Read new_tumbuka_bible Kupenda 29 Bible Online

Kupenda 29 - new_tumbuka_bible bible

Kupenda 29

¹“Pa zuŵa lakudanga mu mwezi wa chinkhonde na chiŵiri, mukaŵenge na ungano wakupatulika wa visopo. Mureke kuchita mlimo unonono. Ili ndi zuŵa lakuti mulizgire zimbata.

²Ndipo muperekenge sembe yakocha, ya sungu liweme lakukondweska FUMU. Ivyo muperekenge ndi ivi: nkhambako yichoko yimoza, mberere yanarume yimoza, ŵana-mberere ŵanarume ŵankhonde na ŵaŵiri ŵa chirimika chimoza ŵambula kalema.

³Muperekeso sembe ya vyakurya ya ufu wakunyiririka wakusazgako mafuta, wakukwana vigaŵa vitatu mu vigaŵa khumi vya debe pa nkhambako yiliyose, ndipo vigaŵa viŵiri mu vigaŵa khumi pa mberere yanarume,

⁴ndiposo chigaŵa cha khumi pa waliyose wa ŵana-mberere ŵankhonde na ŵaŵiri.

⁵Muperekeso pepe yumoza kuŵa sembe ya zakwananga.

⁶Pa dera pa sembe yakocha ya mwezi uphya pamoza na sembe yakhe ya ufu, kusazgirapo sembe yakocha rutaruta pamoza na sembe yakhe ya ufu, ndiposo na sembe yawo ya vyakumwa, kwakuyana na marango ghakhe, yakufumya sungu liweme, sembe yakupereka kwa FUMU na moto.

⁷“Pa zuŵa la chikhumi mu mwezi weneuwu wa chinkhonde na chiŵiri, mukaŵenge na ungano wakupatulika wa visopo, ndipo muziŵizgenge kurya. Mureke kuchita mlimo.

⁸Kweni muperekenge sembe yakocha ya sungu liweme lakukondweska FUMU. Yiŵe ya nkhambako yichoko yimoza, mberere yanarume yimoza, ŵana-mberere ŵanarume ŵankhonde na ŵaŵiri ŵa chirimika chimoza, vyose vyambula kalema.

⁹Muperekeso sembe ya vyakurya ya ufu wakunyiririka wakusazgako mafuta, wakukwana vigaŵa vitatu mu vigaŵa khumi vya debe pa nkhambako yiliyose, ndipo vigaŵa viŵiri mu vigaŵa khumi pa mberere yanarume,

¹⁰ndiposo chigaŵa cha khumi pa waliyose wa ŵana-mberere ŵankhonde na ŵaŵiri.

¹¹Muperekeso pepe yumoza kuŵa sembe yakuphepiskira zakwananga. Yiperekekenge pa dera pa sembe yakocha, sembe ya ufu na sembe ya vyakumwa vya zuŵa na zuŵa.

¹²“Pa zuŵa la 15 mu mwezi wa 17 weneuwu, mukaŵenge na ungano wakupatulika wa visopo. Mureke kuchita mlimo unonono, ndipo muchite chiphikiro cha kuchindikira FUMU mazuŵa ghankhonde na ghaŵiri.

¹³Pa zuŵa lakudanga mupereke sembe yakocha, sembe yakupereka pakocha na moto, ya sungu liweme lakukondweska FUMU. Yiŵe ya nkhambako zichoko 13, mberere zanarume ziŵiri, ŵana-mberere ŵanarume 14 ŵa chirimika chimoza ŵambula kalema.

¹⁴Muperekeso sembe ya vyakurya ya ufu wakunyiririka wakusazgako mafuta, wakukwana vigaŵa vitatu mu vigaŵa khumi vya debe pa nkhambako mu nkhambako 13 zira ndipo vigaŵa viŵiri mu vigaŵa khumi pa mberere yanarume, pa mberere yiliyose mu mberere ziŵiri zira,

¹⁵ndipo chigaŵa cha khumi pa mwana-mberere waliyose mu ŵana-mberere 14.

¹⁶Muperekeso pepe yumoza kuŵa sembe ya zakwananga kwa FUMU. Yiperekekenge pa dera pa sembe yakocha, sembe yakhe ya ufu na sembe ya vyakumwa vya zuŵa na zuŵa.

¹⁷“Pa zuŵa la chiŵiri mupereke nkhambako zichoko 12, mberere zanarume ziŵiri, ŵana-mberere ŵanarume 14 ŵa chirimika chimoza ŵambula kalema,

¹⁸pamoza na sembe ya ufu na ya vyakumwa pa nkhambako zira, mberere zanarume zira, na pa ŵana-mberere ŵara umo viliri unandi wawo na kuchita kwakuyana na languro.

¹⁹Muperekeso pepe yumoza kuŵa sembe ya zakwananga kwa FUMU. Yiperekekenge pa dera pa sembe yakocha, sembe yakhe ya ufu na sembe ya vyakumwa vya zuŵa na zuŵa.

²⁰“Pa zuŵa la chitatu muperekenge nkhambako zichoko 11, mberere zanarume ziŵiri, ŵana-mberere ŵanarume 14 ŵa chirimika chimoza ŵambula kalema,

²¹pamoza na sembe ya ufu na ya vyakumwa pa nkhambako zira, pa mberere zanarume zira, na pa ŵana-mberere ŵara, umo zingaŵira unandi kwakuyana na languro.

²²Muperekeso pepe yumoza kuŵa sembe ya zakwananga kwa FUMU. Yiperekekenge pa dera pa sembe yakocha, sembe yakhe ya ufu na sembe ya vyakumwa vya zuŵa na zuŵa.

²³“Pa zuŵa la chinayi mukaperekenge nkhambako zichoko khumi, mberere zanarume ziŵiri, ŵana-mberere ŵanarume 14 ŵa chirimika chimoza ŵambula kalema,

²⁴pamoza na sembe ya ufu na ya vyakumwa pa nkhambako zira pa mberere zanarume zira na pa ŵana-mberere ŵara, umo viliri unandi na kwakuyana na languro.

²⁵Muperekeso pepe yumoza kuŵa sembe ya zakwananga kwa FUMU. Yiperekekenge pa dera pa sembe yakocha, sembe yakhe ya ufu na sembe ya vyakumwa vya zuŵa na zuŵa.

²⁶“Pa zuŵa la chinkhonde muperekenge nkhambako zichoko zinkhonde na zinayi, mberere zanarume ziŵiri, ŵana-mberere ŵanarume 14 ŵa chirimika chimoza ŵambula kalema,

²⁷pamoza na sembe ya ufu na ya vyakumwa pa nkhambako zira, pa mberere zanarume zira, na pa ŵana-mberere ŵara, unandi wakhe kwakuyana na languro.

²⁸Muperekeso pepe yumoza kuŵa sembe ya zakwananga kwa FUMU. Yiperekekenge pa dera pa sembe yakocha, sembe yakhe ya ufu na sembe ya vyakumwa vya zuŵa na zuŵa.

²⁹“Pa zuŵa la chinkhonde na limoza muperekenge nkhambako zichoko zinkhonde na zitatu, mberere zanarume ziŵiri, ŵana-mberere ŵanarume 14 ŵa chirimika chimoza ŵambula kalema,

³⁰pamoza na sembe ya ufu na ya vyakumwa pa nkhambako zira, mberere zanarume zira na pa ŵana-mberere ŵara, umo viliri unandi wawo na kwakuyana na languro.

³¹Muperekeso pepe yumoza kuŵa sembe ya zakwananga kwa FUMU. Yiperekekenge pa dera pa sembe yakocha, sembe yakhe ya ufu na sembe ya vyakumwa vya zuŵa na zuŵa.

³²“Pa zuŵa la chinkhonde na chiŵiri muperekenge nkhambako zichoko zinkhonde na ziŵiri, mberere zanarume ziŵiri, ŵana-mberere ŵanarume 14 ŵa chirimika chimoza na ŵambula kalema,

³³pamoza na sembe ya ufu na ya vyakumwa pa nkhambako zira, pa mberere zanarume zira, na pa ŵana-mberere ŵara, umo viliri unandi na kwakuyana na languro.

³⁴Muperekeso pepe yumoza kuŵa sembe ya zakwananga kwa FUMU. Yiperekekenge pa dera pa sembe yakocha, sembe yakhe ya ufu na sembe ya vyakumwa vya zuŵa na zuŵa.

³⁵“Pa zuŵa la chinkhonde na chitatu mukaŵenge na ungano wa nchindi. Mureke kuchita mlimo uliwose unonono,

³⁶kweni mupereke sembe yakocha, sembe yakupereka pakocha na moto, ya sungu liweme kwa FUMU. Yiŵe ya nkhambako yimoza, mberere yanarume yimoza, ŵana-mberere ŵanarume ŵankhonde na ŵaŵiri ŵa chirimika chimoza ŵambula kalema.

³⁷Ndipo mupereke sembe ya ufu na ya vyakumwa pa nkhambako yira, mberere yanarume yira, na ŵana-mberere ŵara, umo viliri unandi kwakuyana na languro.

³⁸Muperekeso pepe yumoza kuŵa sembe ya zakwananga kwa FUMU. Yiperekekenge pa dera pa sembe yakocha, sembe yakhe ya ufu na sembe ya vyakumwa vya zuŵa na zuŵa.

³⁹“Vyeneivi ndivyo muperekenge kwa FUMU pa viphikiro vyinu vyakwimikika, pakusazgirapo pa vya mapangano ghinu na pa ivyo mukuperekera mu wanangwa, pa sembe zinu zakocha, na za ufu, na za vyakumwa, ndiposo na sembe za wenenawene.”

⁴⁰Mozesi wakaŵaphalira ŵaIsraele vyose ivi kwakuyana na umo FUMU yikamulangulira.