Read new_tumbuka_bible Kupenda 28 Bible Online

Kupenda 28 - new_tumbuka_bible bible

Kupenda 28

¹FUMU yikamuphalira Mozesi yikati,

²“Uŵaphalire ŵaIsraele kuti, pakupereka kwa ine sembe ya vyakurya vyakuperekeka na moto, yakupereka sungu liweme, ŵaŵe na mtima wa kupereka pa nyengo zakwenerera.

³“Uŵaphalire kuti sembe yakocha pa moto iyo mukwenera kupereka kwa FUMU ndi iyi: ŵana-mberere ŵanarume ŵaŵiri ŵa chirimika chimoza ŵambula kalema, ŵaperekenge zuŵa na zuŵa, nga ndi chakupereka cha kurutilira.

⁴Mukaperekenge mwana-mberere yumoza na mulenje ndipo mwana-mberere munyakhe mukaperekenge na mise.

⁵Muperekenge chigaŵa cha khumi cha debe la ufu wakunyiririka, wakusazgikana na lita limoza la mafuta, kuŵa chawanangwa.

⁶Iyi ndi sembe yakocha rutaruta yeneiyo yikimikika pa Phiri la Sinayi kuŵa yakupereka sungu liweme, sembe yakuperekeka kwa FUMU na moto.

⁷Sembe yakhe ya vyakumwa yiŵenge ya lita limoza pa mwana-mberere yumoza. Muthire vinyo lankhongono la sembe ya vyakumwa kwa FUMU mu malo ghakupatulika.

⁸Mwana-mberere munyakhe muperekenge na mise. Kwakuyana waka na sembe ya ufu ya ku mulenje, ndiposo kwakuyana na sembe yakhe ya vyakumwa muyiperekenge kuŵa sembe yakocha, ya sungu liweme kwa FUMU.

⁹“Pa zuŵa la Sabata muperekenge ŵana-mberere ŵanarume ŵaŵiri ŵa chirimika chimoza ŵambula kalema. Muperekengeso ufu wakunyiririka wakukwana vigaŵa viŵiri mu vigaŵa khumi vya debe kuŵa sembe ya ufu, na kusazgako mafuta, ndipo muperekengeso sembe ya chakumwa.

¹⁰Iyi ndi sembe yakocha yakuchitika pa zuŵa la Sabata lirilose pa dera pa sembe iyo njakocha ruta, na sembe yakhe ya vyakumwa.

¹¹“Pa zuŵa lakudanga la mwezi uliwose muperekenge sembe zakocha kwa FUMU. Sembe iyi yiŵe ya nkhambako zichoko ziŵiri, mberere yanarume yimoza, ndiposo na ŵana-mberere ŵanarume ŵankhonde na ŵaŵiri ŵa chirimika chimoza, wose ŵambula kalema.

¹²Muperekenge sembe ya vyakurya ya ufu wakunyiririka wakusazgako mafuta wakukwana vigaŵa vitatu mu vigaŵa khumi vya debe pa nkhambako yiliyose. Muperekeso ufu wakunyiririka wakusazgako mafuta wakukwana vigaŵa viŵiri mu vigaŵa khumi vya debe pa mberere yanarume yimoza.

¹³Muperekengeso chigaŵa cha khumi cha ufu wakunyiririka wakusazgako mafuta pa mwana-mberere waliyose. Iyi ndiyo sembe yakocha yakufumiska sungu liweme, sembe yakocha pa moto yakupereka kwa FUMU.

¹⁴Sembe ya vyakumwa yiŵe vinyo lakukwana malita ghaŵiri pa nkhambako yiliyose, ndipo vinyo lakukwana lita limoza na hafu pa mberere yanarume, ndi ya vinyo lakukwana lita limoza pa mwana-mberere waliyose. Iyi ndiyo sembe yakocha ya mwezi uliwose, pa myezi yose mu chirimika.

¹⁵Muperekengeso pepe yumoza kuŵa sembe ya zakwananga kwa FUMU. Yiperekekenge pa dera pa sembe yakocha na sembe ya vyakumwa vya zuŵa na zuŵa.

¹⁶“Zuŵa la 14 la mwezi wakudanga ndilo nda Paska la FUMU.

¹⁷Zuŵa la 15 la mwezi weneuwo ndi zuŵa la chiphikiro. Muryenge vingwa vyambula chirungo mazuŵa ghankhonde na ghaŵiri.

¹⁸Pa zuŵa lakudanga mukaŵenge na ungano wakupatulika wa visopo. Mureke kuchita mlimo unonono.

¹⁹Kweni mwizenge nayo sembe yakocha, sembe yakochera FUMU. Yiŵe ya nkhambako zichoko ziŵiri, mberere yanarume yimoza, ndipo na ŵana-mberere ŵanarume ŵankhonde na ŵaŵiri ŵa chirimika chimoza, vyose vyambula kalema.

²⁰Muperekeso sembe ya vyakurya ya ufu wakunyiririka wakusazgako mafuta. Ufu wakhe uŵe vigaŵa vitatu mu vigaŵa khumi vya debe pa nkhambako yiliyose, vigaŵa viŵiri mu vigaŵa khumi vya debe pa mberere yanarume,

²¹ndiposo chigaŵa cha khumi cha debe pa waliyose wa ŵana-mberere ŵankhonde na ŵaŵiri.

²²Muperekeso pepe yumoza kuŵa sembe ya zakwananga.

²³Muperekenge sembe izi pa dera pa sembe zakocha za zuŵa na zuŵa zeneizo zikuperekeka na mulenje.

²⁴Ntheura pa mazuŵa ghankhonde na ghaŵiri muperekenge zuŵa lirilose sembe ya vyakurya yakuperekeka na moto, ya sungu liweme kwa FUMU. Muvipereke pa dera pa sembe zakocha za zuŵa na zuŵa zira pamoza na sembe za vyakumwa.

²⁵Pa zuŵa la chinkhonde na chiŵiri mukaŵenge na ungano wakupatulika wa visopo. Mureke kuchita mlimo unonono.

²⁶“Pa zuŵa la chiphikiro cha vipambi vyakudanga, apo mukupereka kwa FUMU sembe ya ufu wa mbuto yiphya, pa Viphikiro vya maSabata ghinu, mukaŵenge na ungano wakupatulika wa visopo. Mureke kuchita mlimo unonono,

²⁷kweni muperekenge sembe yakocha ya sungu liweme kwa FUMU. Yiŵe ya nkhambako zichoko ziŵiri, mberere yanarume yimoza, ndiposo na ŵana-mberere ŵanarume ŵankhonde na ŵaŵiri ŵa chirimika chimoza.

²⁸Muperekeso sembe ya vyakurya ya ufu wakunyiririka wakusazgako mafuta, wakukwana vigaŵa vitatu mu vigaŵa khumi vya debe pa nkhambako yiliyose, ndipo vigaŵa viŵiri mu vigaŵa khumi pa mberere yanarume yimoza,

²⁹ndiposo chigaŵa cha khumi pa waliyose wa ŵana-mberere ŵankhonde na ŵaŵiri.

³⁰Muperekeso pepe yumoza kuti waŵe sembe yakuphepiskira zakwananga zinu.

³¹Pa dera pakupereka sembe yakocha rutaruta na sembe yakhe ya ufu, muti muviperekenge pamoza na sembe zawo za vyakumwa. Muwone kuti nvyambula kalema.