiwo ŵakaŵa ŵa mbumba ya Zebuloni. Kwakuyana na unandi wawo ŵakaŵa 60,500.

²⁸Ŵana ŵa Yosefe kwakuyana na mbumba zawo wakaŵa Manase na Efurayimu.

²⁹Ŵana ŵa Manase ŵakaŵa aŵa: Makiri wakaŵa sekuru wa mbumba ya ŵaMakiri. Ndipo Makiri wakaŵa wiske wa Gileyadi. Gileyadi wakaŵa sekuru wa mbumba ya ŵaGileyadi.

³⁰Ŵana ŵanarume ŵa Gileyadi ŵakaŵa aŵa: Yezere wakaŵa sekuru wa ŵaYezere. Heleki wakaŵa sekuru wa mbumba ya ŵaHeleki.

³¹Asiriyele wakaŵa sekuru wa mbumba ya ŵaAsiriyele. Shekemu wakaŵa sekuru wa mbumba ya ŵaShekemu.

³²Shemida wakaŵa sekuru wa mbumba ya ŵaShemida. Hefere wakaŵa sekuru wa mbumba ya ŵaHefere.

³³Zelofehadi mwana wa Hefere wakaŵavye mwana mwanarume, kweni ŵana ŵanakazi pera awo mazina ghawo ndi agha: Mala, Nowa, Hogila, Milika na Tiriza.

³⁴Ŵeneaŵa ndiwo ŵakaŵa ŵa mbumba ya Manase. Unandi wawo ŵakaŵa 52,700.

³⁵Aŵa ndiwo ŵana ŵa Efurayimu kwakuyana na mbumba zawo: Shutela wakaŵa sekuru wa mbumba ya ŵaShutela. Bekere wakaŵa sekuru wa mbumba ya ŵasekuru ŵa mbumba ya ŵaBekere. Tahani wakaŵa sekuru wa mbumba ya ŵaTahani.

³⁶Aŵa ndiwo ŵana ŵa Shutela: Erani wakaŵa sekuru wa mbumba ya ŵaErani.

³⁷Ŵeneaŵa ndiwo ŵakaŵa ŵa mbumba ya Efurayimu. Kwakuyana na unandi wawo ŵakaŵa 32,500. Aŵa ndiwo ŵakaŵa ŵa mbumba za ŵaYosefe.

³⁸Ŵana ŵa Benjamini kwakuyana na mbumba zawo ŵakaŵa aŵa: Bela wakaŵa sekuru wa mbumba ya ŵaBela. Ashibele wakaŵa sekuru wa mbumba ya ŵaAshibele. Ahiramu wakaŵa sekuru wa mbumba ya ŵaAhiramu.

³⁹Shefufamu, wakaŵa sekuru wa mbumba ya ŵaShefamu. Hufamu wakaŵa sekuru wa mbumba ya ŵaHufamu.

⁴⁰Ŵana ŵa Bela ŵakaŵa Aridi na Naamani. Aridi wakaŵa sekuru wa ŵaAradi. Naamani wakaŵa sekuru wa mbumba ya ŵaNaamani.

⁴¹Aŵa ndiwo ŵa mbumba ya Benjamini kwakuyana na unandi wawo wakaŵa 45,600.

⁴²Aŵa ndiwo ŵana ŵa Dani kwakuyana na mbumba zawo: Shuhamu wakaŵa sekuru wa mbumba ya ŵaShuhamu. Ŵeneaŵa ndiwo ŵakaŵa ŵa mbumba ya Dani kwakuyana na mbumba zawo.

⁴³Wose ŵa mbumba ya ŵaShuhamu kwakuyana na unandi wawo ŵakaŵa 64,100.

⁴⁴Ŵana ŵa Ashere kwakuyana na mbumba zawo ŵakaŵa aŵa: Imuna wakaŵa sekuru wa ŵa mbumba ya ŵaImuna. Ishiva wakaŵa sekuru wa mbumba ya ŵaIshivi. Beriya wakaŵa sekuru wa mbumba ya ŵaBeriya.

⁴⁵Ŵana ŵa Beriya ŵakaŵa aŵa: Hebere wakaŵa sekuru wa mbumba ya ŵaHebere. Malikiyele wakaŵa sekuru wa mbumba ya ŵaMalikiyele.

⁴⁶Ndipo mwana mwanakazi wa Ashere wakaŵa Sera.

⁴⁷Ŵeneaŵa ndiwo ŵakaŵa ŵa mbumba ya Ashere. Kwakuyana na unandi wawo ŵakaŵa 53,400.

⁴⁸Ŵana ŵa Nafutali ŵakaŵa aŵa kwakuyana na mbumba zawo. Yazeyele wakaŵa sekuru wa mbumba ya ŵaYazeyele. Guni wakaŵa sekuru wa mbumba ya ŵaGuni.

⁴⁹Yezere wakaŵa sekuru wa mbumba ya ŵaYezere. Shilemu wakaŵa sekuru wa mbumba ya ŵaShileme.

⁵⁰Ŵeneaŵa ndiwo ŵakaŵa ŵa mbumba ya ŵaNafutali kwakuyana na nyumba zawo. Unandi wawo ŵakaŵa 45,500.

⁵¹ŴaIsraele ŵakaŵa 601,730 wose pamoza.

⁵²FUMU yikamuphalira Mozesi kuti,

⁵³“Uŵagaŵire charu kuti chiŵe chiharo chawo kwakuyana na unandi wa mbumba zawo.

⁵⁴Fuko likuru ulipe chiharo chikuru, fuko lichoko ulipe chiharo chichoko. Fuko lirilose lipokere chiharo kwakuyana na unandi wa ŵanthu ŵakhe.

⁵⁵Kweni mukagaŵenge charu pakuchita mphenduzgo. Mukagaŵenge kwakuyana na mazina gha mafuko gha ŵawiskewokuru.

⁵⁶Chiharo chawo chikagaŵikenge pakati pa awo mbanandi na awo mbachoko kwakulingana na mphenduzgo.”

⁵⁷Aŵa ndiwo ŵaLevi kwakuyana na mbumba zawo. Gerishoni wakaŵa sekuru wa mbumba ya ŵaGerishoni. Kohati wakaŵa sekuru wa mbumba ya ŵaKohati. Merari wakaŵa sekuru wa mbumba ya ŵaMerari.

⁵⁸Aŵa ndiwo ŵakaŵa ŵa mbumba ya Levi: ŵaLibina, ŵaHeburoni, ŵaMali, ŵaMushi, ŵaKora. Kohati ndiyo wakaŵa wiske wa Amuramu.

⁵⁹Muwoli wa Amuramu wakaŵa Yokebedi, mwana wa Levi, mweneuyo wakababikira mu Eguputo, Yokebedi ndiyo wakamubabira Amuramu ŵana aŵa: Aroni na Mozesi, ndiposo mudumbu wawo Miriyamu.

⁶⁰Mwa Aroni mukababika Nadabu, Abihu, Eleyazara na Itamara.

⁶¹Kweni Nadabu na Abihu ŵakafwa para ŵakaperekanga sembe panthazi pa FUMU na moto wambula kupatulika.

⁶²Unandi wa ŵanarume awo ŵakapendeka mwa iwo, kwamba ŵa mwezi umoza na ŵakujumphirapo, ukaŵa 23,000. Iwo kuti ŵakapendekera pamoza na ŵaIsraele chara pakuti ŵakaŵavye chiharo mukati mu ŵaIsraele.

⁶³Aŵa ndi ŵanthu ŵeneawo ŵakapendeka na Mozesi na Eleyazara musofi, ŵeneawo ŵakapika mlimo wakupenda ŵaIsraele mu vidika vya charu cha Mowabu, pa mronga wa Yorodani ku Yeriko.

⁶⁴Kweni mukati mu ŵanthu aŵa pakaŵavye na munthu yumoza mweneuyo wakapendekapo na kale na Mozesi na musofi Aroni, ŵeneawo kale ŵakapenda ŵaIsraele mu mapopa gha Sinayi.

⁶⁵Chifukwa FUMU pakuyowoya vya iwo yikati, “Ŵamkufwira mu mapopa.” Pakaŵavye na munthu wakukharako, kweni Kalebu mwana wa Yefune ndiposo na Yoshuwa mwana wa Nuni.