Read new_tumbuka_bible Kupenda 27 Bible Online

Kupenda 27 - new_tumbuka_bible bible

Kupenda 27

¹Pa nyengo yira kukiza ŵana ŵanakazi ŵa Zelofehadi. Iyo wakaŵa mwana wa Hefere, mwana wa Gileyadi, mweneuyo wakaŵa mwana wa Makiri, mwana wa Manase. Aŵa ŵakaŵa ŵa mbumba ya Manase mwana wa Yosefe. Ŵana ŵakhe ŵanakazi ŵara ŵakaŵa Mala, Nowa, Hogila, Milika na Tiriza.

²Iwo ŵakimilira panthazi pa Mozesi, na pa Eleyazara musofi ndiposo panthazi pa ŵarongozgi wose na panthazi pa mpingo wose, pa muryango wa Chihema Chakukumaniranamo, ndipo ŵakati,

³“Dada withu wakafwira mu mapopa. Iyo kuti wakaŵa pamoza na mpingo wa Kora chara, weneuwo ukagulika na kwimikana na FUMU. Kweni wakafwa chifukwa cha kwananga kwakhe na kwakhe. Iyo kuti wakaŵa na ŵana ŵanarume chara.

⁴Kasi zina la dada withu lifwenge mu mbumba yakhe chifukwa wakaŵavye mwana mwanarume? Nase mutipe chiharo mukati mu ŵabali withu.”

⁵Mozesi wakiza na mrandu wawo panthazi pa FUMU.

⁶Sono FUMU yikamuphalira Mozesi yikati,

⁷“Ŵana ŵanakazi ŵa Zelofehadi ŵakuneneska. Uŵape chiharo chawo pakati pa ŵabali ŵawiskewo. Unozgere chiharo cha wiskewo kuti chirute kwa iwo.

⁸Ndipo uŵaphalire ŵaIsraele kuti, ‘Usange munthu wafwa wambula kurekapo mwana mwanarume, penepapo mukwenera kuwona kuti chiharo chakhe chirute ku mwana mwanakazi.

⁹Usange walije nanga ndi mwana mwanakazi, mbwenu muperekenge chiharo chakhe ku mukuru panji munung'una wakhe.

¹⁰Ndipo usange walije aŵa nawo ŵalije, ipo mupereke chiharo chakhe ku ŵanung'una panji ŵakuru ŵawiske.

¹¹Usange wiske walije ŵana ŵamoza na iyo, penepapo muperekenge chiharo chakhe ku mubali wakhe uyo ngwa pafupi na iyo ndipo ngwa mbumba yakhe, ndipo chiti chiŵenge chakhe. Agha ghaŵe marango na malangulo mukati mu ŵaIsraele, nga ndi umo FUMU yikamulangulira Mozesi.’ ”

¹²FUMU yikayowoya na Mozesi yikati, “Kwerera ku phiri ili la Abarimu, ndipo uwone charu icho ndaŵapa ŵaIsraele.

¹³Para wachiwona nawe uti ufwenge na kusungika pamoza na ŵanthu ŵako nga ndi umo mukuru wako Aroni wali kufwira na kusungika,

¹⁴chifukwa mukandigarukira mu mapopa gha Zini, apo mpingo ukandiwukira pa maji para apo mukareka kurongora panthazi pawo kuti ndine wakupatulika.” (Agha ndigho maji gha pa Meriba ku Kadeshi mu mapopa gha Zini.)

¹⁵Mozesi wakayowoya kwa FUMU wakati,

¹⁶“Mwe FUMU, mwaŵeneimwe ndimwe Chiuta wakupereka umoyo mu vyamoyo vyose, mumwimike munthu wakurongozga mpingo,

¹⁷uyo waŵadangirirenge pakuruta na pakuwera, mweneuyo wati waŵarongozge pakufuma na pakunjira mwakuti mpingo wa FUMU ureke kuŵa nga ndi mberere na mbuzi zambula muliska.”

¹⁸Penepapo FUMU yikamuzgora Mozesi yikati, “Tora Yoshuwa mwana wa Nuni, mwa mweneuyo muli Mzimu wa Chiuta ndipo uŵike mawoko pa iyo pakumutumbika.

¹⁹Umuphalire wimilire panthazi pa Eleyazara musofi na panthazi pa mpingo wose ndipo umwimike panthazi pawo.

²⁰Umupeko mazaza ghako, mwakuti mpingo wose wa ŵaIsraele umupulikirenge.

²¹Sono wakarute kwa Eleyazara musofi mweneuyo wati wamufumbirenge urongozgi wakufuma kwa FUMU pakupenduzga na Urimu. Para Eleyazara wayowoya, mpingo wose wa ŵaIsraele pamoza na Yoshuwa mwenecho ŵati ŵafumenge na kuchita chose icho ŵaphalirika.”

²²Mozesi wakachita kwakuyana na umo FUMU yikamulangulira. Wakamutora Yoshuwa na kumwimika panthazi pa Eleyazara musofi na panthazi pa mpingo wose.

²³Wakaŵika mawoko ghakhe pa iyo, ndipo wakamwimika nga ndi umo FUMU yikamulangulira kwizira mwa Mozesi.